Hələ bir müddət bundan əvvəl, Tərtər rayonuna ayrılan milyonlarla vəsaitin asanlıqla yuyulması barədə silsilə açıqlamalarla çıxış etmişdik. İşıq üzü görən açıqlamalarda qeyd olunurdu ki, Tərtər rayon İcra Hakimiyyətinin başçısı vəzifəsinə sahib olan Müstəqim Məmmədov, “abadlıq və quruculuq” işləri adı altında, sanki talançılıqla məşğuldur.

Rayondakı mənbəmiz bildirir ki, “abadlıq” işlərinin görülməsi üçün əvvəlcə rayonun mərkəzində yerləşən bir çox ərazilər bərbad hala salınır, sonra isə təmir olunur. Faciəli hal olur ki, son dəfə təmir olunan, abadlaşdırılan ərazilər heç bir il keçməmiş yenidən təmir olunmaq üçün dağıdılır və qazılır. Aparılan belə bir əməliyyatların hesabına isə, küllü miqdarda pullar havaya “sovrulur”.

Bir neçə gün bundan əvvəl redaksiyamıza telefon zəngi açan Rafiq İbadov adlı rayon sakini bildirdi ki, Tərtər rayon İcra Hakimiyyətinin başçısı Müstəqim Məmmədov, abdlıq adı altında külli miqdarda vəsaiti mənimsəyir və yaxın adamları vasitəsilə minbir maxinasiyalara da qol qoyur. O, onu da bildirdi ki, “icra başçısı gözə görünən yerləri 3-4 dəfə təmir elətdirir, rayonun görünməyən yerləri isə sanki xarabazarlığa oxşayır.

Çatdırılan məlumatlarda o da vurğulanır ki, Şəhid və Qarabag əlillərinə məxsus binanın 2 kanlizasiyasının üstü düz 4 ildir ki, açıqdır. Problemlə bağlı aidiyyəti qurumlara dəfələrlə şikayətlər olunsa da, müraciətlərin heç bir nəticəsi olmayıb”.

Rayon sakinlərinin bildirdiyinə görə, Müstəqim Məmmədov Yevlaxdan gətirdiyi komandası ilə Tərtərdə “at oynadır” və icra başçısı onlara qeyri-məhdud səlahiyyətlər də verib: “Məsələn, Tərtər RİH başçısının 1-ci müavin Ramiz Şabanov, ictimai-siyasi və humanitar məsələlər şöbəsinin müdiri Elvin Umudov və digərləri “Yevlax qruplaşması”nın fəal üzvləridirlər. Rayon ərazisində də əksər işlər, məhz onların vasitəsilə həyata keçirilir. İcra başçısı “qara işlər”ini isə, Yevlaxdan gətirdiyi və Tərtər RİH-də məsləhətçi vəzifəsinə təyin etdiyi Çingiz İsayevin vasitəsilə həyata keçirir”.

Daha ilginc iddia olunan problemlərdən biri də, icra başçısının kənd icra nümayəndələrindən rüşvət tələb etməsi faktıdır. Verilən məlumatlarda o da bildirilir ki, Tərtər rayonunda 74 kənd var və hər bir kənd icra nümayəndəliyinin 200 manat maaş alan mühasiblərinin hər birindən, o, 6 aya 800 AZN rüşvət yığdırır. Yüksək çinli vəzifə sahiblərindən isə, daha fərqli məbləğdə “haqq-hesab” tələb edir”.

Rayondakı mənbəmiz onu da bildirir ki, icra başçısı Tərtərə yeni gələrkən, fərdi yaşayış evlərinin hasarlarını uçurtdurdu və hal-hazırda həmin yerləri təkrar satışa çıxarır. Yerlərin yenidən satışa çıxarılması işinə isə, bu gün Müstəqim Məmmədovun “sağ əli”

hesab olunan və icra aparatında baş memar vəzifəsini daşıyan Tofiq müəllim nəzarət edir. Əldə olunan pullar da, məhz onun vasitəsilə ünvanı üzrə çatdırılır.

Bir məqama da toxunaq ki, Müstəqim Məmmədov icra başçısı vəzifəsinə qədər, Yevlax şəhər İcra Hakimiyyəti başçısının müavini və şəhər təsərrüfatı şöbəsinin müdiri vəzifələrində çalışıb. Hal-hazırda onun Yevlaxda tikinti materiallarının istehsalı və satışı ilə məşğul olan neçə-neçə müəssisələri, eləcə də bir sıra ictimai-iaşə obyektlərinin varlığı haqda da məlumatlar daxil olmaqdadır. Elə bu kimi səbəblər üzündəndir ki, Tərtərdə həyata keçirilən təmir-tikinti işləri zamanı, lazım olan materiallar Yevlaxdan alınır. Bu zaman alınan materiallar şişirdilmiş rəqəmlərlə hesablanır ki, bu da Müstəqim Məmmədovun büdcəsinə lazımi təsirini göstərir.

Digər olaylar haqda isə, növbəti sayımızda geniş açıqlamalarla çıxış edəcəyik.

Mirzə