2012-ci ildə idarə vətəndaşların 1198 müraciətinə baxıb,
həmçinin 229 cinayət xarakterli materialı araşdırılıb

Dünən Baş Prokurorluğun Elm-Tədris Mərkəzində Korrupsiyaya Qarşı Mübarizə İdarəsinin 2012-ci il ərzində gördüyü işlərlə bağlı mətbuat konfransı keçirilib. İdarə rəisi Kamran Əliyev və Korrupsiyaya Qarşı Mübarizə üzrə Komissiyanın katibi Vüsal Hüseynov görülmüş işlər barədə məlumat veriblər. Qeyd olunub ki, 2012-ci ildə idarə vətəndaşların 1198 müraciətinə baxıb, həmçinin 229 cinayət xarakterli materialı araşdırıb: “Cinayət xarakterli materialların 58%-i üzrə cinayət işi başlanıb, digər məlumatlar üzrə isə zəruri qabaqlayıcı tədbirlərin görülməsi təmin edilib. Hesabat dövrü ərzində törədilmiş və hazırlanan cinayətlər barədə 369 müraciət araşdırılıb. Həyata keçirilmiş əməliyyat tədbirləri nəticəsində cinayət başında yaxalanmış şəxslər barəsində 29, o cümlədən korrupsiya hüquqpozmaları ilə əlaqədar toplanmış materiallar üzrə 4 cinayət işi başlanıb. Qeyd olunan cinayət işlərindən 23-ü üzrə ibtidai istintaq tamamlanaraq baxılması üçün aidiyyəti məhkəmələrə göndərilib. 2012-ci il ərzində 298 şəxs barəsində 170 cinayət işinin istintaqı tamamlanıb.
Məhkəmələrə göndərilmiş cinayət işlərindən 52 şəxs barəsində 32 iş rüşvət alma, 51 şəxs barəsində 33 iş vəzifə səlahiyyətlərindən sui-istifadə etmə, 75 şəxs barəsində 44 iş qulluq mövqeyindən istifadə etməklə dələduzluq və digər faktlarla əlaqədar olub. 2012-ci il ərzində məhkəmələrə göndərilmiş cinayət işləri üzrə vurulmuş cəmi 52 milyon 128 min manat ziyandan ibtidai araşdırma mərhələsində 25 milyon 972 manat manat və ya 49,82% ödənilib, qalan ziyanın təqsirləndirilən şəxslərin əmlakları üzərinə həbs qoyulmaqla ödənilməsi üçün qanunla nəzərdə tutulmuş tədbirlər görülüb.
Hesabat dövrü ərzində 3 prokurorluq işçisi barəsində 2 cinayət işi istintaq edilərək baxılması üçün aidiyyəti məhkəmələrə göndərilib, müvafiq ittiham hökmləri çıxarılıb. 4 prokurorluq əməkdaşı intizam tənbehi ilə cəzalandırılıb, onlardan 1-i tutduğu vəzifədən azad edilib, 1-i isə prokurorluq orqanlarından xaric edilib”.
Məlumatı Baş Prokurorluğun mətbuat xidməti yayıb.