Baş Prokuror yanında Korrupsiyaya Qarşı Mübarizə İdarəsinin hesabatında deyilir ki, ən çox korrupsiya hallarına təhsil, səhiyyə və sosial təminat sahəsində rast gəlinib; adı “korrupsiya” sözünün az qala sinoniminə çevrilən gömrük və vergi xidmətlərinin adı isə qara siyahıda yoxdur
Baş prokuror yanında Korrupsiyaya Qarşı Mübarizə İdarəsi ötən ilin statistik hesabatını ictimaiyyətə təqdim edib. İdarənin rəisi Kamran Əliyev jurnalistlərə açıqlamasında bildirib ki, hesabat dövründə Korrupsiyaya Qarşı Mübarizə İdarəsinə bütün sahələr üzrə şikayətlər daxil olub.

Təqdimatdan sonra K.Əliyev QHT və KİV təmsilçilərinin çoxsaylı suallarını cavablandırıb.
K.Əliyev bildirib ki, respublikada korrupsiyaya qarşı mübarizə kampaniya xarakteri daşımır: “Korrupsiyaya qarşı mübarizə sahəsində dövlət səviyyəsində ciddi işlər görülür. Hansı vəzifədə və harada işləməyindən asılı olmayaraq korrupsiya cinayəti törədən şəxslərə qarşı tədbirlər davam etdiriləcək”.



K.Əliyev ən çox korrupsiya cinayəti faktı aşkar edilən dövlət qurumlarının adlarını da açıqlayıb. Azərbaycanda korrupsiya cinayətlərinə daha çox təhsil, səhiyyə və sosial təminat sahəsində rast gəlinib.

Onun sözlərinə görə, 2013-cü il ərzində idarənin istintaq şöbəsi 367 şəxs barəsində 201 cinayət işinin araşdırılmasını tamamlayaraq baxılması üçün aidiyyəti məhkəmələrə göndərilib.



Səhiyyə sahəsində 22 şəxs barəsində 14 cinayət işi, təhsil sahəsində 25 şəxs barəsində 14 cinayət işi, sosial təminat sahəsində 16 şəxs barəsində 4 cinayət işi, əmlak məsələləri üzrə 2 şəxs barəsində 1 cinayət işi, yerli icra hakimiyyəti orqanlarının 8 əməkdaşı barəsində 6 cinayət işi, Mədəniyyət və Turizm Nazirliyinin 1 əməkdaşı barəsində 1 cinayət işi, Rabitə və İnformasiya Texnologiyaları Nazirliyinin 1 əməkdaşı barəsində 1 cinayət işi, Nəqliyyat Nazirliyinin 5 əməkdaşı barəsində 2 cinayət işi, “Azərenerji” ASC-nin 5 əməkdaşı barəsində 5 cinayət işi, bank və bank fəaliyyəti ilə məşğul olan qurumların 38 əməkdaşı barəsində 10 cinayət işi, təbiəti mühafizə sahəsində 6 cinayət işi, Kənd Təsərrüfatı Nazirliyinin 3 əməkdaşı barəsində 2 cinayət işi, ticarətlə məşğul olan 18 şəxs barəsində 17 cinayət işi, Dövlət Torpaq və Xəritəçəkmə Komitəsinin 3 əməkdaşı barəsində 2 cinayət işi, iqtisadi fəaliyyətlə məşğul olan 10 şəxs barəsində 7 cinayət işi, prokurorluq orqanlarının 1 əməkdaşı barəsində 1 cinayət işi, polis əməkdaşları barəsində 1 cinayət işi, Ədliyyə Nazirliyinin 2 əməkdaşı barəsində 2 cinayət işi, Fövqəladə Hallar Nazirliyinin 6 əməkdaşı barəsində 4 cinayət işi və özəl sahədə fəaliyyət göstərən 93 vəzifəli şəxs barədə 39 cinayət işi açılıb.



Ölkənin ən çox korrupsiyalaşmış strukturlarından sayılan vergi və gömrük orqanlarının adının bu siyahıda yer almaması təəccüb doğurur. İdarə rəisi bunu həmin qurumlardan şikayətlərin daxil olmaması ilə izah etdir: “İdarə konkret şikayətlər əsasında araşdırma aparır. Bu qurumlardan şikayətlər olsa araşdırarıq”.

Kamran Əliyev ölkədə sistemli şəkildə korrupsiya hallarına rast gəlindiyini də açıqlayıb: “Azərbaycanda sistemli korrupsiya halları müəyyən edilir, bununla bağlı cinayət işləri açılır və cinayəti törədən şəxslər qrup halında məhkəmələrə cəlb edilir”.

Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsinin koordinatoru, “Konstitusiya” Araşdırmalar Fondunun prezidenti Əliməmməd Nuriyev idarənin bu sahədə gördüyü işləri təqdir etsə də, bəzi çatışmazlıqların olduğunu bildirdi: “Şəffaflıq və hesabatlılıq tam təmin edilməyib. Yaxşı olardı ki, növbəti hesabatlarda hansı məmur kateqoriyasının cəzalandırılması əksini tapsın. Bəzi vəzifəli şəxslər öz postlarından sui-istifadə edir ki, bu da korrupsiya risklərini artırır. Nazirlərin rayonlarda qəbul keçirməsi yaxşı haldır. Ancaq onlardan aşağı ranqlı məmurlar Bakıda qəbul keçirmək istəmirlər. Vətəndaşlarla birbaşa ünsiyyətdən yayınırlar. Yaxşı olardı ki, nazirlərin keçirdikləri qəbulların da nəticələri ictimaiyyətə açıqlansın. İctimaiyyət də bilsin ki, vətəndaşlar daha çox hansı problemlərdən əziyyət çəkir”.