KXCP-nin bəyanatı


Klassik Xalq Cəbhəsi Partiyası
KXCP sədrinin müavini Oqtay Gülalıyevin yetkinlik yaşına çatmayan övladlarının Bakı şəhər Baş Polis İdarəsində (BŞBPİ) istintaqa və məktəbdə xüsusi yoxlamalar keçirilməsindən narahatlığını bildirən KXCP bəyanat qəbul etmişdir. Bəyanatda deyilir:
Vəzifələri vətəndaşların təhlükəsizliyi və konstitusion haqlarını təmin etmək, İnsan Haqları bəyannaməsi və Avropa Konvensiyasının şərtlərini qəbul edən hökumətin icra strukturu olaraq ədaləti bərpa etmək olan məhkəmə və hüquq mühafizə orqanları vətəndaş cəmiyyətinə qarşı repressiya alətinə, cəza aparatına çevrilib.
Ötən il prezident seçkilərini total saxtalaşdıraraq hakimiyyəti növbəti dəfə qanunsuzluqla zəbt etmiş Əliyev rejimi tərəfindən siyasi müxalifəti sıradan çıxarmaq, vətəndaş cəmiyyətini məhv etmək, medianı ələbaxım vəziyyətə salmaq üçün artıq hər bir azad söz sahibinin ailə üzvləri, az yaşlı uşaqları repressiya maşınının hədəfinə çevrilmişdir.
2013- cü ilin prezident seçkiləri ərəfəsində prezidentliyə keçmiş namizəd Cəmil Həsənlinin və Milli Şuranın mətbuat katibi, Klassik Xalq Cəbhəsi Partiyası sədrinin müavini, hüquq müdafiəçisi Oqtay Gülalıyevin yetkinlik yaşına çatmamış oğlu Ə.Gülalıyev bir ildən çox sürən “istintaq”ının nəticəsində heç bir sübut olmadan xuliqanlıq ittihamı ilə 6 ay müddətinə islah işlərinə cəlb edilmişdir. Bu “istintaq” başa çatar-çatmaz həmin Bakı şəhər Baş Polis İdarəsinin (BŞBPİ) Ağır Cinayətlər şöbəsi bir daha fəaliyyətə keçərək Oqtay Gülalıyevin yetkinlik yaşına çatmamış iki övladını yenidən sorğuya cəlb etmişdir.
Göründüyü kimi, bu sorğular davamlı olacaq. Artıq bir bir müddətdir ki,davamlı “sorğular” aparan BŞBPİ-nin əməkdaşları bu uşaqların təhsil aldığı 165 saylı orta məktəbdə "araşdırma"lar aparır, məktəbli uşaqlar barəsində “məlumatlar” toplayırlar. Uşaqların dərsə davamiyyəti, aldığı qiymətlər, kimlərlə oturub durduqları ilə maraqlanırlar. Bunlar azmış kimi məktəbin direktoru, müəllimləri, məktəbliləri "qorotdel"-ə çağrılılır, izahatatlar alınır(!?). Görünən odur ki, BŞBPİ-nin vasitəsiylə Oqtay Gülalıyein övladlarına qarşı növbəti ittiham dosyesi hazırlanır. Qos-qoca BŞBPİ-nin vəzifəli, rütbəli müstəntiqlərinin orta məktəblərdə Təhsil nazirliyinin funksyalarını icra edərək pedaqoji inspektorlar sayağı araşdırma aparması, sinif jurnallarını, şagirdlərin dərsə davamiyyətini yoxlaması hakimiyyət orqanlarının hansı acınacaqlı vəziyyətə düşdüyünü göstərir. Oxşar basqıları Cəmil Həsənlinin qızına, Rafiq Daşdəmirlinin oğluna qarşı aparanlar, Gültəkin Hacıbəylinin oğlunu əlindən almaq istəyənlər, valideynləri övladları ilə sınağa çəkənlər unutmasınlar ki, bu rəzillik onların özlərini ifşa etməklə hakimiyyətlərin əsil mahiyyətini üzə çıxarmaqla ömrünü azaldırlar.
Dövlətin resurslarını insanların maddi-rifah halının yaxşılaşmasına, onların haqlarının müdafiəsinə, layiqli təhsil, tibbi, sosial, kommunal və s. xidmətlərlə təmin olunmasına, gənclərin normal şəxsiyyət kimi formalaşmasına deyil, vətəndaşlarını repressiyalara məruz qoymaqla 1937- ci il sayağı qorxu, xof altında saxlamağa həsr edən hakimiyyət, çıxılmaz vəziyyətə saldığı Qarabağ problemi, minimum əmək haqqının səviyyəsi, rüşvət və korrupsiyanın həcmi, sosial xidmətlərin bərbad durumu, qanunsuz həbslər və s. sahələrdə mövcud olan fəlakətli durumdan cəmiyyətin diqqətini yayındırmaq istəyir.
KXCP hakimiyyətdən, vətəndaşlara qarşı sərgilənən qanunlara zidd, milli-mənəvi dəyərlərdən uzaq bu cür fəaliyyətin durdurulmasını, insanların qanunlara uyğun azad fəaliyyət göstərməsinə şərait yaradılmasını, dövlət orqanlarının konstitusiya uyğun fəaliyyət göstərməsinə şərait yaradılmasını tələb edir.