Son zamanlar bəzi məmur balaları cəmiyyətdə özlərini apara bilmirlər. Qudurğanlıq edirlər. Öz qeyri-insani hərəkətləri ilə insanlara ziyan verirlər. Baxmayaraq ki, ölkə başçısı da dəfələrlə bu məsələdə yüksək vəzifəli şəxslərə xəbərdarlıq edib. Lakin məmur balalarının özbaşınalığı hələ də davam edir. Xüsusilə də bahalı avtomobilləri sürərək qəzalar törədirlər. Və günahsız insanların ölümünə səbəb olurlar. Bir sözlə, bu şəxslər o qədər harınlayıblar ki, insan həyatı onlar üçün heç nəyə çevrilib.
Dekabrın 2-də saat 15 radələrində 1975-ci il təvəllüdlü, Şabran şəhər sakini Kamran Süleymanov idarə etdiyi "Mercedes Benz-E320" markalı, 90-XG-046 dövlət nömrə nişanlı avtomobillə Şabran şəhəri, M.Rəsulzadə küçəsində hərəkətdə olarkən yolu keçmək istəyən piyada Fikrət Əfəndini vurub. Nəticədə piyada aldığı xəsarətlərdən hadisə yerində vəfat edib. Faktla bağlı Şabran şəhərində baş verən yol nəqliyyat hadisəsi ilə əlaqədar cinayət işi başlanıb. Bəlli olub ki, 62 yaşlı piyadanı vuran Şabran rayon sakini Süleymanov Kamran Nadir oğlu deputat Tahir Süleymanovun qardaşı oğludur. Deputatın qardaşı və hadisəni törədən şəxsin atası Şabran rayonu Maliyyə Idarəsinin rəis müavinidir. Qeyd edək ki, xəsarət alan şəxs Şabran Mərkəzi Rayon Xəstəxanasına çatdırılsa da, onu xilas etmək mümkün olmayıb. Bu, nə birinci, nə də sonuncu belə hadisədir. Vəzifə sahiblərinin övladlarının son vaxtlar törədikləri avtomobil qəzaları ilə bağlı statistik araşdırmanı diqqətinizə çatdırırıq.
Sabirabad rayon İcra Hakimiyyətinin başçısı Nazim İsmayılovun kiçik oğlu qəza törətməklə mətbuat səhifələrinə düşüb. Hadisə Pambıq Zavodunun qarşısında baş verib. Atasının xidməti 54 AA 001 nömrə nişanlı "Prado” avtomobilini idarə edən oğul İsmayılov birdən-birə iki "VAZ 06” markalı "jiquli”ni əzib. Maşınlardan biri yararsız hala düşüb. Zədələnən "Jiquli”lərdə həmin vaxt adam olmayib. Onlar yaxınlıqdakı aptekdə imiş.
Kürdəmirdə Heydər Əliyev prospektində ölümlə nəticələnən ağır yol-nəqliyyat hadisəsi baş verib. Kürdəmir sakini 1997-ci il təvəllüdlü Sadıqzadə Rahim İbrahim oğlu "Hyundai Santafe” markalı avtomobillə Bakı prospektindən Heydər Əliyev prospekti istiqamətində hərəkət edərkən yolu keçən piyada - 1948-ci il təvəllüdlü Hümbətova Şükufə Qaraş qızını vurub. 65 yaşlı qadın aldığı xəsarətlərdən hadisə yerində keçinib. İlkin məlumata görə, avtomobil 16 yaşlı oğlanın babasına məxsus olub. Hadisə baş verən gün o, avtomobili ailəsindən xəbərsiz götürərək qəza törədib. R.Sadıqzadə yolun sağ tərəfindən sol tərəfinə keçərkən idarəetməni itirib. Qəza törətmiş şəxs Kürdəmir Rayon Polis İdarəsinin cinayət-axtarış bölməsinin baş əməliyyat müvəkkili, polis mayoru İbrahim Sadıqzadənin oğludur. Baş Dövlət Yol Polis idarəsinin İstintaq və Təhqiqat Şöbəsinin müstəntiqi Hikmət Kərimovun verdiyi məlumata görə, baş verən qəza zamanı piyadanın cəsədi bir neçə hissəyə parçalanıb. Onun dilini isə qəza yerindən xeyli aralıda tapa biliblər.
Bərdə şəhərinin icra nümayəndəsinin avtoxuliqan oğlu da qəza törədən vəzifəlilərin övladları sırasına daxil olub. Bərdə şəhərində Hüsü Əliyev küçəsində "Mercedes" markalı avtomobillə "Qaz-24" markalı 2 maşının toqquşması nəticəsində sürücülər xəsarət alıb. "Mercedes"in sahibi Bərdə şəhərinin icra nümayəndəsi Əli Fərzəliyevin avtoxuliqan kimi tanınan oğludur. Amma icra nümayəndəsi qəzaya görə digər avtomobilin sahibini günahlandırıb: "Oğlum elə bilib ki, saxlayıb yol verəcək. O da yol verməyib, toqquşublar". Ə.Fərzəliyev oğlunun adını deməkdən imtina edib: "Adı nəyə lazımdır? Ümumiyyətlə, xəbər hazırlamaq lazım deyil. Olan xəbərləri də dayandırdıq".
Bir müddət əvvəl Tərtər rayonunda icra başçısının müavini Vidadi Bəylərovun oğlu avtoxuliqanlıq edərkən, bir gəncin həyatına son qoyub, digərinin isə ömürlük şikəst qalmasına səbəb olub. Vidadi Bəylərovun oğlu başqa bir gənclə avtoşluq edirmiş. "Yarışa" çıxan icra başçısının müavininin oğlu "rəqib"ini sıxışdıraraq, yoldan çıxmağa məcbur edib. Nəticədə isə həmin gənc idarəetməni itirərək yol kənarındakı kanala düşüb. Hadisə nəticəsində aldığı zədələrdən sonra həmin gənc dünyasını dəyişib. Qəzadan sonra isə maraqlı faktlar ortaya çıxıb. V.Bəylərovun oğlunun törətdiyi avtoqəzanı araşdıran müstəntiq Nəsimi Hüseynov əvvəlcə avtoqəzanın olmadığını söyləyib. Lakin sonradan bir avtoqəza olduğunu, lakin məmur oğlunun həmin qəzanın iştirakçısı deyil, şahidi olduğunu deyib: "Bu qəza mart ayının 17-də olub və qəza nəticəsində sürücü Ramil Azər oğlu Quliyev dünyasını dəyişib. Maşın yoldan çıxıb və bir nəfər ölüb. Lakin Vidadi Bəylərovun oğlu qəzaya düşən şəxsi xəstəxanaya aparıb". Bununla belə həmin olaydan sonra məmur oğluna bir söz deməsələr də, atasını işdən çıxardılar.
Ağdam rayonu ərazisində vəzifəli şəxsin övladının iştirakı ilə avtoxuliqanlıq hadisəsi qeydə alınıb. "Dövlətqaçqınkom"un Ağdam şöbəsinin müdiri Qabil İbadovunoğlu yol qəzası törədib. Onun idarə etdiyi "Mersedes" markalı maşın KAMAZ-la toqquşub. Ötmə zamanı baş verən hadisədə günahın məmur oğlunda olduğu bildirilir. Hətta bunu özünün Facebook profilində də qeyd edən həmin gənc təsdiq edib ki, hadisə avtoxuliqanlıq etdiyi zaman reallaşıb və günah da özündə olub. Qolundan və bir neçə yerindən zədə alan məmur övladı bunları boynuna almasına rəğmən, atası Qabil İbadov bütün günahı KAMAZ-ın sürücüsünün üzərinə yıxmağa çalışıb.

Bu hamısı deyil...