Səhiyyə Nazirliyi “Murad Farm” MMC-nin fəaliyyətini dayandırıb.
Əhmədli qəsəbəsi, H. Aslanov metrosunun yanında Murad aptekdə şübhəli preparatların satışının aparılması ilə bağlı məqalə dərc edilmişdi. Məqalədə göstərilənləri yerində araşdırmaq üçün Azərbaycan Respublikası Səhiyyə Nazirliyi Analitik Ekspertiza Mərkəzinin mütəxəssisləri tərəfindən yanvarın 21-də Bakı şəhəri, Xətai rayonu, X. Məmmədov küçəsi, 2944A saylı məhəllə ünvanında fəaliyyət göstərən Murad Farm MMC-nə məxsus (lisenziya nömrəsi 026288, qeydiyyat nömrəsi 1612, verilmə tarixi 06.01.2011) aptek təşkilatında yoxlama keçirilib.
Nazirlikdən virtualaz.org saytına verilən məlumata görə, keçirilən yoxlama zamanı aptekdə satışı aparılan və dövlət qeydiyyatına alınmamış 46 adda dərman preparatı aşkarlanaraq müsadirə edilib. Həmçinin, yoxlama zamanı aptekdə reseptlə satılmalı olan psixotrop dərman vasitələrinin reseptsiz satışının aparılması və xüsusi saxlama rejimi tələb olunan termoləbil dərman vasitələrinin saxlanma şəraitinə riayət olunmaması faktları da müəyyən edilib.
Apteklərdə resept təqdim edilməklə buraxılmalı olan dərman vasitələrinin reseptsiz buraxılması faktına görə “Muad Farm” MMC-nə Azərbaycan Respublikasının İnzibati Xətalar Məcəlləsinə müvafiq olaraq protokol tərtib olunub.
Yuxarıda qeyd olunanları nəzərə alaraq Azərbaycan Respublikasının Səhiyyə Nazirliyi tərəfindən Murad Farm MMC-nə pərakəndə satış əczaçılıq fəaliyyətinə verilmiş xüsusi razılığın (lisenziyanın) fəaliyyəti dayandırılıb.