Bu fikri Diyarbəkirdən olan millət vəkili səsləndirib

Türkiyədəki 30 mart tarixli bələdiyyə seçkiləri bütün dünyada maraqla izlənir. Təbliğat prosesinin çox qızğın davam etməsi, opponentlərin bir-birinə qarşı kompromat savaşı açması seçkilərə xüsusi rəng qatır. Baş nazir Ərdoğan və Hizmət hərəkatının lideri Fətullah Gülən arasında aylardır davam edən müharibə artıq kulminasiya nöqtəsinə çatıb. Seçkiyə qısa müddət qaldığı üçün əsəblər tarıma çəkilib, rəqiblər əllərində olan son kartları sərf edirlər.
Seçki prosesinin yekunlaşmaq üzrə olduğu bir zamanda maraqlı açıqlamalardan biri də Diyarbəkirdən müstəqil millət vəkili Leyla Zana tərəfindən səsləndirilib. Batmanda BDP-nin seçki kompaniyasında iştirak edən Leyla Zana “30 Mart təkcə bələdiyyə seçkiləri deyil, eyni zamanda demokratik addımların birinci ayağıdır” deyərək xalqı səsvermədə aktiv olmağa səsləyib. Onun çıxışında diqqət çəkən əsas məqam isə Abdullah Öcalan ilə bağlı səsləndirdiyi fikirlər olub. “Milliyyət” qəzetinin verdiyi məlumata görə millət vəkili çıxışında Öcalana işarə edərək “önümüzdəki Novruzda aramızda olacaqdır” deyib. Daha sonra Leyla Zana “bu seçkilər Öcalanın əlinin daha da güclənməsi üçündür. Eyni zamanda siz əlinizi nə qədər gücləndirsəniz, o da Kürdüstan xalqları üçün çox dərindən çalışıb müzakirə masasından uğurla qalxar” deyərək kürd terroristin qısa müddətdə azadlığa çıxacağını vurğulayıb.
Xatırladaq ki, PKK terror təşkilatının lideri olan Abdullah Öcalan 1999-cu ildə Keniyanın paytaxtı Nayrobidə həbs olunaraq Türkiyəyə gətirilmiş və ömürlük həbsə məhkum olunmuşdur. İmralı adasında xüsusi həbsxanada saxlanılır. Guya kürdlərin azadlıq hərəkatına rəhbərlik etdiyi irəli sürülən Apo ləqəbli Öcalanın erməni olması ilə bağlı iddialar da var. Onun anasının 1915-ci il hadisələri zamanı bir türkmən ailəyə, atasının isə bir kürd ailəyə övladlığa verilən erməni olduqları iddia olunur. Öcalan 27 noyabr 1978-ci ildə milli təmayüllü marksist-leninist terror təşkilatı olan PKK-nı ( Kürdüstan Fəhlə Partiyası) yaradaraq Türkiyədə terrorizmin liderinə çevrilmişdir. Onun başlatdığı terror nəticəsində 1984-cü ildən indiyə kimi 50 minə yaxın insan həyatını itirmişdir.
NİCAT