Aktyor İlqar Cahangirovun işdən uzaqlaşdırılmasının pərdəarxası

gundemxeber.az Ölkə mətbuatı, bir neçə gündür ki, Azərbaycan Dövlət Gənc Tamaşaçılar Teatrının əməkdar artisti İlqar Cahangirovun işdən azad olunmasını gündəmdə saxlayır. Bu isə heç də təsadüfi deyil və nə qədər qəribə səslənsə də, aktyorun siyasi baxışlarına görə təzyiqlərə tuş gəldiyi iddia olunur. Xatırladaq ki, aktyor İlqar Cahangirov işdən azad olunmazdan bir neçə gün öncə mətbuata müsahibə verərək, dövlətin mədəniyyətə və teatra ögey münasibət bəslədiyini bildimişdi.
Oxucularımız üçün maraqlı olacağını nəzərə alaraq, aktyorun qalmaqallı müsahibəsində işlətdiyi müəyyən fikirləri diqqətinizə çatdırırıq: “Asılıyıq. Dövlət bizi asılı edib. Teatrda hansı otağı açırsan, İlham Əliyevin, Heydər Əliyevin şəkillərini görürsən. Bura teatrdır da. Elə otaq var ki, orada İlham Əliyevlə Heydər Əliyevin 5-6 şəklini asıblar. Mən onlarla nədən danışım? Bu gün Azərbaycanda idman sahəsində yaxşı meydançalar, zallar, komplekslər tikilib. İdmançılar da ortaya nəticələr qoyurlar. Amma bu gün teatrda elə bir şey yoxdur. Yəni fərqli-fərqli düşüncəyə malik rejissorlar olsun, onların öz teatrları, öz məktəbi, ocağı olsun ki, məşq etsinlər...
Görünür bu, dövlətin də marağında deyil. İndi də teatrları birləşdirib, zavod-fabrik edəcəklər. Gürcüstan balaca bir ölkədir, amma bununla belə 36 teatrı var(!). Bu gün Bakıda 50 teatr olmalıydı, hər rejissorun öz teatrı. 18 ildir ki, “tövlədə” məşq edirik, şəraiti olmayan bir yerdə, əziyyət çəkmişik, teatr yaratmışdıq... İmkan vermədilər. Gürcüstanda bizə güldülər ki, 18 ildir teatrınız var, bu cür repertuarınız var, amma binanız yoxdur. Amma Gürcüstanda cəmi 3 ildir teatr yaranıb, elə binası var, ağzım açıq qaldı. Bax, budur xəcalət, budur yanaşma, budur biabırçılıq”.
Qeyd edək ki, aktyorun məhz bu müsahibəsindən sonra ona qarşı işlədiyi teatrda təzyiqlər başlayıb. Bununla bağlı “Gündəm-xəbər”i məlumatlandıran mənbənin sözlərinə görə, həmin müsahibədən sonra Azərbaycan Dövlət Gənclər Teatrının rəhbərliyi Mədəniyyət və Turizm Nazirliyinə çağrılıb və rəhbərliyin qarşısında qəti tapşırıq qoyulub ki, İlqar Cahangirov, hansı yolla olur-olsun, teatrdan uzaqlaşdırılmalıdır. Mənbəmiz iddia edir ki, Əbülfəs Qarayev eyni zamanda bildirib ki, məsələnin səs-küylə həllinə tərəfdar deyil və mövzu sakitliklə qapadılmalıdır. Teatr rəhbərliyi isə məhz bundan sonra aktyorla danışıb və onu işdən çıxması haqda ərizə yazmağa razı sala biliblər. Mənbəmizin sözlərinə görə, İlqar Cahangirova deyilib ki, hətta öz xoşu ilə ərizə yazmasa belə, teatrdan uzaqlaşdırılacaq. Beləliklə, çıxış yolunun qalmadığını görən aktyorun ərizə yazmaqdan başqa əlacı olmayıb.
Bununla bağlı Gənc Tamaşaçılar Teatrının rəhbərliyinin rəsmi mövqeyi də kifayət qədər şübhəli olub. Belə ki, Azərbaycan Dövlət Gənc Tamaşaçılar Teatrının aktyoru, əməkdar artist İlqar Cahangirovun işdən qovulması haqqında məlumat yayılıb. Teatrın rəhbərliyi rəsmi şəkildə bildirir ki, bütün bu xəbərlər şayiədir: “İlqar Cahangirov öz xahişilə işdən azad olmaq üçün ərizə ilə kadrlar şöbəsinə müraciət edib və onun ərizəsinə müvafiq qaydada baxılmaqdadır. O, teatrın repertuarında olan bir neçə tamaşada əsas rolların ifaçısıdır və hələ ki, onun işdən azad edilməsi barədə rəsmi əmr yoxdur. Hər bir vətəndaşın işə qəbul olunmaq və işdən azad olunmaq hüququ vardır. Bu da İlqar Cahangirovun hüququdur. İlqar Cahangirov siyasi əqidəsinə görə deyil, özünün də qeyd etdiyi kimi, daha yüksək məvacibli işdə çalışması ilə əlaqədar bu addımı atıb”.
Dünən isə xalq artisti, rejissor Cənnət Səlimova baş verənlərlə bağlı nazir Əbülfəs Qarayevlə görüşmək istədiyini, amma bunun çətin prosedur olduğunu deməklə, bəzi qaranlıq məqamların da üzərinə işıq salmış oldu: “Açığını deyim, mən “profsoyuz” işlərini yaxşı bilmirəm. İlqar Cahangirov çox istedadlı aktyordur. O, “Otello”, “Xudayar bəy”, “Ezop” kimi rolların möhürünü vurub. İlqar deyil, bir başqası olsaydı, bəlkə də məni acıtmazdı. Məni çox narahat edən bir məqam var. İlqar nəyə görə ərizə yazıb? İnanmıram ki, İlqar oturduğu yerdə gedib ərizə yazsın? Məncə, mətbuat bunu araşdırmalıdır. O, ərizəni yazıb, amma qalan bir şey var – ümumi dil tapmaq lazımdır. Bu həssas məsələdə xüsusilə diplomatiya lazımdır”.
Onun sözlərinə görə, Azərbaycanın teatr sənətində yaranmış bu vəziyyətə Mədəniyyət və Turizm Nazirliyi biganə qala bilməz: “Mən böyük məmnuniyyətlə cənab nazirin yanına gedərdim. Amma Əbülfəs Qarayevin qəbuluna düşmək çox çətindir. Hətta mən deyərdim ki, qəbul proseduru iki aydan da çox vaxt aparır. Zənglər, xahişlər etməlisən. Özü də hər gün etməlisən ki, onun qəbuluna düşə biləsən. İlqarın teatrdan gedişi isə böyük faciədir. Bu anlaşılmazlıqdır. Mübariz Həmidov da İlqarı çox sevir. Mənim fikrimi Mübariz müəllim yaxşı bilir. Özü də bu, birinci hadisə deyil. Mən inanıram ki, Mübariz Həmidov İlqarı geri qaytaracaq. Bu, mütləq olacaq”.
Daha sonra isə xalq artisti mətbuat vasitəsilə Əbülfəs Qarayevə də müraciət edib: “Teatrda istedad tək-tək yetişir. İlqar Cahangir də o təklərdən biridir. Cənab Qarayev, İlqarın teatrdan uzaqlaşdırılmasına imkan verməyin. Çünki o, teatr sənətində çox şey deyə bilmək gücündə olan aktyordur”.
Orxan