Ötən gün saat 22 radələrində Bakının Nizami rayonunda əmioğlular arasında bıçaqlanma olub.

Nizami rayon Polis İdarəsi 24-cü polis bölməsinin təhqiqatçısı Müşfiq Musazadənin ANS PRESS-ə verdiyi məlumata görə, hadisə Rüstəm Rüstəmov küçəsində qeydə alınıb.

Belə ki, 1985-ci il təvəllüdlü Elşən Rzayev münaqişə zəminində əmisi oğlu 1986-cı il təvəllüdlü Etibar Rzayev tərəfindən bıçaqlanıb. E.Rzayev müxtəlif bədən xəsarətləri ilə xəstəxanaya yerləşdirilib.

Hadisəni törədən Etibar Rzayev saxlanılıb. O, istintaqa verdiyi ifadədə bildirib ki, əmioğlusu ilə birlikdə evlərində yeyib-içiblər. Söhbət zamanı qohumu söyüş söyüb. Orada onun həyat yoldaşı da olub.

Etibar Rzayev əmioğlununun həyat yoldaşının yanında biədəb danışmasına əsəbləşib. Bu səbəbdən də onu vurub.

Faktla bağlı araşdırmalar davam edir.