Ermənistan baş naziri Nikol Paşinyan ölkə konstitusiyasında islahatlarla bağlı fərman imzalayıb. O bildirib ki, ölkənin əsas qanununda müəyyən boşluqlar var, eyni zamanda 2015-ci ildə həyata keçirilən referendumda tətbiq edilən bəzi dəyişikliklərə əslində zərurət yox idi.

Erməni baş nazirin sözlərindən belə nəticəyə gəlmək olarmı ki, o, Ermənistanda parlamentli respublika idarəçiliyini ləğv edib 2015-ci ilədək mövcud olan prezident üsul-idarəçiliyinə qayıtmağı hədəfləyib.

Gundemxeber.az-ın "Yeni Müsavat"a istinadən məlumatına görə, politoloq Elxan Şahinoğlu bildirib ki, keçmiş prezident Serj Sərkisyanın istəyi ilə 2015-ci ildə tələsik qəbul olunan Ermənistan Konstitusiyasında həqiqətən də boşluqlar var. Misal üçün, hazırkı konstitusiyaya görə, baş nazirin Konstitusiya Məhkəməsinin rəhbərini vəzifəsindən azad etmək hüququ yoxdur: “Paşinyan 2018-ci ildə inqilab yolu ilə Sərkisyanı devirdi və növbədənkənar parlament seçkisində qazandığı qələbə hesabına hakimiyyətə yiyələndi. Ancaq bu hakimiyyət Paşinyana Konstitusiya Məhkəməsinin tərkibini dəyişdirməyə imkan vermədi. Konstitusiya Məhkəməsinin üzvlərini və rəhbərini isə keçmiş prezident Sərkisyan təyin etmişdi. Keçmiş hakimlər Sərkisyanın adamları olduğundan Paşinyana uzun müddət problemlər yaratdılar. Paşinyanın ölkənin əsas qanununu dəyişdirməkdə əsas məqsədi gələcəkdə prezident kürsüsünə yiyələnmək də ola bilər. Sərkisyan konstitusiyanı 2015-də ona görə dəyişdirmək həvəsinə düşdü ki, hakimiyyətdəki müddəti bitirdi, parlament və baş nazirin statusunu artırmaqla özü yeni kürsüyə sahib olmaq istəyirdi. Ancaq onun bu planı alınmadı. Sərkisyan baş nazir kürsüsündə cəmi bir neçə ay otura bildi. Paşinyan tərəfdarlarını küçəyə çıxardaraq ”mən baş nazir olmayacam" deyən Sərkisyana vədini xatırlatdı və onu devirdi. İndi isə belə çıxır ki, Paşinyan Sərkisyanın yolunu tərsinə getmək istəyir.

Paşinyan konstitusiya islahatları ilə bağlı fərman imzalayıb. Bu fərmana görə islahatlarla məşğul olacaq şura təsis ediləcək. Şuranın tərkibi hələ müəyyənləşməyib. Tərkibin formalaşmasının özü böyük mübahisələrə səbəb olacaq, hamı orada öz adamını görmək istəyəcək.

Paşinyan tələsmir. O yeni konstitusiya islahatlarına razılaşmaqla, sadəcə, radikal rəqiblərini zəiflətmək istəyir. İslahatlar məşğul olacaq şuranın təsisi və yekun sənədini hazırlaması xeyli vaxt aparacaq. Bu zaman kəsiyində isə Paşinyan mövqelərini gücləndirməyə çalışacaq".

Sosial Tədqiqatlar Mərkəzinin eksperti Tural İsmayılov isə bildirdi ki, Paşinyan hakimiyyətə gəldikdən sonra ölkədə hüquqi və siyasi sistemi iflic vəziyyətdən çıxarıb öz şəxsi maraqlarına xidmət səviyyəsinə çevirməyə çalışır. Ermənistanda neçə illərdir ki, hakimiyyətdə və müxalifətdə olan siyasi qüvvələr ölkənin konstitusiyasın oyuncağa çeviriblər: “Hesab edirəm ki, Paşinyanın konstitusiya dəyişikliklərinə getməyinin əsas səbəblərindən biri prezident üsul-idarəçliyini tətbiq etmək istəyidir. Çünki hazırkı idarəetmə üsulu Ermənistanda xaosun yaranmasının səbəblərindən biri kimi görünür. Parlamentdə olan müxalifət Paşinyan hökumətinə çox ciddi maneələr yarada bilir. Hökumətin işi iflic vəziyyətinə düşür. Paşinyan bilir ki, üzərinə götürdüyü bir sıra öhdəliklərin yaxın gələcəkdə yerinə yetirilməsinə hazırkı konstitusiya müəyyən maneələr yarada bilər”.

Gundemxeber.az