İnsan Alverinə Qarşı Mübarizə İdarəsi və Xətai RPİ-nin rəhbərliyi əxlaqsızlıq yuvasının fəaliyyətinə dərhal xitam verməlidir
Firuz Haşımov: ««Esmiralda» masaj salonunun yerlə-yeksan edilməsini istəyirəm»
gundemxeber.az - Daxiliİşlər Nazirliyinin (DİN) İnsan Alverinə QarşıMübarizə İdarəsinin və aidiyyəti polis idarələrinin əməkdaşları tərəfindən əxlaqsızlıq yuvalarına qarşı mübarizə tədbirlərinin aparılmasına baxmayaraq, qadın ticarəti ilə məşğul olan dəstələr öz çirkin niyyətlərindən əl çəkmirlər. Son vaxtlar müxtəlif adlar altında fəaliyyət göstərən masaj salonlarının sayının artması yüngül həyat tərzi keçirən qadınların işinə yarayıb və onlar bu salonlara üz tutaraq müştərilərə seksual xidmət göstərirlər.

Paytaxtda təkcə Çin, tay masaj salonları deyil, həm də azərbaycanlıların işlətdiyi masaj salonları var ki, burda milli-mənəvi dəyərlərimizin məhv edilməsi istiqamətində iş aparılır. Amma müalicəvi bir prosedur olan masaj tibbi personal tərəfindən deyil, adi insanlar tərəfindən aparılır. Halbuki, masaj — xəstə və yorğun bir orqanın yenidən əvvəlki durumuna qaytarılması üçün orqanizm üzərində tətbiq edilən müalicə nümunəsidir. Günbəgün çoxalan və lisenziyasız fəaliyyət göstərən masaj salonlarına heç bir nəzarət yoxdur. Ekspertlər həyəcan təbili çalaraq paytaxtda yerləşən bir sıra masaj salonlarında yetkinlik yaşına çatmayan qızların seksual xidmətlər göstərdiyini söyləyirlər. Bu cür salonlara nəzarətin vacibliyini vurğulayan tibb elmləri doktoru, professor Adil Qeybulla bildirib ki, xarici ölkələrdə masaj salonlarına ciddi dövlət nəzarəti var: «Azərbaycanda da həm qeyri-millətdən olanların, həm də azərbaycanlıların açdığı masaj salonlarında mütəmadi yoxlamalar aparılmalıdır. Təəssüf ki, belə yoxlamalar aparılmır. Paytaxtın ən mərkəz yerlərində açıq-aşkar fəaliyyət göstərən masaj salonlarının heç birinə nəzarət edilmir”. Səhiyyə və Sağlam Həyat İctimai Birliyinin rəhbəri Lətafət Əlizadə isə bildirib ki, masaj salonları Səhiyyə Nazirliyi tərəfindən nəzarətə götürülməlidir. Səhiyyə Nazirliyinin mətbuat xidmətinin rəhbəri Anar Qədirlinin sözlərinə görə isə masaj salonlarına Səhiyyə Nazirliyi nəzarət etmir: «Nazirlik heç bir masaj salonunu lisenziyalaşdırmır. Əgər həmin salonlarda tibbi xidmət göstərilmirsə, ona lisenziya verilmir. Əgər onlar sırf masajla məşğul olursa, bu başqa məsələ». İş orasındadır ki, bu gün masaj salonu adı atında fəaliyyət göstərən obyektlərin demək olar ki, heç birində sırf tibbi xidmətlər göstərilmir.



Müəyyən qrupların nəzarəti altında fəaliyyət göstərən masaj salonlarının əksəriyyəti əxlaqsızlıq yuvalarına çevrilib. Xatırladaq ki, qəzetimizin əvvəlki saylarından birində Bakının Xətai rayonu, Qaçaq Nəbi küçəsində yaşayış binasının zirzəmisində yerləşən «Esmiralda» masaj salonu ilə bağlı məlumat vermişdik. Bildirmişdik ki, adıçəkilən masaj salonunda yetkinlik yaşına çatmayan qızlar müştərilərə intim xidmətlər təklif edirlər. Dünən redaksiyamıza telefon zəngi açan və özünü salonun rəhbəri kimi təqdim edən Əsmər adlı birisi səs tonunu ucaldaraq yazılan məqaləyə görə qəzeti bağlatdıracağını deyib. Hərənin öz səviyyəsi var. Təbii ki, biz əxlaqsızlıq yuvası işlədən qadının səviyyəsinə enə bilməzdik. Və ona əlindən nə gəlirsə beş qat artığını etməsini məsləhət görüb dəstəyi üstünə qoyduq. Birincisi, biz həqiqəti yazmışıq. Qaçaq Nəbi küçəsinin sakinləri masaj salonunun fəaliyyətindən narazıdır. İkincisi, hansısa fahişəxananın, gündə yüz kişinin bədəninə əli və başqa yerləri dəyən kimsələr «Gündəlik Bakı» qəzetini bağlatdırmaq gücündə deyillər. Burda çalışanlar və obyekt rəhbərliyi gedib öz işlərilə məşğul olsalar, məsləhətli olardı. Məsələdən xəbər tutan Qaçaq Nəbi küçəsinin sakini, tanınmış publisist Firuz Haşımov «Esmiralda» masaj salonunda cərəyan edən iyrənc hadisələrə kəskin etirazını bildirdi: «Qədim Şərq hamamlarında, eyni zamanda Azərbaycanın qədim mədəniyyət mərkəzi olan şəhərlərindəki ümumi hamamlarda kisə çəkənlərlə yanaşı, püştəmal, yəni masajçılar da var idi. Onların sənəti çox ağır idi. Hər adam onlara öz bədənini etibar etmirdi. Həmin masajçılar qədim şərq təbabətinin qanunları əsasında masajçılıq fəaliyyəti ilə məşğul olurdular. Bu hamamlarda qadın masajçılar olmayıb. Mənim Vətənimin 20 faizi düşmən tərəfindən işğal olunub. Mənəvi dəyərlərimiz böyük təhlükə qarşısındadır.



Gündə cəbhə xəttindən ya bir əsgərin şəhid olması xəbəri gəlir, ya da dinc sakinlərin atəşə məruz qalması haqqında eşidirik. Camaat kipriyi ilə od götürür, bir şəhidin qırxı bitməmiş digəri dünyasını dəyişir. Belə bir şəraitdə masaj salonlarının açılmasına icazə verənlərin özləri əxlaqsızdırlar. Gənc nəslin başına gətirilən oyunları hamı görür. Xarici ideoloji təxribatçı mərkəzlərin nəzarətsiz qalmış gənclərimizi nə cür tora saldığını hər kəs bilir. Belə bir anda masaj salonlarının sayının artması təhlükənin daha da böyüməsinə səbəb olur. Mən masaj salonlarını əxlaqsızlıq yuvası adlandırıram. Kimsə bir az pul tapan kimi masaj salonu açır. «Esmiralda» masaj salonunun qapısının qarşısında yarım saat durmaq kifayətdir ki, ora gələn kontingenti müəyyən edə biləsən. Azərbaycanın hazırkı mənəvi mühitində masaj salonları əxlaqsızlıq yuvalarından başqa bir şey deyil. Salonun sahibi qəzetə çox da xox gəlməsin. Qız-gəlininin namusu düşmən tərəfindən tapdalanmış məmləkətdə masaj salonlarının artması faciə deməkdir. Bunların qudurğanlığına bax ki, qəzeti bağlatdıracaqları ilə hədələyirlər. Siz kimsiniz axı? Binamızın sakinlərinin hamısı əxlaqsızlıq yuvasına çevrilən masaj salonunun bağlanmasının tərəfdarıdır. Hansısa hüquq-mühafizə orqanına şikayət edəndə «Esmiralda» masaj salonunun rəhbərliyi sutenyor ordusu ilə adamın üstünə gəlir. Mən bir dəfə masaj salonunun rəhbərinə sual etdim ki, belə bir əxlaqsızlıq yuvasını sənin arvad-uşağın yaşayan binanın qarşısında açsaydılar, necə olardın? Cavab verə bilmədi». Firuz Haşımovun sözlərinə görə, cəzasızlıq mühiti əxlaqsızlıq yuvalarının sayının çoxalmasına gətirib çıxarıb: «Mən həmişə Azərbaycan polisinin şərəfini qorumuşam. Xətai Rayon Polis İdarəsinin vəzifəli şəxslərindən birindən soruşdum ki, nə vaxt bu «Esmiralda» masaj salonunun axırına çıxassınız.

Qayıtdı ki, onların lisenziyası var. Polis əməkdaşı belə deyəndən sonra nə etmək olar? Bu masaj salonunda qadın ticarəti tüğyan edir. Camaatın gözü qabağında min cür iyrənclikdən çıxırlar. Yad kişilərin bədənini tumarlayan qadınlar qəzet bağlatdıra bilər? «Esmiralda» masaj salonunun yerlə-yeksan edilməsini istəyirəm. Sakinlər fahişə qızların və onlarla intim əlaqədə olan şəxslərin səsindən rahat yata bilmir. Aidiyyəti hüquq-mühafizə orqanlarının əməkdaşları əxlaqsızlıq yuvasını bağlamasalar, bina sakinləri öz bildikləri formada hərəkət edəcək».

Qeyd edək ki, hüquq-mühafizə orqanlarının əməkdaşları hardasa xırda cinayət hadisəsi baş verən kimi dərhal xəbər tutub müvafiq tədbirlər görürlər. Bəs, yüzlərlə ailənin yaşadığı binanın zirzəmisində fəaliyyət göstərən «Esmiral»da masaj salonundakı baş verən iyrənclikləri niyə görən yoxdur? Xətai Rayon Polis İdarəsinin rəisi Əkbər İsmayılovdan xahiş edirik ki, fahişəliyin baş alıb getdiyi «Esmiralda» masaj salonunu bağlayıb qadın ticarətinə qarşı aparılan mübarizəyə öz töhfəsini versin. DİN-in İnsan Alverinə Qarşı Mübarizə İdarəsinin əməkdaşlarını bura dəvət edirik. Qoy gəlib masaj salonunda cərəyan edən əxlaqsızlıqları yerindəcə görsünlər. Digər tərəfdən, Xətai Rayon İcra Hakimiyyətinin başçısı Razim Məmmədovun hansısa marağı yoxdursa, niyə əxlaqsızlıq yuvasının fəaliyyətinə xitam vermir? Axı xalqımızın milli dəyərlərinə bu formada zərbə vurmaq olmaz. Ümid edirik ki, bu yazıdan dərhal sonra aidiyyəti hüquq-mühafizə orqanlarının nümayəndələri lisenziyasız fəaliyyət göstərən «Esmiralda» masaj salonunun qapısına möhür vurub fahişə qızların ayağını burdan kəsəcək. Gələn saylarımızda masaj salonundan reportaj hazırlayacağıq. Bizi izləməyi unutmayın.