Rəşad Həsənov: "Pul köçürmələrinə görə haqqın miqdarı artarsa, bu halda soydaşlarımızın Azərbaycana pul yollamaq üçün ödədikləri xərcləri və qeyri-qanuni pul transferlərinin həcmini artıracaq"

Rusiyadan MDB ölkələrinə pul köçürmələri bahalaşıb. “Kommersant” qəzeti yazir ki, sentyabrın 30-dan etibarən Rusiyada işləyən 3 beynəlxalq pulköçürmə sistemlərindən biri olan “Western Union” tarifləri artıracaq. Xüsusilə də MDB ölkələrinə olan kiçik köçürmələ -məbləği 5 min rubl və ya 200 dollardan başlayan göndərişlərdən tutulan haqq 0,3-0,5% artırılır. 2 min dollar və ya 50 min rubldan yuxarı göndərişlər üçün xidmət haqqı tutulması isə 2 dəfə artacaq.
Aydın məsələdir ki, Rusiyada atılan bu addımlar Qərbin ona qarşı tətbiq etdiyi sanksiyalardan doğan məcburi tədbirlərdir. Kreml adminstrasiyası bu kimi addımları ilə sanksiyalar üzündən itirdikləri vəsaitləri müəyyən qədər kompensasiya etməyi düşünür. Qeyd edək ki, Rusiyada yaşayan azərbaycanlılar da hər il Vətənlərindəki yaxınlarına milyonlarla dollar pul göndərirlər. Hətta bəzən göndərilən bu məbləğin ümumi həcminin 1 milyard dolları keçdiyini də bildirirlər. Lakin indi göründüyü kimi, xaricə göndərilən vəsaitlərdən tutulan haqq artırılır. Görəsən, belə hal Rusiyadan Azərbaycana pul köçürmələrinə necə təsir edəcək?
Müstəqil iqtisadçı ekspert Rəşad Həsənov bildirdi ki, bu hal vətənlərinə pul köçürən soydaşlarımızın haqq olaraq ödədikləri xərcin və qeyri-qanuni transferlərin həcminin çoxalmasına gətirib çıxaracaq: "Rusiyadan xaricə, xüsusən də MDB ölkələrinə köndərilən pul köçürümlərinə görə tutulan haqqın artırılması təbii və gözlənilən prosesdir. Ümumiyyətlə, Qərb tərəfindən Rusiyanın maliyyə_kredit bazarına tətbiq olunan sanksiyalar sonda bu nəticələrə gətirib çıxarmalı idi. Çünki, artıq dünya banklarının Rusiya ilə işlərində müəyyən problemlər yaranıb. Eyni zamanda, Rusiya banklarına tətbiq olunan sanksiyalar, onların birbaşa çıxışlarına əngəl yaradıb. Hal-hazırda Rusiya banklarının beynəlxalq çıxışlara yolu əngəlləndiyindən, habelə alternativ olmadığından, rəqabət mühitində bazar prinsiplərinə uyğun olaraq, faktiki bu prinsipləri həyata keçirən şirkətlər öz xidmət haqlarını artırmalı olur. Burada digər maraqlı bir tərəf də var. Həmin maraqlı tərəf hesab edirəm ki, Rusiya hökumətinin özüdür. Hazırda Rusiya ciddi maliyyə problmləri ilə üz-üzədir. Son vaxtlar Rusiya bankları açıq şəkildə bu problemləri etiraf etməyə başlayıb. Eyni zamanda, Rusiya İqtisadi İnkişaf Nazirliyi də məsələ haqda açıqlama verib. Hətta onlar, məlumatımıza görə, Azərbaycandan da vəsait cəlb etmək istəyirlər. Hökumətin özü Rusiyanın maliyyə bazarından vəsaitlərin çıxarılmasında maraqlı deyil. Ola bilsin, köçürmələrə görə qiymət artımları qarşılıqlı razılaşma əsasında tətbiq edilir. Məqsəd də maliyyə axınını nisbətən azaltmaqdan ibarətdir. Burada digər bir nüans ondan ibarətdir ki, azərbaycanlılar da Rusiyadan vətənlərinə kifayət qədər böyük həcmdə pul göndərən qrupa aiddir. Rusiyada çoxsaylı soydaşımız yaşayıb, işləyir. Pul köçürmələrinə görə haqqı miqdarı artacaqsa, deməli, soydaşlarımızın da Azərbaycana pul yollamaq üçün xərcləri artacaq. Belə vəziyyət həm də qeyri-qanuni pul transferlərinin həcmini artıracaq. Belə olduqda bu ölkələrdə valyuta axınına nəzarət prosesi də çətinləşəcək və son olaraq bu da ciddi problemlərə yol açacaq".
Həsən