Qazaxın Orta Salahlı kəndini “ortada” qoyanlar

Orta Salahlı kəndi Qazaxın qədim kəndlərindəndir. 900 nəfər seçicisi, 1600 nəfər sakini olan kənd, demək olar ki, gözdən uzaq, könüldən qıraq düşüb. İqtisadi inkişaf proqramına nəzər yetirəndə görürsən ki, ucqar dağ kəndlərində yol, qaz, su probleminin həlli üçün xeyli iş görülməkdədir. Amma Qazaxdan görünən Orta Salahlı kəndi tamam yaddan çıxıbdır. Hələ də kənd sakinləri içməli suyu pulla alırlar. Suvarma suyundan isə danışmağa dəyməz. Onun sayəsidir ki, kənd sakinlərinin torpaqdan əli soyuyub. 840 hektar torpaq sahəsi kənd əhalisinin öhdəsinə verilmişdir. Həmin 840 hektarın 355 hektarı suvarılan sahə olsa da, illərdir su üzünə həsrət qalıb. Ona görə heç kim pay torpağını əkib becərmək istəmir.
Adının çəkilməsini istəməyən kənd sakini söylədi ki, “xeyli vaxtdır kəndin rəhbər sarıdan bəxti gətirmir. Elələrini kəndə rəhbər təyin edirlər ki, adamlar problemlərini söyləməyə belə arlanırlar. Məsələn, Vidadi Niyazəliyev yaxşı rəngsaz idi. Qapısında iş gördürənlər onun hazırda kəndin icra nümayəndəsi olmasına baxmayaraq, bu gün də Vidadinin əl işindən danışırlar. Vəzifə tərəzisinə daş atmayan bu adamın icra nümayəndəsi olması kiminsə yuxuda armud görməsi kimi bir şeydir. Bunun nəticəsidir ki, ona müraciət edənlərlə Vidadi kişi müştəri kimi davranır. Əlbəttə ki, Vidadi kimilərinin qəfildən kənd icra nümayəndəsi təyin edilməsi problemli kəndimizdə problemlər yaratmaqdadır. İşi-gücü “qaz vurub qazan doldurmaqdır”.
Odur ki, Orta Salahlı kəndində olub söylənilənlərin doğru olub olmadığını bilmək üçün həmin kəndə üz tutduq. Kənd icra nümayəndəliyinin binasına yaxınlaşanda hiss etdim ki, vəziyyət daha acınacaqlıdır. Nümayəndəliyi və bələdiyyə binasını qalın tikan kolları basmışdı. Binanın qarşısında qoyulmuş xalq şairi Səməd Vurğunun büstü baxımsızlıqdan pis görkəm almışdı. Vaxtilə Böyük Vətən Müharibəsində həlak olanların xatirəsinə ucaldılmış abidə qeyri vətənpərvərlikdən xəbər verir. Səhər saat 11: 00 olmasına baxmayaraq nə bələdiyyə sədri, nə də icra nümayəndəsi iş yerinə gəlməmişdi. Sən demə, bizi idarənin həyətində görən kənd rəhbərləri məktəbin həyətində gizləniblərmiş. Nəhayət, Vidadi Niyazəliyevlə görüşəcəyimizi başqa vaxta keçirdik. Onunla 1 aydan sonra görüşə bildik. İlk öncə idarə binasına, Səməd Vurğunun büstünə və xatirə abidəsinə biganəliyini soruşduq. V. Niyazəliyev bildirdi ki, “vəsait yoxdur. Bələdiyyə sədri Südabə Alıyeva müstəqil bazar açıb. Məni eşitmir və saymır”. Nə isə, fürsət tapıb 2-ci sual ünvanladıq ki, deyirlər 250 hektar taxıl əkilməsini göstərsəniz də o qədər taxıl əkilməyib? Elə bil Niyazəliyevin yarasının qaysağı qopdu. “Gedin, onu Qazax İHB-dan soruşun. Bizlik nə var? Təzyiq altında çox şeylərə imza atmışıq. Vallah, işləniləsi deyil. Suriyaya döyüşə getmək bundan yaxşıdır. Verdiyimi çıxardan kimi ərizə verib işdən çıxacağam”.
Belə başa düşdük ki, 700 hektara yaxın taxıl sahəsini V. Niyazəliyev ona görə 250 hektara çatdırıb ki, xeyli məbləğdə subsidiyanı mənibsəyib aradan çıxsın. “Perepiska” əməliyyatı Vidadinin də canına hopub.
Çox cəhd etdik ki, Vidadinin söylədiyi Südabə Alıyevanın müstəqil bazarı haqqında məlumatlanaq. Amma dedilər ki, “təhsilli bələdiyyə sədrinin başqa vacib işləri olduğuna görə bir neçə gün işdə olmayacaq. Yəqin ki, bizi düşündürən suallara Südabə Alıyevanın özü cavab versə, daha məqsədəuyğun olar. Nə deyək, bələdiyyə sədrinin vaxtı az olsa da, bizim səbrimiz çoxdur.
Vəkil RÜSTƏM