DİN işin obyektiv araşdırılacağını vəd edir, zərərçəkənin atası isə istintaqdan narazıdır
Cari il iyunun 17-də Salyan rayonu ərazisində üç nəfər tərəfindən qəddarlıqla döyülərək beli sındırılan Lənkəran şəhər sakini Müstəqim Məmmədovun işi araşdırılmır. Bunu dünən redaksiyamıza dərdini söyləməyə gələn Müstəqim Məmmədovun atası Nazim Məmmədov dedi.

N.Məmmədov hesab edir ki, oğluna bu ağır bədən xəsarəti təsadüfən deyil, sifarişlə həyatə keçirilən suq-qəsd nəticəsində yetirilib: “Bu il yanvarın 9-u axşam saatlarında Lənkəran şəhərində oğlum Müstəqim Məmmədov Baş Narkotiklərə Qarşı Mübarizə İdarəsinin Cənub Regional Şöbəsinin sabiq rəis müavini Aydın Əkbərov tərəfindən heç bir səbəb olmadan təhqir edilib və gülələnməklə hədələnib. Mən durmadan bütün ünvanlara müraciət etsəm də, səsimi eşidən olmadı. Baş Prokurorluq və Daxili İşlər Nazitliyinə də müraciət eləmişdim ki, bu adam uşağımı şərə salacaq, tutduracaq. Daha nə bilim ki, narkomanlara oğlumu şikəst etdirəcəklər. Axı mən vaxtı ilə təhlükə barədə yazdım, dedim, haray saldım. Amma səsimi eşidən olmadı. Baş Prokurorluq və DİN Aydının tərəfində durdu”.

Şikayətçinin sözlərinə görə, son hadisə ilə bağlı iş Salyan Polis Şöbəsindən alınaraq Daxili İşlər Nazirliyinin İstintaq İdarəsinə təhvil verilsə də, bu günə qədər hadisə ilə bağlı kimsə saxlanılmayıb. “10 gün bundan əvvəl məni Daxili İşlər Nazirliyinə çağırmışdılar. Məni orada Baş İstintaq və Təhqiqat İdarəsinin rəisi, general Sərvər Mehrəliyev qəbul elədi. Çox sağ olsun, səmimi danışdı, söz verdi. Amma nə olsun? Bu günə qədər kimsə gəlib bizimlə maraqlanmadı. Hamı mənə yalan danışır, məni başlarından edirlər. Əgər Zakir Qaralov və ya Ramil Usubovun oğlunun başına belə bir iş gətirilsəydisə, həmin adam Amerikada da olsaydı, onu bircə günə tutardılar. Bəs mən vətəndaş deyiləm, niyə mənim səsim eşidilmir?”, deyən N.Məmmədov üzləşdiyi problemlə bağlı prezident İlham Əliyevə də müraciət edib.

Redaksiyadan çıxandan təxminən bir saat sonra N.Məmmədov zəng edərək məlumat verdi ki, ona DİN-dən zəng ediblər və söhbət çox əsəbi tonda keçib: “Mənə Ələsgərov soyadlı bir müstəntiq zəng edib dedi ki, bu gün işi ona veriblər. Başa düşmürəm, niyə axı bu gün? Hadisənin üstündən bir aydan çox vaxt keçib, amma hələ işi indi müstəntiqə veriblər. Sonra o, mənə dedi ki, “oğlunu götür, nazirliyə gətir”. Axı mən beli sındırılan adamı Lənkərandan Bakıya nə təhər gətirim? Bunu ağlı başında olan adam deyər? Dedim ki, gəlin, özünüz dindirin də. Deyir ki, “mən indi Lənkərana gəlim?” Dedim ki, istəyirsənsə, heç gəlmə, mən yuxarı şikayət edəcəyəm. O da dedi ki, “get BMT-yə şikayət elə”. Mən uşağam? 76 yaşlı adamla da belə danışarlar?”.

Məsələ ilə bağlı Daxili İşlər Nazirliyinin mühüm işlər üzrə müstəntiqi Nadir Ələsgərovla əlaqə saxladıq. Müstəntiq həqiqətən də şikayətçiyə telefon açdığını dedi: “Nazim Məmmədovun şikayəti əsasında iş araşdırılması üçün mənim icraatıma verilib. İşi də bu gün almışam. Sözsüz ki, təhqiqata başlamaq üçün əvvəl şikayətçini dinləmək lazımdır. Bu səbəbdən də Nazim Məmmədovla telefonla danışdım. Amma o, mənə heç danışmağa imkan vermədi. Çox əsəbi idi. Başa düşürəm, övladı xəsarət alıb. Amma mən də şikayətçini dindirmədən istintaqı apara bilmərəm. Bu səbəbdən də oğlunun vəziyyətini soruşdum. O da dedi ki, çox yaxşıdır. Dedim ki, onda zəhmət olmasa, götürün onu nazirliyə ifadəsini verməsi üçün gətirin. O, da baş prokuror, daxili işlər nazirinin adını çəkib dedi ki, heç onlar da oğlunu gətirə bilməzlər, mən şikayət edəcəyəm. Belə başa düşdüm ki, onun oğlunun vəziyyəti yaxşı deyil. O, sadəcə əsəbindən mənə “çox yaxşı” deyibmiş. Ona görə də dedim ki, problem deyil, gəlib yerində izahatını alarıq”.

DİN rəsmisi habelə onu da bildirdi ki, N.Məmmədovun şikayəti daxili işlər nazirinin şəxsi nəzarəti altındadır və iş bütün təfərrüatları ilə araşdırılaraq, nəticələri barədə qanun çərçivəsində ölçü götürüləcək.
Qeyd edək ki, 30 yaşlı M.Məmmədovun təcili əməliyyata ehtiyacı var. Aldığı zədələrdən onun onurğa sütununun 5-ci fəqərəsi ("L1 fəqərə cismində kəskin çökmə sınığı, arxa üst hissədə kanala doğru 3 mm-lik yerdəyişmə və dural kisəyə minimal kompresiya) sınıb. Tehranda M.Məmmədova əməliyyatın 10 min dollara edilməsinin mümkünlüyünü bildiriblər. Habelə əməliyyatdan sonra da M.Məmmədov kilinikada 2-3 ay ərzində müalicə almalıdır. Bu məbləğdə vəsaiti ödəmək üçün ailənin imkanı yoxdur. Ailə başçısı Nazim Məmmədov və həyat yoldaşı təqaüdçüdürlər. Məmmədovlar məhz şikəst edilən M.Məmmədovun kreditə götürdüyü avtomobillə göstərdiyi taksi fəaliyyətindən gələn gəlirlə dolanırmış.
Bu səbəbdən də bir daha Müstəqim Məmmədovun əməliyyatı və müalicəsi üçün yardım kampaniyasının aparıldığını xatırladırıq. Yardım etmək istəyən vətəndaşlər ianələrini aşağıdakı bank hesablarına köçürə bilərlər.

Alanın Bankı / Beneficiary Bank
Bank Respublika ASC Lankaran filiali
Kod: 504357 VOEN: 9900001901
M/h: AZ80NABZ01350100000000014944
SWIFT: BRESAZ22
Alan / Beneficiary
Adı / Name: MUSTAQIM
Soyadı / Name: MAMMADOV
IBAN : AZ51BRES00380194401245929301
VÖEN / TIN:

İdrak Abbasov