Ər arvadına atdığı güllənin dəymədiyini gördükdə maşını onun üstünə sürüb
Gürcüstanın azərbaycanlıların kompakt yaşadığı Qaraçöp (Saqareco) bölgəsinin Tüllər kəndində cinayət hadisəsi baş verib. gundemxeber.az APA-ya istinadən məlumatına görə, bu barədə Gürcüstan Daxili İşlər Nazirliyi məlumat yayıb. Bildirilir ki, şənbə günü Tüllər kənd sakini Elimxan Yadigarov həyat yoldaşı Məleykə Yadigarovaya silahdan atəş açıb. Güllə qadına dəyməyib. Bu zaman E.Yadigarov maşını ilə həyat yoldaşının üstündən keçib və nəticədə M.Yadigarova dünyasını dəyişib.
Daxili İşlər Nazirliyindən verilən məlumata görə, hadisəni törətməkdə təqsirli bilinən E.Yadigarov saxlanılıb. Onun törətdiyi əməli etiraf etdiyi bildirilir. Faktla bağlı cinayət işi başlanıb. Onun avtomobili araşdırma aparmaq üçün götürülüb.
Məlumata görə, 41 yaşlı Elimxan Yadigarovun Məleykə Yadigarova ilə nikahından övladları var və oğlu evlidir.