İsrailin xarici işlər nazirinin istəkləri nə olacaq

İsrailin xarici işlər naziri Aviqdor Liberman yaxın günlərdə Bakıya rəsmi səfər edəcək. Bu barədə İsrail Xarici İşlər Nazirliyindəki yüksək rütbəli mənbə “Vestnik Kavkaza” portalı ilə əməkdaşlıq edən israilli jurnalist Petr Lyukimsona bildirib.
Mənbə deyib ki, Liberman geniş tərkibli nümayəndə heyətinin müşayiəti ilə aprelin 30-da Bakıya yola düşəcək: “Əgər hansısa fövqəladə hadisə baş verməsə...”
İsrail XİN-in əməkdaşı bildirib ki, səfərin yekun proqramı hələ işlənilir, ancaq indidən məlumdur ki, Liberman Bakıda prezident İlham Əliyevlə və Azərbaycan dövlətinin rəhbərliyində yer alan digər şəxslərlə görüşəcək. Tərəflər İsraillə Azərbaycan arasında kənd təsərrüfatı, səhiyyə, yüksək texnologiyalar, müdafiə sənayesi və iki ölkə arasında gediş-gəlişin asanlaşdırılması məsələlərini müzakirə edəcəklər. “Şübhə yoxdur ki, danışıqlar zamanı beynəlxalq problemlərə, o cümlədən İsrail-Fələstin danışıqlarındakı vəziyyət, Fələstin tərəfinin beynəlxalq arenada birtərəfli addımları və İsrailin ona reaksiyası da müzakirə ediləcək”, - deyə mənbə əlavə edib.
Səfər Libermanın “çoxvektorlu xarici siyasət” xəttinə uyğundur. İsrail xarici işlər naziri bir sıra müsəlman ölkələri, habelə Rusiya və Şərqi Avropa ölkələri ilə əməkdaşlığın genişləndirilməsi xəttini yürüdür. İsraildə deyirlər ki, Libermanın Azərbaycan prezidenti İlham Əliyevlə bundan əvvəlki bütün görüşləri həmişə iki ölkə arasında münasibətlərin inkişafına güclü impuls verib.
İsrail xarici işlər nazirinin Bakıya gözlənilən gəlişi həm də bu aspektdən diqqəti cəlb edir ki, bu səfər Azərbaycan prezidentinin İrana uzun fasilədən sonra ilk səfərinin ardınca baş verəcək. Belə ki, Azərbaycanın İsraillə getdikcə güclənən tərəfdaşlıq münasibətləri həmişə İranda qəzəb doğurub və bu məsələ Tehran-Bakı münasibətlərinin gərginləşməsinin əsas səbəblərindən biri olaraq qalıb. Tehran Bakını ittiham edirdi ki, Azərbaycan İsrailin İran əleyhinə kəşfiyyat-diversiya fəaliyyətlərinə şərait yaradır. İranda yeni prezidentin-Həsən Ruhaninin seçilməsindən sonra bu ritorika nəzərə çarpmır və Tehran Azərbaycanla da münasibətlərində uzun müddətdir hökm sürən gərginliyi yumşaltmağa səy göstərir. Görünür bunun nəticəsi idi ki, Azərbaycan prezidentinin 2009-cu ildən bəri İrana səfəri mümkün oldu. Ancaq Azərbaycan prezidentinin İrana səfərinin ardınca İsrailin xarici işlər nazirinin Bakıya səfər edəcəyinin elan olunması bunu təsdiq edir ki, rəsmi Bakı İsraillə tərəfdaşlığını İranla münasibətləri yaxşılaşdırmağa qurban vermək niyyətində deyil. Azərbaycana yüksək texnologiyalara əsaslanan milyardlarla dollarlıq silah və hərbi texnika satan, təhlükəsizlik və İrandan qaynaqlanan terror təhdidlərinin qarşısının alınmasına dəstək verən İsraillə güclü tərəfdaşlıq münasibətlərini bundan sonra da saxlamaq niyyətindədir.
Eyni zamanda Azərbaycan cənub qonşusu İran və onun qatı düşməni İsraillə olan münasibətlərini də effektiv şəkildə balanslaşdıra, bu münasibətlərin digər tərəfə qarşı yönəlmədiyinə təminat verə bilir. Xatırladaq ki, Azərbaycan prezidenti bu ilin yanvarında Davos forumunda İsrail prezidenti Şimon Peres və baş nazir Benyamin Netanyahu ilə görüşüb. Habelə, Azərbaycan hökumətinin üzvlərinin İsrailə səfərləri olub.
Aydın