Moderator.az-a Heydər Əliyev adına Ali Hərbi Məktəbin bir qrup müəlliminin adından şok məktub daxil olub. Şikayətçilər adlarının gizli saxlanılmasını da xahiş ediblər.
Biz də onların müraciətlərinin vacib olduğunu nəzərə alaraq onun ictimailəşməsini qərara aldıq:
"Salam Hörmətli Redaksiya, ilk növbədə biz professor - müəllim heyəti hesab edirik ki bizim problemimizə sayğı ilə yanaşacaqsınız. Sizdən artıq dərəcədə xahiş edirəm şikayətçinin adı və familyası gizli saxlanılsın. Əks halda işdən çıxarılacam. Mən xaqımızın ümummilli lideri Heydər Əliyevin adını daşıyan Azərbaycan Ali Hərbi məktəbində müəllim işləyirəm. Allah tərəfi qeyd etmək lazımdır ki , sözün əsl həqiqi mənasında ölkəmizdə möhtəşəm və güclü ordu quruculuğu gedir. Hörmətli prezidentimizin ordu quruculuğuna böyük önəm verməsi bir vətənpərvər kimi məni çox sevindirir. Bizim şikayətimiz işlədiyimiz Heydər Əliyev adına Azərbaycan Ali Hərbi Məktəbində bəzi zabitlərin üzdən iraq fəaliyyəti nəticəsində professor - müəllim heyətinə 9:00-dan 16:45-ə qədər tətbiq edilən alimə və elmlə məşğul olan insanlara tətbiq edilən perespektivsiz iş rejimidir ki, bu zülmü Azərbaycanın heç bir ali məktəbi professor-müəllim heyətinə etmir.
Belə ki, hörmətli redaksiya, dünyanın hər yerində elmi tədqiqatla məşğul olan insanlara-alimlərə böyük diqqət və qayğı var. Hər bir alimin yetişməsi üçün elmi tədqiqatlar aparmaq və elmi kitabxanalara getməsi üçün şərait yaradılmalıdır. Bu qayda Azərbaycanın bir çox aparıcı ali məktəblərində var. Lakin H.Əliyev adına AAHM-də professor-müəllim heyəti səhər işə gələrək saat 9:00-dan ən geci 14:30-a qədər dərslərini deyib qurtarır. 14:30-dan 15:30 qədər nahar fasiləsi olur. Bundan sonra bizə deyirlər ki, yerdə qalan bir saatdan ötrü yenidən iş yerinə qayıtmalısınız, əks halada ciddi cəza tədbirləri görülür. Bütün bunlara rəğmən uzun illər bu ali məktəbdə can qoymuş nüfuzlu alimlər ərizə yazaraq işdən çıxırlar. Bu hal Azərbaycanda yeganə zabit hazırlığı ilə məşğul olan Ali məktəbin elmi potensialının getdikcə zəifləməsinə gətirib çıxarır. Bizləri axşamacan girinc etməkdənsə elmlə məşğul olmaq üçün şərait yaratmalarını xahiş etsək də heç bir nəticəsi yoxdur. Türk zabitlərinin H. Əliyev adına Ali Hərbi məktəbində idarəçiliyi zamanı bizlərə 2 günlük iş sistemi planlaşdrırdılar, elmi işlərimizi aparmaq üçün kifayət qədər vaxtımız olurdu. Bu qayda hərbi məktəb "Sayanski" kazarmada olan vaxt rusların da dövründə var idi. Lakin bu gün müxtəlif bəhanələrlə bizləri axşama kimi girinc edirlər, elmi işlərlə məşğul olmağa imkan vermirlər. Halbuki Əmək Məcəlləsində də var ki, zehni fəaliyyətlə məşğul olan müəllimlərə qısaldılmış iş rejimi tətbiq edilməlidir.
Hörmətli Redaksiya, biz müəllimlərin son ümid yeri Ali Baş Komandan Hörmətli prezidentimiz İlham Əliyev, ölkəmizin birinci xanımı hörmətli Mehriban xanım Əliyeva və hörmətli müdafiə naziri Zakir Həsənovdur. Bu şəxslər müəllim adına elmlə məşğul olan insanlara böyük diqqət və qayğı göstərdiklərinə heç kəsin şübhəsi yoxdur. Xahiş edirik bizim problemimizi xəbər portalı vasitəsilə ölkə rəhbərliyinə çatdırasınız. Biz professor-müəllim heyətinin xahişi budur ki heç olmasa dərslərimizi dedikdən sonra bizləri sərbəst buraxsınlar. Bu gun əksəriyyətimiz ərizə yazıb işdən çıxmaq məcburiyyətindəyik, başqa iş tapmaqsa indiki zəmanədə müşkül məsələdir. Bir daha xahiş edirəm işdən çıxarılma təhlükəmi nəzərə alaraq sizə informasiyanı verən şəxsi gizli saxlayasınız."