Qeyri-leqal mərc sektoruna nəzarəti Kəbirə Məmmədova həyata keçirir
Artıq neçə illərdir ki, ölkənin ən böyük və ən gəlirli ticarət obyektlərindən biri olan “Binə” Ticarət Mərkəzinə rəhbərlik edən Kəbirə Məmmədovanın səltənəti son vaxtlar ciddi zərbələrə məruz qalsa da, bu zərbələr bəlkə də daha çox onları endirən şəxslərin özlərinə ziyan vurmuşlar. Bununla belə bu iqtisadi nəhəngin həm daxilində, həm də ətrafında nə ilə nəticələnəcəyi hələ də məlum olmayan proseslər bu gün də davam edir.
İlk növbədə “Binə”də ticarətlə məşğul olan insanlar qazanclarının demək olar ki, hamısının əllərindən müxtəlif bəhanələrlə alındığından şikayət edirlər. Məsələn, məlumatlarda bildirilir ki, bu gün hər dükandan ayda 3 manat işıq pulu yığılır. Həm də bu 3 manat bir işıq lampasına görə nəzərdə tutulub. Hər dükanda isə ən azı 8 işıq lampası var. Ən çoxunda isə 12-dir. Orta hesabla 10 lampa götürsək, bu, bir mağazadan 30 manat almaq deməkdir. Beləliklə, işlək 2000 dükandan aya 60 min manat pul əldə edilir. Sahibkarlar deyirlər ki, gün ərzində bir neçə dəfə işıq sönür. Bu isə əsl maxinasiyadır: “Hər bir dükana sayğac qoyulsa da, işıq pulunu bu minvalla alırlar. Sayğacı onlara göstərəndə ”ehtiyac yoxdur” cavabını verirlər. Işıq lampası aya ən yaxşı halda 70-80 qəpik yazır. Bazarda gündə işıq bir neçə dəfə və bir neçə saatlıq söndürüləndə bu, aya heç 50 qəpik də eləmir. Ancaq əlavə olaraq 2 manat 50 qəpik alırlar”. Lakin nə narazılıqlar, nə də pul yığımları bununla bitmir. Bildirilir ki, hər dükan sahibindən kondisioner üçün 40 manat pul alırlar.
Bəsit hesablama nəticəsində bu yığımdan da Kəbirə Məmmədovanın cibinə əlavə olaraq 80 min manatın girdiyini görmək olar. Kondisioner pulu verməmək mümkün deyil. Istifadə etməsən belə bu məbləği ödəməlisən. 40 manatı ödəməmək üçün kondisioneri sökməlisən. Yenidən quraşdıranda icazə üçün rəhbərliyə əlavə olaraq 300 manat verməlisən. Təbii ki, “işıq pulu” məsələsi “Binə” Ticarət Mərkəzində çalışan insanları sıxıntıya salan problemlərin sadəcə cüzi bir hissəsidir. Məhz elə bu səbəbdən də sahibkarlar bir müddət əvvəl Kəbirə Məmmədovanın “vurulacağı” barədə yayılmış xəbərləri məmnunluq hissi ilə qarşılamışdılar. Lakin bu xəbərlər hələlik öz təsdiqini tapmadı.
Digər tərəfdən isə bu məlumatların tam əsassız olduğunu da kimsə iddia etmədi. Məlum olduğu kimi Kəbirə Məmmədova bu gün Azərbaycanın özəl bizes sahəsində fəaliyyət göstərən simalar arasında heç də son cərgələrdə durmur. Bu isə o anlama gəlir ki, onun hazırda nəzarət etdiyi sahədə kifayət qədər davamlı fəaliyyəti müəyyən oliqarx-məmurlar tərəfindən dəstəklənir və himayə olunur. Digər tərəfdən isə uzun illərdən bəri tərəfdaşlıq edən şəxslərin arasında ciddi narazılıqların yaranmasına elə də nadir hallarda rast gəlinmir. Mövzuya dair ötən materiallarda biz qeyd etmişdik ki, ilk baxışda milyonlarla gəlir gətirən mərkəzə nəzarəti ələ keçirmək uğrunda oliqarxların savaşını “normal” qəbul etmək də olar.Redaksiyamıza yeni daxil olmuş məlumatlarda isə Kəbirə Məmmədovanın bu qədər qazanc müqabilində aludə olduğu bəzi vərdişlərə dair maraqlı açıqlamalar təqdim edilir.
Belə ki, məlumatı təqdim edən mənbə Kəbirə xanımın qumar oyunlarına böyük həvəs göstərdiyini iddia edir. Mənbə bildirir ki, bir müddət əvvələ qədər Bakılı biznes-ledinin ən sevimli oyun məkanlarından biri Moskvada yerləşən “Orlyonok” kazinosu idi. Lakin hazırda bu kazino bağlanaraq fəaliyyəti dayandırılıb. Buna görə də Kəbirə xanımın məsələn, “ruletka” masası arxasında oyununu müşahidə etmək istəyənlər bunun üçün Tiflisin “Radisson” kazinosuna yollanmalıdrlar.
Mənbə iddia edir ki, bu müşahidələr çox maraqlı ola bilər. Belə ki, Kəbirə xanımın bir gecədə 1-2 milyon manatı udub və ya uduzması (təbii ki, daha çox uduzması) elə də nadir hallarda baş vermir. Əlbəttə ki, bu həyat tərzinin yalnız “Binə” Ticarət Mərkəzindən əldə olunan gəlirlərlə təmin olunduğu bir qədər inandırıcı deyil. Lakin Kəbirə xanımın gəlirləri də yalnız “Binə”nin verdiyi dividendlərlə məhdudlaşmır. Məlumatlı mənbələr iddia edirlər ki, son vaxtlar Bakıda yenidən fəallığı ilə diqqəti cəlb edən qeyri-leqal mərc sektoruna nəzarəti də məhz Kəbirə Məmmədova həyata keçirir. Burada isə artıq söhbət ayda deyil, hər gün hesablanan milyonlardan gedir…