İsrail XİN rəhbəri Azərbaycan ilə İsrail arasında münasibətlərin yüksək səviyyədə olduğunu bildirib

Azərbaycanda müxtəlif dinlərin və millətlərin nümayəndələri sülh, qarşılıqlı hörmət və həmrəylik şəraitində yaşayırlar. Əsrlər boyu Azərbaycanda yaşayan yəhudilər də bu ölkədə özlərini öz vətənlərindəki kimi hiss edirlər. Azərbaycan dünyada nadir tolerantlıq nümunəsidir.
Bu sözləri Azərbaycanda rəsmi səfərdə olan İsrail Dövlətinin xarici işlər naziri Aviqdor Liberman mayın 1-də keçirdiyi mətbuat konfransında deyib.
Nazir Azərbaycan ilə İsrail arasında münasibətlərin yüksək səviyyədə olduğunu bildirib. A.Liberman qeyd edib ki, səfər zamanı Bakıda keçirdiyi görüşlərdə ölkələrimiz arasında müxtəlif sahələrdə əlaqələrin daha da inkişaf etdirilməsi ilə bağlı səmərəli müzakirələr aparılıb. Xüsusilə energetika, kənd təsərrüfatı sahələrində əməkdaşlığın gələcəkdə genişləndirilməsi imkanları diqqət mərkəzində olub.