Onları tanıyırsınızmı?

Ölkənin ən ali postlarında söz sahibi olan keçmiş xanım nazirlərdən bəhs edib. İndi bu vəzifəni tutan xanımlarımız olmasa da, 2000-ci illərə qədər qadın nazirlərimiz olub.
Belə ki, indiyədək Azərbaycan tarixində cəmi 4 xanım nazir çalışıb.

Azərbaycanın ilk qadın naziri

İlk qadın xarici işlər nazirimiz Tahirə Tahirova 1913-cü il noyabr ayının 7-də Türkmənistanın Bayraməli vilayətində ziyalı ailəsində anadan olub. 1935-ci ildə Azərbaycan Sənaye İnstitutunu (AzSİ) bitirib. Neft sənayesi üzrə ali təhsil alan ilk azərbaycanlı qadın-mütəxəssis əmək fəaliyyətinə 1936-cı ildən elmi işçi kimi başlayıb, 1940-cı ildə isə Azərbaycan Neft Elmi-Tədqiqat İnstitutuna direktor təyin olunub. Böyük Vətən müharibəsi dövründə cəbhənin fasiləsiz neft təchizatına cavabdeh olub.
Yüksək postlarda çalışan T.Tahirova 1957 -ildə Azərbaycan SSR xarici işlər naziri vəzifəsinə təyin olunsa da, icrasına 1959-cu ildən başlayır və 1983-cü ildə nazirlik fəaliyyətinə son qoyur. SSRİ Ali Sovetinin (4-cü çağırış), Azərbaycan SSR Ali Sovetinin (3,5-7-ci çağırış) deputatı olub.
Həm xarici işlər, həm də təhsil naziri olmuş Elmira Qafarova
1983-cü ildən sonra Tahirə Tahirovanın ardınca həmcinsi Elmira Qafarova xarici işlər naziri postunu tutub. 1934-cü il martın 1-də Bakıda anadan olan eks-nazir Bakı Dövlət Universitetinin filologiya fakültəsini bitirib. Bir sıra yüksək vəzifələrdə çalışan Elmira Qafarova 1980-1983-cü illərdə Azərbaycan SSR maarif naziri olub.
1983-1987-ci illərdə Azərbaycan SSR xarici işlər naziri vəzifəsində çalışıb. 1987-1989-cu illərdə E.Qafarova Azərbaycan SSR Nazirlər Soveti sədrinin müavini vəzifəsində çalışıb, 1989-cu il dekabrın 30-da Gəncə şəhərinin adının bərpa olunması və 1990-cı il martın 13-də Azərbaycan xalqının milli bayramı olan "Novruz bayramı"nın rəsmən qeyd edilməsi haqqında fərmanlar imzalayıb.
1990-cı ilin may ayında Azərbaycan SSR Ali Sovetinin sədri seçilib və 1990-1992-ci illərdə bu vəzifədə çalışıb.
E.Qafarova dəfələrlə Azərbaycan SSR Ali Sovetinin deputatı seçilib.1993-cü il avqustun 1-də Bakı şəhərində vəfat edib, Fəxri Xiyabanda dəfn olunub.

Kreslosunu Fikrət Məmmədova verən xanım

Keçmiş ədliyyə naziri Südabə Həsənova 1947-ci ildə Şərurda anadan olub. Azərbaycan Dövlət Universitetinin hüquq fakultəsini bitirib.
1971-1973-cü illərdə Azərbaycan SSR Ədliyyə Nazirliyinin Məhkəmə Orqanları İdarəsində məsləhətçi işləyib.
S.Həsənova 1987-ci ilin aprel ayında Azərbaycan Respublikası ədliyyə nazirinin 1-ci müavini vəzifəsinə təyin olunsa da, 1998-ci il yanvar ayından 2000-ci ilədək ədliyyə naziri olub.
Prezidentin 2000-ci il 18 aprel tarixli fərmanı ilə Ali Məhkəməsinin sədri təyin edilib. 2005-ci ilin 19 aprelindən sədr vəzifəsindən azad edilib, Ali Məhkəmənin hakimi saxlanılıb.

Vaxtilə Mikayıl Cabbarovun yerini tutan Lidiya Rəsulova

Sabiq təhsil naziri Lidiya Rəsulova 1941-ci il dekabr ayının 4-də Bakı şəhərində anadan olub. Mirzə Fətəli Axundov adına Azərbaycan Pedaqoji Dillər İnstitutunda ali təhsil alıb. Keçmiş nazir 1981-1988-ci illərdə Azərbaycan Respublikası Həmkarlar İttifaqları Şurasının sədri, 1988-1992-ci illərdə Azərbaycanın sosial təminat naziri, Dövlət Elm və Texnika Komitəsi sədrinin müavini vəzifələrində çalışıb.

O, 1993-cü ildən etibarən Azərbaycan Respublikasının təhsil naziri işləyib. Səhhətində yaranmış problemlərlə əlaqədar 1997-ci ildə təhsil naziri vəzifəsindən azad olunub. Lidiya Rəsulova bir neçə çağırış SSRİ və Azərbaycan SSR Ali Sovetinin deputatı seçilib.
Tanınmış ictimai xadim, Prezidentin fərdi təqaüdçüsü Lidiya Rəsulova 2012-ci il fevralın 5-də 71 yaşında dünyasını dəyişib.

ELŞƏN