Məhsəti 11 küçəsində avtomobil yolu bərbad vəziyyətdə olsa da,
yolu bağlayıb Xəzər Universitetinin həyətyanı sahəsinə çeviriblər...

“Vallah biz xaricdə villa alanı da görmüşük, dənizkənarını hasarlayıb özünküləşdirəni də, başqasının evini söküb özünə malikanə ucaldanı da. Ancaq birinci dəfədir görürəm asfalt yolunu zəbt edəsən. Qardaş, nə gedə bilirik, nə gələ. “Sehrli xalat” kinosunda deyildiyi kimi “saraya yaxınlaşmırdıq, yanından keçirdik”, İndi biz də bu universitetin yanından keçə bilmirik. Yolu kəsib, beş-altı daş töküblər küçəyə asfaltı bağlayıblar. Nə bizi burda dayanmağa qoyurlar, nə də piyadalar hərəkət edə bilir” - Nizami rayonunda yerləşən Azərbaycanın ən reytinqli təhsil müəssisələrindən biri olan Xəzər Universitetindən şikayətlənən taksi sürücüsü Nadir Kərimov belə deyir.
Onun sözlərinə görə, universitet Məhsəti 11 küçəsini işğal edib və özünə həyətyanı sahəyə çevirib. Əraziyə də tikinti materialları cəlb olunub və abadlıq işlərinin görülməsinə hazırlıq gedir. Buna görə də əvvəllər yaxınlıqda dayana bilən sürücüləri indi ora buraxmırlar. Yol park salınması adı ilə ələ keçirilib və nəqliyyatın hərəkətinə imkan verilmir. Doğrudur, Məhsəti 11 küçəsi bərbad vəziyyətdədir, asfalt tökülməsinə ehtiyac var. Yerə yağış düşən kimi bu yol çala-çuxur, gölməçəyə çevrilir. Odur ki, asfalt çəkilsə heç də pis olmaz. Ancaq bu əsas vermir ki, universitet rəhbərliyi küçənin tən ortasını özəlləşdirib parka çevirə.

Üstəlik, Xəzər universiteti ilə üzbəüz park yerləşir və vətəndaşlar istədiyi vaxt gedib orada istirahət edə bilərlər. Dünən sözügedən massivdə olarkən taksi sürücülərinin şikayətlərini dinlədik, gündəlik bu yoldan istifadə edən piyadaların fikrini öyrəndik. Sürücülər deyirlər ki, avtomobillə bu yoldan istifadə edə bilmir. Yol hər iki istiqamətdən iri daşlarla bağlanıb, əraziyə tikinti malları gətirilib və yaxın vaxtlarda təmir işlərinə start veriləcək. Sürücülərdən öyrəndik ki, Nizami rayon rəhbərliyi küçəni universitetə satıb. Bu faktı axirətin əlaməti adlandıran şoferlər deyirlər ki, dünyanın heç bir yerində belə hala rast gəlmək olmaz.
Sürücü Fariz Əsədovu dinləyək: “Məhsəti 11 küçəsi Nizami rayon məhkəməsinə gedən yoldur. Buradan həmişə nəqliyyat hərəkət edib. İndi yolu kəsib bağlayıblar. Məcburuq ki, başqa istiqamətdən gedək. Bu da təzə çıxıb ki, maşın yolunu bağlayıb park salasan. Hər şeyin öz qaydası var. Özü də universitetin qabağı parkdır. Parkın yanında da park olar? Ağıllarına nə gəldi edirlər”. Digər sürücü Etibar Ağayev deyir ki, ya küçəni satıblar, ya da Nəqliyyatın İntellektual İdarəetmə Sistemində işləyənlər çox “ağıllı” adamlardır: “Bizə deyirlər ki, bəs Nizami rayon icra hakimiyyəti küçəni universitetə verib ki, buranı abadlaşdırıb genişləndirsinlər. Universitetin girişini də bir az qabağa çəkib məktəbin həyəti kimi istifadə etsinlər. Dünyanın heç yerində belə iş görmürlər. Yaxşı bəs sürücülər haradan keçsinlər? Buna bir çarə tapılmalıdır”.

Piyadalar isə deyirlər ki, bu küçənin iki səkisi var. Ortada isə park yerləşir. Bu da normal haldır. Ancaq səkinin bir tərəfinin bağlanıb parkın gözünə qatılması artıq bütün parametrlərə ziddir. Artıq xeyli vaxtdır ki, bu vəziyyət görə sürücülər də, piyadalar da əziyyət çəkirlər. Hətta məktəblilər, yaşlı adamlar üçün gediş-gəliş çətinləşib. Günorta saatlarına qədər hər gün tələbələr yol üstündə dayanır və ümumiyyətlə, hərəkət iflic olur.
Nizami rayon sakini Valeh Bağırovun sözlərinə görə, vaxtilə bu yol dağılmamışdı: “İndi bu vəziyyətə düşüb. Gəlib heç olmasa asfalt çəksinlər. Camaat arasında gəzən söhbətə görə, buranı universitetin ərazisinə qatmaq istəyirlər. Hərə bir söz deyir. Amma fakt budur ki, yol qalmayıb və gərək bundan sonra hava nəqliyyatından istifadə edək”. Sakinlərin dediklərini dinləyəndən sonra redaksiyaya qayıdıb Nizami rayon İcra Hakimiyyətinin (RİH) rəsmi saytında sözügedən massivdə abadlıq işləri görülüb - görülməyəcəyi barədə axtarış versək də, qarşımıza hər hansı məlumat çıxmadı...
Aslan