Filialın direktoru həmçinin Masallıda “sələmçilər patronu” kimi tanınır

“Aqrolizinq” ASC Masallı filialının direktoru Eldar Hüseynov dövlət tərəfindən güzəştli qiymətlərlə ayrılan mineral gübrələri ayrı-ayrı şəxslərin adına yazdıraraq qara bazarda satdırır və bundan külli miqdarda qanunsuz vəsait əldə edir.
Bu barədə Masallıdan daxil olan məlumatda bildirilir ki, “Aqrolizinq” ASC rayon filialının direktoru Eldar Hüseynov icra başçısı Rafil Hüseynovla birləşərək dövlət tərəfindən kənd təsərrüfatı ilə məşğul olan vətəndaşlara verilən fosfor gübrəsini mənimsəyib. Məlumatda göstərilir ki, Masallı rayonunda 25 min hektara yaxın əkinə yararlı sahə var və 2013-cü ilin statistikasına görə rayonda 15 min hektara yaxın sahə əkilib. Sahələrin 11 min hektardan çoxunda dənli bitkilər əkildiyi göstərilir.
Xəbərlərə əsasən, oktyabr ayı üçün torpaqlara veriləcək fosfor gübrəsi ümumiyyətcə vətəndaşlara verilməyib və rayon “Aqrolizinq” filialının direktoru icra başçısı Rafil Hüseynova arxalanaraq gübrənin verilməsini saxta sənədlər əsasında müxtəlif şəxslərin adına yazaraq mənimsəyib. Bildirilir ki, icra başçısı ilə «qazancını» bölüşən Eldar Hüseynovla bu üzdən də heç kimdən və heç nədən çəkinmədən güzəştli qiymətlərlə vətəndaşlara veriləcək olan mineral gübrələri qara bazarda satdırır. Bu zaman isə sənədlərdə minlərlə insana güzəştli qiymətlə mineral gübrə satıldığı göstərilir. Məlumata əsasən, həmin sənədlərdəki imzalar saxtadır və faktiki olaraq vətəndaşların böyük əksəriyyəti Eldar Hüseynovun bu maxinasiyalarından xəbərsizdir. Məlumatda qeyd olunur ki, gübrə tələb edən vətəndaşlara Eldar Hüseynov bildirir ki, bu il gübrə həddindən artıq az ayrılıb. Ona görə də çatışmamazlıq var.
Qeyd edək ki, qəzetimizdə 1 ay öncə Masallıda əkinlə məşğul olan vətəndalara dövlət tərəfindən verilən azot gübrələrini Eldar Hüseynov tərəfindən şəxsi malı kimi satması ilə bağlı məlumat vermişdi. Həmin məlumatdan sonra “Aqrolizinq” ASC Masallı filialının direktoru mətbuata açıqlama verərək məlumatı “yalanlamış” və bildirmişdi ki, il ərzində filliala cəmi 100 ton azot gübrəsi verilib. Halbuki “Aqrolizinq” ASC sədri Əli Bayramov hər dəfə mətbuata açıqlamasında qeyd edir ki, rayonlarda əkinçiliklə məşğul olan vətəndaşlarımız lazımi qədər azot və digər gübrə məhsulları ilə təmin edilir.
Son illər hüquq-mühafizə orqanları tərəfindən bir çox rayonlarda filial direktorlarının vətəndaşlara verilən gübrələri, mineral dərmanları mənimsənilməsi ilə bağlı həbslər həyata keçirməsi əslində “Aqrolizinq” ASC sədrinin verdiyi açıqlama ilə üst üstə düşür. Yəni dövlət tərəfindən rayonlardakı “Aqrolizinq” filiallarına azot gübrələri və müxtəlif dərman preparatları lazımi qədər verilir. Qeyd edək ki, dövlət 1 hektar əkin sahəsinə 100 kq azot gübrəsi verir və kəndlilər gübrəninin qiymətinin 50 faizini ödəyirlər. Ancaq harınlamış, icra başçılarının “moronetkasına” çevrilmiş filial direktorları bu gübrələri mənimsəyərək il boyu dövlətdən milyonlarla manat vəsait oğurlayırlar.
Daxil olan məlumatda göstərilir ki, Masallıda sakinlər oktyabr ayında verilməli olan fosfor gübrəsini almayıb. Alanlar isə qara bazardan alıb öz əkin sahələrini gübrə ilə təmin ediblər. Bunun müqabilində isə “Aqrolizinq” ASC Masallı filialının direktoru Eldar Hüseynov özünə məxsus olan 600 hektar torpaq sahəsinə gübrə səpib və təbii ki, həmin gübrə Eldar Hüseynova havayı başa gəlib.
Daxil olan məlumatda iddia olunur ki, fosfor gübrəsinin qara bazarda satışından Eldar Hüseynov ötən il 200 min manat xalis gəlir əldə edib və bu gəlirin üçdə bir hissəsi filial direktorunun şəxsi kassasına daxil olub. Əldə olunan qanunsuz gəlirin üçdə iki hissəsi isə Masallının icra başçısı Rafil Hüseynova və “Aqrolizinq” ASC-nin rəhbərliyinə satdırılıb.
Məlumatda həmçinin xüsusi olaraq qeyd olunur ki, Eldar Hüseynov Masallıda faizlə pul buraxan sələmçilərin «patronu» kimi tanınınr. Belə ki, filial direktoru dövlətə köçürüləcək vəsaitləri bir müddət sələmçilərə faizlə verərək yaxşı gəlir əldə edir.
Qarşı tərəfin mövqeyini dərc etməyə hazırıq…
Z.Bağırov