Bərdədə yaşayan Şirinovlar Yevlaxa qonaq gedir. Elə orda da ailənin üçüncü qızı dünyaya gəlir. Adını Aidə qoyurlar. O zaman heç ailəsinin də ağlına gəlməzdi ki, gələcəkdə Qarabağda ermənilər müharibə başladacaq və ailənin son beşiyi, ərköyün qızı Aidə əlinə silah alıb, vətən uğrunda gedən döyüşlərə qatılacaq.
Ailem.az-ın “Aslanın erkəyi, dişisi olmaz” layihəsinin budəfəki qonağı Qarabağ veteranı, adını Azərbaycan tarixinə ilk qadın komandir kimi yazmış, mayor Aidə Şirinovadır.

Şirinova Aidə Rəcəb qızı 1959-cu ildə anadan olub. Bərdə rayon 3 saylı orta məktəbi 1976-cu ildə bitirib, həmin il Azərbaycan Dövlət Bədən Tərbiyəsi İnstitutunun (indiki İdman Akademiyası) idman fakültəsinə qəbul olub. İdmanın bir çox növləriylə məşğul olan Aidə xanımın əsas ixtisası voleybol olub. İnstitutun yığma komandasında oynayıb. 1981-ci ildə institutu bitirib, Bərdədə Uşaq Gənclər İdman Məktəbində metodist müəllimə kimi işə başlayır. Uşaqlarla işləməyi sevdiyi üçün 1988-ci ildə öz istəyiylə şəhər iki saylı orta məktəbə idman müəlliməsi təyin olunur.

- Həmin il fevralından Dağlıq Qarabağda ermənilər mitinqlər keçirməyə başlamışdı. O vaxt Şuşa televiziyası vardı. Ermənilərin Ağdam və Əskərandan keçən avtobusları, avtomobilləri daş-qalaq etdiyini, insanlarımızın yaralanıb öldürülməsini televizordan izləyirdik. Hər axşam saat yeddidə televizorun qabağında ayaq üstə gözləyirdik ki, görək, bu gün Qarabağda ermənilər hansı hadisəni törədiblər.

1990-ci ildə Bakıda törədilən 20 Yanvar, ardınca Xocalı faciəsi A. Şirinovanın çoxdan bəri beynində gəzdirdiyi fikri qətiləşdirir. O, Qarabağ müharibəsinə getmək qərarına gəlir. Anası Tamara xanım və bacıları öz narazılıqlarını bildirsələr də, Aidənin uşaqlıqdan verdiyi sözün arxasında inadkarcasına dayandığını bildikləri üçün razılaşmaq məcburiyyətində qalırlar.

- Rəhmətlik anam deyirdi ki, küçəmizdə elə qonşu var, evində beş oğlu var, heç biri getmir, sən qız uşağı niyə gedirsən?! Evimizdən iki-üç kilometr aralıda hərbi hissə yaradılmışdı. Komandir güləş üzrə keçmiş SSRİ idman ustası, mənim uşaqlıq dostum Elçin Əliyeviydi. Mən qərarımı qətiləşdirib, hərbi hissəyə getdim. Orada məni çox yaxşı qarşıladılar, “elə sənə yaraşan da bu idi” deyərək, məni batalyona qəbul etdilər. Və mən səhəri gün Hərbi Komissarlığa gedib, hərbi biletimə möhür vurduraraq yenidən hərbi hissəyə zabit kimi göndərildim.

O, Bərdə Ərazi Müdafiə batalyonunda bir-iki ay əsgərlərin fiziki hazırlığı üzrə rəis, sonra əsgərlərin sosial müdafiəsi üzrə komandir müavini vəzifəsində çalışır.

- Döyüş yoldaşlarım mənə çox böyük hörmətlə yanaşırdılar. Onlar mənə "qaqa" deyə müraciət edirdilər. Çox vaxt istəmirdilər ki, mən ağır döyüşlərdə iştirak edim. Qorxurdular, birdən yaralanaram, əsir düşərəm. Bu, bir növ Azərbaycan kişisinin mənim simamda qadınlara verdiyi dəyəriydi. Lakin buna baxmayaraq, həmişə ən ağır döyüşlərdə onların yanında olub, mənəvi dəstək verməyə çalışırdım. Mən də onlar üçün narahat olurdum. İstəmirdim oğlanlarımıza nəsə olsun. Axı onlar bizim nəslimizin davamçılarıdır.

1993-cü ildə onu Şuşa polisinə dəvət edirlər. 94-ün martında Daxili İşlər naziri Vaqif Novruzov onu Ağdərəyə azyaşlılar üzrə baş əməliyyat müvəkkili vəzifəsinə təyin edir. 98-ci ildən sonra Qaradağ rayon Polis İdarəsinin Pasport Qeydiyyat Şöbəsində baş inspektor vəzifəsində 12 il işləyir. Hazırda Nəsimi rayon polis idarəsinin 21-ci polis bölməsində azyaşlılar üzrə inspektordu.

- Mən çox istəyirəm ki, polisdə qadınlar çox olsun. Saxlanılan insanların hamısı kişi deyil axı. Onların arasında qadın da olur. Bəzən o qadınlarla qadın kimi danışmaq, məsləhət vermək lazım olur. Bəzən o qadınların bir qadınla söhbət etməyə ehtiyacı olur. Bir dəfə mağazada müğənni Elnarə məni gördü və çox təəccübləndi: “A, Azərbaycanda da qadın polis var?”. Mənə çox qəribə gəldi ki, yəni indiyə qədər qadın polis görməyib?

“İnsan hər bir şeyi bacarmalıdı”

- Qadın, ya kişi fərqi yoxdur, insan hər bir şeyi bacarmalıdır. Boş vaxtlarımda ağaclara qulluq etməyi sevirəm. Şeir oxuyuram, mütaliə edirəm. Bugünlərdə vətənpərvər ruhda yazılmış “Ey Türk oğlu, qalx ayağa” adlı ilk şeir kitabım işıq üzü görüb.

Mayor xanımdan analara məsləhət

- Analarımız oğul övladlarını mərd, cəsur, qorxmaz, vətənə və cəmiyyətə layiqli bir şəxsiyyət kimi böyütsünlər, tərbiyə etsinlər. Çünki vətənimizin gələcəyi məhz belə övladların çiyinlərində yürüyəcək.