Fasilələrlə verilən elektrik enerjisindən qazanc əldə edənlər.

Hələ qışın sərt üzünü görməmiş, vətəndaşlar artıq müxtəlif problemlərlə üzləşirlər.

Bu problemlər sırasında təbii ki, ilk yeri "Azəriqaz"dan daxil olan şikayətlər tutur. Daha sonra ikinci yerdə "Bakıelektrikşəbəkə". Bu iki qurum demək olar ki, öhdələrinə düşən vəzifəni lazımınca yerinə yetirmirlər. Məsələn elə bir gün yoxdur ki, bu qurumlarla bağlı şikayət daxil olmasın. Ümumiyyətlə, bu kimi bəzi qurumlar nəinki işləmir, onlar barəsində deyilən, edilən şikayətlərə belə, əhəmiyyət vermirlər. Əgər belə olmasaydı, ən azından edilən şikayətlərdən nəticə çıxarıb, abonentlərini razı salmağa çalışardılar. Əsasən soyuq aylarda həm "Bakıelektrikşəbəkə”, həm də qaz idarələri gücləndirilmiş iş rejimində çalışmalıdırlar ki, lakin bizlər bu gün bunun əksini görürük. Əksər hallarda işıqlar elə tez-tez sönüb yanır ki, vətəndaşların evində çalışan məişət cihazları ya xarab olur, yaxud da, birdəfəlik sıradan çıxır. Və beləliklə, işıqları söndürərək yığılan bəzi borcları tarazlamaq naminə atılmış addım, vətəndaşların cibinə ziyan vurmuş olur. Abonent həm neçə saat işıqsız qalır, həm də evdəki məişət cihazlarından olmuş olur. Bu gün sözügedən mövzu ətrafında danışmağımızın başlıca səbəbi var. Belə ki, redaksiyamıza daxil olan şikayət əsasında məsələni işıqlandırmağı özümüzə borc bildik. Qeyd edək ki, şikayət Sabunçu Rayon Enerji Satışı və Təchizatı İdarəsindəndir. Daimi oxucularımız xatırlayarlar ki, hələ bir müddət əvvəl sözügedən qurumdan daxil olan şikayət əsasında yazı dərc etmişdik. Qurumun əməkdaşlarının saxtakarlıqla məşğul olduqları, vətəndaşlara əlavə borclar yazmaları barədə məlumatlar vermişdik. Bu gün yenidən məhz Sabunçu Rayon Enerji Satışı və Təchizatı İdarəsindən daxil olan şikayət bu qurumda işlərin qaydasında getmədiyini bir daha göstərmiş olur. Yeri gəlmişkən qeyd edək ki, Sabunçu Rayon Enerji Satışı və Təchizatı İdarəsinin rəisi Toğrul Rəhimovdur. Redaksiyaya daxil olan şikayətə əsasən deyə bilərik ki, sözügedən qurum yalnız öz mənfəəti üçün çalışır. Şikayətçinin dediklərinə görə, Sabunçu rayonunda işıqla bağlı hər zaman problemlər olur. Sabunçu rayonu, Bakıxanov qəsəbəsində isə, ümumiyyətlə, işıqların verilməsində çox tez-tez fasilələr yaranır. Və onlar idarəyə müraciət edən zaman problemləri hələ bir dəfə də, həll edilməyib. Elektriklə bağlı problem yarandığı zaman, idarənin telefonlarına da, cavab verən olmur. Belə ki, yay aylarında elektrik enerjisinin verilməsində elə də vacib problemlər yaşanmasa da, havalar azacıq soyuyan kimi, elektrik enerjisinin verilişində mütəmadi olaraq, fasilələr olur. İşıqların tez-tez sönüb yanması həm evlərin soyuq olmasına, həm də mənzillərdə olan məişət cihazlarının sıradan çıxması ilə nəticələnir. Hələ bu azmış kimi, işıqların anidən sönüb, yanması liftlərin də işləməmisinə səbəb olur. Şikayətçi iddia edir ki, dəfələrlə olub ki, işıqlar sönərkən, liftdə vətəndaşlar qalıb. Və işıqlar yanana qədər, həmin şəxslər liftdə gözləməli olublar. Bu kimi problemləri həll etmir, vətəndaşları ziyana salırlar, amma ay tamam olmamış, borc qəbzlərini mənzillərin qapısına qoyub gedirlər. Görünən odur ki, Toğrul Rəhimov ona həvalə edilən işlərin öhdəsindən gələ bilmir. Əgər belə olmasaydı, onun rəhbərlik etdiyi qurumdan ard-arda şikayətlər daxil olmazdı. Həmçinin nəticə çıxarmaq istəsəydi də, mövcud problemlər həll edilər və vətəndaşlar narazı olmazdılar.