Rayonun bütün mülkü kimlər tərəfindən talan edilir?

73 yaşlı rayon icra Şəmsəddin Xanbabayev yaxın zamanlarda vəzifəsi ilə vidalaşacağı günü gözləyir. Özü də bunu yaxşı bilən icra başçısı rayondakı büdcə təşkilatlarını başlı-başına buraxıb.
Xaçmazdan bu barədə redaksiyamıza daxil olan məlumata görə, bu idarə müdirlərinin korrupsiya maxinasiyalarına yaxşı fürsət verib. Son illər dövlət başçısı tərəfindən Xaçmaz rayonunun sosial inkşafı üçün ayrılan milyonlarla vəsait rayon mərkəzində və Xudat şəhərində parkların, xiyabanların, yolların, səkilərin, digər inzibati binaların təmirinə sərf olunur. Ancaq xərclənən vəsaitlərlə bərabər idarə müdirlərinin həyata keçirdiyi korrupsiya maxinasiyaları onları rayonda kiçik oliqarxlara çevirib.
Daxil olan məlumata əsasən, Xaçmaz rayonunda korrupsiya bataqlığına batmiş büdcə təşkilatları əsasən Şəmsəddin Xanbabayevə yaxınlığı ilə seçilən rayon Təhsil Mədəniyyət və Turizm, Səhiyyə və Suvarma Sistemləri İdarələridir. Bildirilir ki, son illər Xaçmaz Təhsil şöbəsinin müdiri Mədinə Nurməmmədova ilə bağlı mətbuatda silsiləli yazıların getməsinə baxmayaraq xanım şöbə müdiri rayon təhsilini öz bildiyi kimi idarə etməkdə davam edir. Hətta Mikayıl Cabbarovun Təhsil naziri vəzifəsinə gətirilməsi də Mədinə Nurməmmədovanın işində heç bir dəyişiklik yaratmayıb. Yəni xanım, təhsil şöbəsinin müdiri necə deyərlər öz bildiyini heç kimə vermir.
Qeyd edək ki, Xaçmaz Təhsil şöbəsinin nəzdində 100-dən çox məktəb var. Məlumata əsasən, rayon kəndlərində fəaliyyət göstərən orta məktəbləri şöbə müdiri özünün “vəsait silmə” obyektlərinə çevirib. Belə ki, kənd məktəblərinin əksəriyyətində siniflərin bir çoxunun sadəcə adları var və təhsil şöbəsinin müdirəsi direktorlarla əlbir olaraq onlarla müəllimlərin adına şişirdilmiş dərs saatları yazdıraraq hər ay büdcədən on min manatlarla vəsaitin mənimsənilməsinə yol açır.
Onuda qeyd edək ki, keçən il Xaçmaz Təhsil şöbəsinə 1,7 milyon manat vəsait ayrılıb. Bu vəsaitlərin bir hissəsi əsaslı təmirə, cari təmirə, maşın avadanlıqlarına, inventarlara, təsərrüfat mallarına, blankalara, müxtəlif işlərə xərclənib. Təhsil şöbəsinin xərclədiyi vəsaitlərlə bağlı apardığımız araşdırmada Mədinə Nurməmmədovanın dəftərxana ləvazimatlarına 100 min və bədii tərtibat, mədəni kütləvi tədbirlərin təşkili xidmətləri üçün 120 min manat xərcləməsi isə çox qaranlıq məqamlardan biri olaraq görünür. Çünki, bu rəqəmə baxıldığı zaman ən səriştəsiz adama belə məlum olur ki, Mədinə Nurməmmədova dəftərxana ləvazimatları alarkən qiymətləri ən azı on dəfə şişirdib. Bunun isə dövlət vəsaitini mənimsəməkdən başqa adının olmaması da hər kəsə bəllidir.
Məlumatlı mənbə idda edir ki, icra başçısı Şəmsəddin Xanbabayevin ən yaxın adamlarından olan Mədinə Nurməmmədovanın rayon təhsil şöbəsindən təkcə özünün aylıq qazancı 20 min manatdan artıqdır. Digərlərinin, yəni icra başçısının, müavinin, Təhsil Nazirliyindəki bəzi vəzifəli şəxslərin və direktorların qazanclarını da əlavə edərsək hər ay yüz min manatdan artıq dövlət vəsaitinin mənimsənildiyi qeyd olunur.
Xaçmazda korrupsiya bataqlığında çabalayan ikinci büdcə təşkilatı isə rayon Səhiyyə İdarəsidir. Qeyd edək ki, Xaçmaz rayon Səhiyyə İdarəsinin nəzdində 2 şəhər, bir neçə kənd xəstəxanası və 60-a yaxın həkim tibb məntəqəsi var. Məlumatda göstərilir ki, rayon səhiyyə idarəsinə rəhbərlik edən Səyyaf Tağıyevin əsas qazanc mənbəyi kəndlərdə fəaliyyət göstərən həkim tibb məntəqələridir. Belə ki, baş həkim tibb məntəqə rəisləri ilə əlbir olaraq dövlətdən ayrılan vəsaitləri bu qurumların əli ilə silərək mənimsəyir. Bundan başqa baş həkim hər bir tibb məntəqəsində 3-4 ölü can saxlayır. Yəni Səyyaf Tağıyev adı olub özü olmayan 200-dən artıq insanın maaşını hər ay alır. Bu isə külli miqdarda vəsait edir.
Qeyd edək ki, keçən il Xaçmaz səhiyyə idarəsinə cari təmir, dəftərxana ləvazimatları, blanklar, maşın avadanlıqları, əsaslı təmir işləri üçün 800 min, dərman pereparatları üçün isə 400 min manata yaxın vəsait ayrılıb. Həmin vəsaitin böyük hissəsi ayrı-ayrı firmalara köçürülərək mənimsənildiyi qeyd olunur. Xaçmazda həmçinin, baş həkimin bir neçə aptekinin fəaliyyət göstərdiyi və bu apteklərdə əsasən dövlətin Xaçmaz rayonuna ayırdığı dərman pereparatlarının satıldığı bildirilir.
Xaçmazdan daxil olan məlumata əsasən, Xaçmazda imkanlı məmurlardan biri də rayonun Mədəniyyət və Turizm şöbəsinin müdiri Nazim Ağayevdir. Rayon Mədəniyyət və Turizm şöbəsinin nəzdində 13 mədəniyyət evi, 44 klub, 102 kitabxana, 3 musiqi məktəbi, bir neçə muzey, mədəniyyət və istirahət parkları var. Qeyd edək ki, keçən il rayon mədəniyyət idarəsinə 500 min manatdan çox vəsait ayrılıb. Bu vəsaitlər isə müxtəlif avadanlıqlar, dəftərxana, maşın ehtiyat hissələri və cari təmirlərə xərclənib. Adı çəkilən şöbənin 600-dən çox işçisi var.
Nazim Ağayevin əsas qazancı kitabxanalarda və mədəniyyət evlərində, klublarda işləyən işçilərinin əmək haqqlarından hər ay 10 manat saxlamasıdır. Bundan başqa, kənd kitabxanalarında işləyən işçilərin adına yazılan əmək haqqları da şöbə müdirinə çatır. Mənbəmiz qeyd edir ki, şöbə müdiri musiqi məktəblərinin direktorlarından ayda 1000 manat haqq da alır. Bildirilir ki, Xaçmaz rayon Mədəniyyət və Turizm şöbəsində hər il mədəniyyət evlərinin, kitabxanaların, istirahət parklarının cari təmiri adı altında külli miqdarda vəsait mənimsənilir. Nazim Ağayevin idarədə saxldığı “ölü can”lardan isə hər ay minimum 10 min manata qədər vəsait əldə etdiyi qeyd olunur.
Xaçmazın ən varlı mini oliqarxlarından biri isə Suvarma Sistemləri İdarəsinin müdiri Vaqif Səlimov hesab olunur. Rayonda ən varlı məmurlardan biri kimi tanınan və Xaçmazın bütün su məsələlərinə baxan Vaqif Səlimovun il boyu büdcə vəsaitlərini çapıb-taladığı qeyd olunur. Məhz buna görə də, idarə müdirinin Xaçmazda və paytaxt Bakıda dəbdəbəli evləri, obyektləri, avtomobilləri var. Qeyd edək ki, Xaçmaz Suvarma Sistemləri idarəsinin müdiri Vaqif Səlimovun həyata keçirdiyi maxinasiyalarla bağlı redaksiyamıza göndərilən məlumatlar dəqiqləşdirildikdən sonra oxucularımıza təqdim edəcəyik. Yazıda adı keçən şəxslərin və qurumların mövqeyini dərc etməyə hazırıq…
KƏRİM