Rəsmlərdə Xalid Şirəliyevin işgəncə ilə öldürüldüyü açıq-aydın görünür


Masallı rayon sakini, Azərbaycan Ordusunda əvvəlcə zabit, daha sonra isə müddətdən artıq xidmət edən (MAXE) Xalid Ələsgər Oğlu Şirəliyev dünən öldürülüb.
Mərhum X.Şirəliyev səhhəti ilə əlaqədar ordudan yayındığı üçün axtarışda olub. Lakin bir neçə gün əvvəl evlərinə gələn Hərbi Polisin əməkdaşları onu qulluq etdiyi hərbi hissəyə aparıblar.

ASİYA.AZ-ın məlumatına görə Xalid Şirəliyev 31 oktyabr saat 10:00 radələrində ailə tərəfindən Hərbi Polisin əməkdaşlarına təhvil verilib. Mərhumun anası Zahidə Şirəliyeva oğlunun aparıldığı Biləcəridə yerləşən Hərbi Polisə gedərək, orada polkovnik-leytenant Feyzi Hüseynovla görüşüb. Həmin binanın 5-ci mərtəbəsində Hüseynov Şirəliyevaya deyib ki, heç bir narahatlıq yoxdur. «Oradan bildirblər ki, Xalidi qulluq etdiyi qornizona göndərəcəklər. Hətta hər şeyin yaxşı olacağını da deyiblər».

Lakin bu hadisənin üzərindən 3 gün keçdikdən sonra Xalidin nəşi «Semaşko» xəstəxanasının morqundan tapılır. Ailəsinə zəng vuraraq, uşaqlarının meytini aparmasını istəyirlər. Ailə üzvləri isə bildirir ki, Xalid Şirəliyevin meytinin morqa necə gedib çıxması və onun kimlər tərəfindən öldürülməsi müəmma olaraq qalıb. «Heç kim heç nə bilmir. Tək bilinən odur ki, Xalid döyülərək, işgəncələrə məruz qalaraq qətlə yetirilib. Onun kim tərəfindən öldürüldüyü də məlum deyil».

Mərhumun fotolarından aydın şəkildə görünür ki, Xalid Şirəliyev işgəncə verilərək öldürülüb. Onun başında ağır kəsilmiş yara işləri mövcuddur. Bundan əlavə bədənində zərbə izlərinin olduğu da aydın şəkildə diqqəti çəkir.