Dünən qızına toy edən və əksər media rəhbərlərini bu xoş gününə toplayan tanınmış jurnalist, Demokratik Jurnalistlər Liqasının sədri Yadigar Məmmədli ağır qəza keçiribmiş.



"AzerFax" xəbər verir ki, bu barədə məlumatı AzNews.az saytı yayıb. Məluamata görə, sentyabrın 21-i gecə saatlarında Nizami küçəsi ilə K.Səfərləyeva küçəsinin kəsişməsində qəzaya düşən Y. Məmmədli möcüzə nəticəsində sağ qalıb.

Həmin prospektdə - “Nargilə” kafesinin yaxınlığındakı işıqforda yüksək sürətlə hərəkət edən “VAZ 21-07” markalı avtomobil qırmızı işıqda keçərək, jurnalistin idarə etdiyi “BMW” markalı avtomobilə çırpılıb. Zərbədən “BMW” yan üstə aşıb. Avtomobili yararsız hala düşsə də, xoşbəxtlikdən özü yüngül xəsarətlərlə canını qurtara bilib.
Sonradan məlum olub ki, həmin avtomobil sürücüsü Yadigar Məmmədlinin idarə etdiyi avtomobilə çırpılmazdan öncə başqa bir qəza törədib, hadisə yerindən qaçırmış.

Hadisədən sonra Yadigar Məmmədli təcili olaraq xəstəxanaya yerləşdirilib. Ona kəllə-beyin diaqnozu qoyulub. Tövsiyə olunub ki, qızının toyundan sonra müalicə etdirsin.

Qəzanın tədqiqatçısı, Nəzimi Rayon Polis İdarəsinin 22-ci Polis Bölməsinin əməkdaşı Samir Ələkbərli AzNews.az-a açıqlamasında avtomobil qəzası ilə bağlı avtoekspertizanın təyin olunduğunu deyib. Onun sözlərinə görə, hadisəni törədənin şəxsiyyəti də bəllidir. “Amma tədqiqat araşdırması getdiyindən kimin günahkar olmağını deyə bilmərəm. Təhqiqat bitəndən sonra mətbuata açıqlama vermək olar. Lakin indi bu barədə nəsə demək düz deyil”-deyə Samir Ələkbərli bildirib.

Qeyd edək ki, dünən baş tutan toyda Y.Məmmədli keçirdiyi qəzanı hamıdan gizlədib. Amma onun ayağını çəkdiyi və alnında əzik yerlərinin olması da diqqətdən yayınmayıb.