Bloger Mehman Hüseynovun Yenisabah.az-a  müsahibəsi:

-  Park Bulvarda baş verən izdihamdan yəqin ki, sizin də xəbəriniz oldu. Azərbaycanda niyə hansısa bloger bu qədər populyarlaşa bilmir?

- Bunun cavabı çox sadədir, Azərbaycanda bu qədər imkana malik olan, bu qədər var dövləti olan bloger yoxdur. Hüseyn Həsənov bildiyiniz kimi, Rusiyada yaşayır, imkanları çoxdur, əhatəsi genişdir, vəzifədə olan dostları çoxdur. Onun “takıldığı”, görüşdüyü adamlar da sanballı adamlardır. Populyarlaşmaq üçün bütün bu kriteriyalar olmalıdır. 

Azərbaycanda niyə bir bloger onun qədər məşhurlaşa bilmir? Məsələn, mənim ətrafıma baxsanız Ramzan Kadırov kimi yüksək vəzifəli şəxslərdən bir nəfər belə görə bilməzsiniz. Mənim o qədər maddi imkanım, gəlirlərim yoxdur. Bir blogerin məşhurlaşması üçün bunlar şərtdir. Hüseyn Həsənov təkcə bloger deyil, araşdırsanız görərsiniz ki, onun yüksək vəzifəli məmurlarla əlaqələri var və s.

- Bu izdihamlı görüşdən sonra Azərbaycan gəncliyini qürursuz adlandıranlar da az olmadı. Siz bununla razısınızmı?

- Xeyr, mən bu fikirlərlə razı deyiləm. Gəncləri buna görə qınamaq olmur, çünki bu cür hal bir çox ölkələrdə baş verir. Məsələn, mən sabah “İnstagram”da, “YouTube”da, “Facebook”da paylaşım etsəm ki, “20 dənə “İphone” almışam və fanatlarımla görüşdə bu telefonları öz sahiblərinə verəcəyəm” yenə də o qədər gənci bir yerə yığmaq olar. 

Amma problem ondadır ki, Mehmanın o qədər imkanı, maddi durumu yoxdur ki, 20 “İPhone” təşkil etsin və insanlara paylaşın. Burada yenə də bir məqama gəlib çıxırıq: çox şey sənin ətrafında olan insanlardan asılıdır. 

Məsələn, mən – Mehman Hüseynov “Park Bulvar” a müraciət edib desəm ki, şərait yaradın, 1-2 saatlıq buranı mənə verin ki, öz fanatlarımla görüşüm, təbii ki, bu imkan mənə yaradılmayacaq. Çünki mənim təsiredici dostlarım yoxdur. 

Amma Hüseyn Həsənovun “İnstagram” profilinə baxsanız, görəcəksiniz ki, kimlərlə, hansı vəzifəli şəxslərlə dostdur və ona bu imkanlar yaradılır. Dost-tanışlıq mütləqdir, burada söhbət məşhurluqdan getmir. Məşhur olmaq üçün də sənin imkanın və imkanlı dostların olmalıdır. Bu kriteriyaların heç biri məndə yoxdur, nə maddi imkanım, nə məmur dostlarım, nə də “dayday”ım var. 

Düşünürəm ki, Azərbaycanda hər hansı bloger elan eləsə ki, mən görüş təşkil edəcəm və “İPhone” paylayacam, yenə də gənclərin izdihamına rast gələcəyik. Ona görə də bu mənada həmin gəncləri qınamaq düzgün deyil, onlardan kimsə məktəblidir, kimsə tələbədir və bütün dünyada bu belə şeylər baş verir. Hansısa müğənni, bloger İngiltərədə belə bir şey təşkil etsə, eyni izdiham orada da yaşanacaq.

- Bəs siz özünüz bloger kimi pərəstişkarlarınızla nə vaxtsa görüş təşkil etmək istəyərsinizmi?

- Əlbəttə. Görüş təşkil etmək  olar, amma gəlin görək bu Azərbaycanda mümkündürmü? Əlbəttə ki, yox. Mənə heç kim məkan verməyəcək, şərait yaratmayacaq. Nə zamansa fanatlarımla görüş təşkil etsəm, mütləq ora polis basqını olacaq, yozulacaq ki, gənclər yeni inqilaba hazırlaşırlar, min cür nağıl uyduracaqlar. Bu görüşü təşkil etməyə imkan verməyəcəklər.

İstəyirsinizsə, günü sabah “Park Bulvar”a müraciət edim, deyim ki, mənə fanatlarımla görüş üçün yer verin. Bunu etməyəcəklər. Necə ki, müxalifətə “Məhsul” stadionunda mitinqlərin keçirilməsi üçün icazə verilmir, eləcə də mən “Park Bulvar”dan eyni cavabı alacam. Deyəcəklər ki, məqsədə uyğun deyil, amma Hüseyn Həsənovun əlaqələrinə görə “Park Bulvar”da fan görüşü keçirməyə heç bir əngəl yoxdur. 

“İPhone”ları almağa imkanım və “Park Bulvar”ın “hə” cavabı olsa,  həmin o coşqunu və izdihamı mən də yarada bilərəm. Buna don geyindirə bilərlər ki, inqilab etməyə hazırlaşır və s. 

Düşünürəm ki, azərbaycanlı blogerlər heç də Hüseyn Həsənovdan geri qalmırlar. Hər bir şəxs o cür coşqulu görüş təşkil edə bilər, bunun üçün imkan, şərait və “dayday”ın olmağı kifayətdir.

GundemXeber.Az