Keçən günlərdə Binab şəhərinin təhlükəsizlik qüvvələri azərbaycanlı fəal Bəhmən Xaliqinin iş yerinə gedib və ona hədə-qorxu gəliblər.

GünAz TV mətbuat mərkəzinin əldə etdiyi məlumata görə, təhlükəsizlik qüvvələri milli-mədəni fəala qarşı nalayiq ifadələr işlədib və mağazasını bağlamaqla hədələyiblər. Məmurlar fəalı mədəni fəaliyyətlərini davam etdirəcəyi təqdirdə yenidən həbs edilə biləcəyi ilə təhdid ediblər.

Təhdid edən məmurlar arasında azərbaycanlı fəallara qarşı öz kobud rəftarları ilə seçilən Rəhim Bənayi də olub. O bundan öncə Məlikan şəhəri Polis İdarəsinin Təhlükəsizlik Bölümünün rəisi olub və son zamanlar Binab şəhərinə intiqal edilib.

Qeyd edək ki, B.Xaliqi noyabrın 10-da (abanın 19-da) 6 aylıq həbsdən sonra azadlığa buraxılıb.