Kolbasada “ bağırsaq çöpü” aşkarlanıb. Bu barədə Bakupost.az-a Respublika Gigiyena və Epidemiologiya Mərkəzinin şöbə müdiri İmran Abdullayev məlumat verib.

O, bildirib ki, yanvar ayı ərzində mağazalarda satışa çıxarılan kolbasa məhsulları laborator müayinələrdən keçirilib: “Müayinə zamanı 100-dən çox nümunə yoxlanılıb. Bir nümunədə bakteriyayla çirklənmə aşkarlanıb. Hələlik hansı firmanın məhsulu olduğunu açıqlaya bilmərik. Çünki sabahdan etibarən təkrar yoxlama aparılacaq. Laborator müayinə təkrar nəticə əldə edərsə, ictimaiyyətə ətraflı məlumat veriləcək. O zaman məhsulun hansı firmaya aid olduğu da açıqlanacaq”.

RGEM-in şöbə müdiri yaxın günlərdə süd məhsullarının yoxlanılmasına başlayacaqlarını da bildirib: “Fevral ayı ərzində müxtəlif çeşidli süd məhsullarının laborator müayinələri aparılacaq. Bu siyahıya xama, yoqurt, qatıq, pendir və s. süd məhsulları daxildir”.