“2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı” təsdiqlənərkən əhalinin keyfiyyətli ət məhsulları ilə təminatı üçün paytaxt da daxil olmaqla bölgələrdə ət kəsim məntəqələrinin yaradılması nəzərdə tutulmuşdu.

Prezident İlham Əliyevin 25 avqust, 2008-ci il tarixli sərəncamı ilə təsdiqlənmiş proqramda ərzaq ehtiyatının tələb olunan səviyyədə saxlanılması üçün müasir tələblərə cavab verən infrastrukturun yaradılması da əksini tapmışdı.

Proqramın təsdiqlənməsindən 6 il keçməsinə baxmayaraq ət kəsim məntəqələrinin yaradılması tələbi tam yerinə yetirilməyib. Hələ də şəhərin müxtəlif istiqamətlərində, bazarlarda ət sallaqxanalarına rast gəlinir.

Virtualaz.org saytı bununla bağlı Respublika Gigiyena və Epidemiologiya Mərkəzinin qida gigiyenası şöbəsinin rəhbəri İmran Abdullayevin mövqeyini öyrənib.

Şöbə müdiri dedi ki, paytaxtın Əzizbəyov, Xəzər, Binəqədi və Abşeron rayonlarında ət kəsim məntəqələri yaradılıb. Lakin bu məntəqələrlə əhalinin tələbatını ödəmək mümkün deyil: “Məsələ ondadır ki, ət kəsim məntəqələrinin özəl əsaslarla yaradılması nəzərdə tutulub. Yəni sahibkarlar istəyərlərsə, belə bir məntəqə yarada bilər. Sahibkarların isə bu sahəyə marağı azdır. Nəticədə ət kəsim məntəqələrinin yaradılması ləng gedir. Bundan istifadə edib ət sallaqxanaları yaradırlar. Biz hətta

rayon icra hakimiyyətlərinə müraciət edərək ət kəsim məntəqələrinin yaradılması üçün yer ayrılmasını təklif etmişik”.

İ.Abdullayev bildirdi ki, Səbayel və Nəsimi rayonlarında qanunsuz ət kəsimi ilə məşğul olan məntəqələrin fəaliyyəti dayandırılıb: “Qanunsuz ət sallaqxanalarında satılan ətlər rayonlardan gətirilir. Amma ətin daşınması qaydalarına riayət edilmir. Bəllidir ki, kilometrlərlə yol gələn ət və ət məhsulları soyuducularda daşınmalıdır. Lakin aparılan araşdırmalar göstərir ki, bu gün rayonlardan Bakıya satmağa gətirilən ətlər soyuducularda daşınmır”.

Şöbə müdiri dedi ki, rayonlardan tonlarla ət gətirilir, amma bu məhsullar yollarda yoxlanılmır: “Kimsə soruşmur ki, bu ətləri haradan gətirirsiniz. Hazırda at və eşşək ətləri ilə bağlı yoxlamalar aparılır. Bəllidir ki, bunların ötürücü şəbəkələri var”.

Iqtisadçı Nübar Seyidova isə virtualaz.org saytına bildirib ki, dövlət proqramı Taxıl Fondunun yaradılmasından tutmuş məhsulların tarladan süfrəyədək proseslərin zəncirvari inkişafınadək bütün sahələri əhatə edib. Lakin proqramda nəzərdə tutulan tədbirlər ya özəl sektorun üzərinə atılaraq yerinə yetirilməyib, ya da ləng həyata keçirilib: “Kənd təsərrüfatı məhsullarının inkişafına dair təqdim olunan rəqəmlər real deyil. Kənd Təsərrüfatı Nazirliyi hələ də şişirdilmiş statistikadan kənara çıxa, real iş görə bilmir. Daha bir sərəncam bu ilin yanvarın 16-da imzalanmış “Kənd təsərrüfatı və ərzaq məhsulları bazarının fəaliyyətinin təkmilləşdirilməsi sahəsində əlavə tədbirlər haqqında”dır. Bu sərəncamdın icra vəziyyətini izləyirik. Guman ki, bu sərəncam digərləri kimi həyata keçirilməz”.