Xaləddin İsgəndərov icra başçısı təyin
olunandan sonra rayonun problemləri daha da artıb

Binəqədi rayonu “əsaslı” şəkildə yenidən qurulur. Əsaslı sözünü ona görə dırnaq içində (ironiya ilə - R.D) ona görə yazdıq ki, rayonun ən gözəgəlimli yerləri üzlənilir, könüldən uzaq ünvanlar isə illərdir heç kimi yadına düşmür...

İki ilə üç təmir...


Başlayaq Binəqədinin girişindən. Rayonda ən böyük tikinti-quruculuq işlərindən biri də Heydər Əliyevin adına olan parkda gedir. Rəsulzadə qəsəbəsində yerləşən bu park 2001-ci ildə salınıb. Hazırda Samuxun icra başçısı olan Alı Qocayev bu rayonun başçısı olan zaman parkı bir dəfə əsaslı təmir etdirib. Belə ki, 2010-cu ilin dekabrından yenidənqurma işlərinə başlanılıb və 2011-ci ilin sonlarında istifadəsi nəzərdə tutulmuşdu. Tikinti işləriylə İlham Əliyev də maraqlanıb. Deyilənlər kimi də oldu və bir ildən sonra, yəni 2011-ci ilin sonlarında park rayon sakinlərinin ixtiyarına verildi. Ancaq az keçmədi ki, yenidən təmirə dayandırıldı. Sonuncu dəfə istifadəyə veriləndə parkın giriş qapısı 10 sütundan ibarət olub ki, hündürlüyü 12,5 metr, uzunluğu isə 80 metr idi. Bundan əlavə, girişdə 25 metr hündülükdə bayraq dirəyi ucaldılıb. Ötən ilin aprel ayında Binəqədiyə icra başçısı təyin edilən Xaləddin İsgəndərov parkın dizaynına “bir az” əl gəzdirməyi əmr edib. Parkda əsaslı təmir və yenidənqurma işləri, demək olar, tamamlanandan sonra icra başçısı görülən işlərlə tanış olmaq üçün əraziyə baş çəkib və işin nəticələrindən razı qalmayaraq, sökmək göstərişini verib. Hətta 10 sütunluq giriş qapısına da əlvida deyilib və parkda əkmək üçün gətirilən güllər sonradan geri qaytarılıb.
Beləliklə, son iki ildə park üç dəfə təmir edilib ki, bunun üçün də 4 milyon manatdan artıq vəsait xərclənib. Artıq 6 aydır ki, park üçüncü dəfədir ki, təmir edilir, ancaq iki ildə olsun buranın sakinləri parkdan istifadə edə bilməyiblər. Aylarla davam edən “tikinti-quruculuq” işləri Binəqədi əhlini başqa yerlərdə istirahət etməyə, uşaqlarını ayrı-ayrı ünvanlarda yerləşən parklarda əyləndirməyə məhkum olublar.

Deputatın necə seçildiyini bilmək istəyən binəqədililər


Rayonunun kənd istiqamətinə doğru irəlilədikcə hər yüz metrdən bir ərazilər binəqədililər ad qoyub. “Çentralnıy”, “Tretiy”, “Köhnə zapravka” kimi adlanan ünvanlar ən məhşurlardır. “Tretiy”ə çatmamış iki yol ayrıcında Heydər Əliyevin porterti həkk olunmuş divar var. Və bu ərazilər sözün əsl mənasında ciddi şəkildə təmir olunur, xüsusən yolun kənar hissələri. Neft quyularının gətirdiyi çirkabları örtmək üçün yolun kənarları hasarlanır, bahalı daşlar bu divarlara hörülür. Çəkilən bu hasarlar Novxanıya kimi qədər gedib çıxır. Deməli, bu tikinti işləri Binəqədinin abadlaşdırılması üçün yox, oliqarxların Novxanıya gedən istiqamət üzrə hər yerin təmir olunmsı anlamına gəlir. Məlumatlara görə, Binəqədidən başlanan yolun kənarlarının hasarladılması dövlət büdcəsinə 8 milyon manata başa gəlib.
Əvvəlcə bu ərazilərdə tikinti işləri gedəndə sakinlərə rayona İlham Əliyevin gəlişinin gözlənildiyi deyilmişdi. Ancaq sonradan məlum oldu ki, ölkə başçısının Binəqədiyə gəlməsi ümumiyyətlə planda yox imiş.
Rayonun kəndlərinin giriş hissəsində sakinlərin su problemi olmasa da, irəliyə doğru hərəkət etdikcə məsələ qəlizləşir.
Ancaq belə bir problemin kəndin mərkəzində yaşayan deputat Hacı Madər Musayev üçün yoxdur. Çünki deputat yaşadığı villasına böyük bir su turbası çəkdirib. Qonşuluğunda yaşayan kasıb sakinlərin mənzillərinə plastik borularla su verilir, o da gündə bir dəfə. Əvvəllər problemləriylə bağlı bir neçə dəfə deputatlarına müraciət ediblər. Ancaq Hacı Madərdən heç bir cavab gəlmədiyi üçün daha heç kim ona üz tutmur. Su problemiylə maraqlanarkən sakinlərin maraqlı söhbətinə qulaq olduq. Camaat heç bir problemlərini həll etməyən, onların sözünü Milli Məclisin tribunasından səsləndirməyən, bircə dəfə də olsun seçicilərlə görüşməyən deputatın 4 dəfə necə seçildiyini anlaya bilmədiklərini söylədilər.

“Yaddan çıxan” kanalizasiya sistemi


Rayonun yollarında da problem var. Belə ki, şəhərdən kəndə gedən üç kilometrlik yol bir neçə dəfə təmir olunsa da sürücülərin problemini həll etmir. Belə ki, yola hər dəfə asfalt çəkilərkən ora kanalizasiya sisteminin quraşdırılması “yaddan çıxıb”. Buna görə də azca yağış yağan kimi asfaltda iri nohurlar əmələ gəlir. Bu isə tıxacların yaranmasın, həm də qəzalara gətirib çıxarır.
“Baksol yolu” deyilən ərazidə avtomobil yolu da bərdad haldadır. Yol dağıldığına görə də tıxac yaranır. Elə vaxt olur ki, burada sürücülər saatlarla tıxacda qalmalı olurlar. Yolun bərbad olması, tıxacların yaranması DYP əməkdaşlarına da sipər çəkib. Çünki tıxac dağıtmaq üçün ən çox əziyyəti elə polislər çəkir.
Binəqədi rayon İcra Hakimiyyəti problemli yolların İcra Hakimiyyətinin yox, “Azəryolservis” ASC-nin tabeçiliyində olduğunu bildirərək məsələnin həllindən boyun qaçırdırlar.

Ev tikmək üçün nə qədər ödəməlisən?


Rayonda olarkən məlum oldu ki, Binəqədinin ən bərbad ünvanı “Binəqədi şossesi” kimi adlanan ərazidir. “Zəngəzur” restoranın yaxınlığında yerləşən bu yaşayış massivində 2000 dən çox ailə yaşayır. Problem isə camaat özlərinə bir-iki otaqlı mənzil tikəndən bir müddət sonra buldozein ağzına verilərək sökülməsidir. Burada yaşayan ailələrin əksəriyyəti Rusiyaya və başqa ölkələrə pul qazanmaq üçün üz tutduqlarına görə evlərin çoxunda heç kim yaşamır. İldə bir-iki dəfə vətənə qayıdan binəqədililər yarıtıikilmiş mənzillərini tikib başa çatdırmaq istəyəndə fərqli mənzərə ilə qarşılaşırlar. Ya onlar yenidən pul verməli, ya da tikdiyi balaca tikiliyə əlvida deməlidir.
Çünki buradakı evlərin heç birinin “kupça”sı yoxdur. Ancaq icra nümayəndəliyindən, bələdiyyənin icazə kağızı, layihə sənədləri qaydasındadır. Dəfələrlə mənzil sahibləri qeydiyyata düşmək üçün aidiyyəti qurumlara müraciət ediblər. Ancaq heç bir faydası olmayıb. Yaşayış massivində su, işıq, qaz xətləri var: “Hətta bu yaxınlar da qaz sayğaclarını dəyişdirdilər. Yeni “smartkart”lar quraşdırıldı. Sadəcə bizim kanalizasiya problemimiz var. Xaləddin İsgəndərov Binəqədiyə icra başçısı təyin olunanda bura gələrək sakinlərlə görüşdü. Camaatın qarşısında çıxış edərək söz verdi ki, “Eurovision” musiqi yarışmasından sonra bura kanalizasiya xətləri də çəkiləcək. Musiqi yarışması bitəndən sonra kanalizasiya sistemi çəkilmədi, əvəzində onlara evə hücum edib sökdülər”.
Deyilənlərə görə, sözügedən ünvanda torpağın bir sotu 3-15 min manat arasında dəyişir. Bələdiyyə bütün torpaqları satıb. Kimsə torpaq almaq üçün fərdlərə yaxınlaşmalıdır. Ev tikmək üçün icra nümayəndəliyinə 500, sahə müvəkkilinə 200-300 manat ödəyiblər. Alı Qocayevin vaxtında ev tikmək üçün 1000-2000 manata ev tikmək icazə almaq mümkün idisə, indi bu rəqəm 5000 qaldırılıb. Bələdiyyə torpaqları satandan sonra da burada tikili ucaltmaq üçün onlardan da icazə almaq lazımdır. Qiymətlər qaraja 300, ev üçün 1000-1500 manat dəyərləndirilib. Sakinlərin sözlərinə görə, Xaləddin İsgəndərov icra başçısı təyin olunandan sonra problemləri daha artıb.

***

Binəqədidə olarkən məlum oldu ki, buranın sakinləri icra başçısı dəyişdiriləndə sevinirlər. Ancaq çox keçmir ki, yeni gələn başçı köhnənin atasına rəhmət qazandırır. Necə ki, Xaləddin İsgəndərov Alı Qocayev üçün etdirir, bax elə...
Ramin DEKO