Tahir Qocayev mülkiyyət hüququnun pozulmasından şikayətlənir



Xətai rayonu, Xəqani Rüstəmov küçəsi, 12/10 ünvanından redaksiyamıza şikayət gəlib. Şikayətçi Tahir Qocayev deyir ki, 12.5 sot ərazi onun şəxsi mülkiyyətdir: “Hazırkı bazar qiymətilə bura satışa çıxarılsa, 3 milyon manat dəyəri var. Amma 2012-ci ildən məni cəncələ salıblar. Dedilər ki, sənin bu mülkün ”Ağ şəhər" layihəsində yola düşür deyə söküləcəkdir. Nə etmək olar? Dövlətlə dövlətlik edəsi deyilik ki. Əvvəl bu işi “Azəryolservis”ə vermişdilər.

Gəlib ölçüb-biçib bura biabırçı qiymət təyin etdilər -189.840 manat. Mən də, təbii, bu qiymətlə razılaşmadım. Bu işlər “Azəryolservis”dən Xətai Rayon İcra Hakimiyyətinə veriləndən isə vəziyyət lap bərbad oldu. Sentyabrın 9-u mən hüzrdə idim. Bir də qonşular mənə zəng vurdu ki: “Tahir, yerin uçub. Gəl gör niyə uçub”. Tələm-tələsik gəldim, gördüm binanın bir hissəsi uçurulub. 3 seyf qapım oğurlanıb, başqa nə qədər materiallar oğurlanıb.

Vəziyyətlə bağlı Xətai Rayon İcra Hakimiyyətinin şöbə müdiri Zaməddin müəllimin yanına getdim. Dedim, məndən sənəd istəmisiz, bildirmişdiniz ki, sökülməmişdən öncə sizə xəbər veriləcək, ərazinizin qiyməti yenidən müəyyənləşəcək. Amma görürəm mülkiyyətim sökülüb. Kim söküb? Dedi bilmirəm. Mən də dedim ki, mənimlə küçə adamı kimi danışma. Mən bu ölkənin vətəndaşıyam, mülkiyyət hüququm var. Necə yəni xəbərim yoxdur. Prezident bilsə, sən ona nə cavab verəcəksən?".

İndi nagüman qalmışam. Prezidentə, Bakı Şəhər İcra Hakimiyyətinə teleqram vurmuşam. Hələ heç bir cavab yoxdur. 102-yə zəng vurmuşam. Polis də deyir, gəl izahat yaz. Mən nə izahat yazım? Gəlsinlər əmlakımı kim bu günə qoyub araşdırsınlar".

T.Qocayev vaxtilə sex kimi fəaliyyət göstərmiş böyük tikili üçün müəyyən edilmiş məbləğin çox az olduğunu və məhkəməyə şikayət etdiyini deyib.(azadliq.info)