Narkotiklə şərlənənərək həbs olunan gənc dövlət qurumlarını məhkəməyə verdi
Bir müddət əvvəl narkotik vasitələrin qanunsuz dövriyyəsi ittihamı ilə həbs olunan Gürcüstan vətəndaşı, 1984-cü il təvəllüdlü Bayram Niyazovun cinayət əməli sübuta yetirilməyib və onun barəsində Gəncə Ağır Cinayətlər Məhkəməsi bəraət hökmü çıxarıb. Hökmdən Baş prokurorluq apelyasiya protesti versə də, Gəncə Apelyasiya Məhkəməsi və Ali Məhkəmə bəraət hökmünün qüvvədə saxlayıb.
İddiaçı Bayram Niyazov cavabdehlərin qanunsuz hərəkətləri nəticəsində fiziki şəxslərə vurulmuş ziyanın ödənilməsinə dair iddia ərizəsi ilə 1 saylı Bakı İnzibati-İqtisadi Məhkəməsinə müraciət edib. O, cavabdeh qismində Daxili İşlər Nazirliyini, Nəqliyyatda Baş Polis idarəsini və Maliyyə Nazirliyini göstərib.
Bayram Niyazov cavabdehlərdən kompensasiya şəklində 12200 manat maddi, 50000 manat mənəvi, cəmi 62200 manat pulun cavabdehlərdən birgə tutularaq ona ödənilməsi barəsində qətnamə qəbul edilməsini məhkəmədən xahiş edib. Onun iddia ərizəsi hakim Şərafət Məmmədovun icraatına verilib.
Qeyd edək ki, Gürcüstan vətəndaşı, 1984-cü il təvəllüdlü Bayram Niyazov narkotik alverinə görə həbs edilib. İstintaq sənədlərinə görə, onun tutulması üçün əməliyyatı Daxili İşlər Nazirliyinin Baş Narkotiklərlə Mübarizə İdarəsinin qərb bölgəsi üzrə regional şöbəsi və Gəncə stansiyası xətt polis şöbəsinin əməkdaşları keçirib. Bayram Niyazov guya narkotik vasitə satarkən saxlanılıb.
İttihama görə, əməliyyat 25 iyun 2012-ci il tarixində keçirilib. Bayram Niyazov həmin gün Balakən rayonunun Sarıbulaq kəndi ərazisində baxımsız sahədə bitən çətənə kollarını yığıb. O, narkotik vasitə hesab olunan marixuananı Elşad Məsiyevlə birlikdə Gəncə şəhərinə gətirib. Həmin gün saat 17.00-da şərti alıcı olan Gəncə stansiyası xətt polis şöbəsinin cinayət axtarış bölməsinin baş əməliyyat müvəkkili, polis mayoru Vüqar Qədirova 2159,78 qram narkotik vasitəni 3 min ABŞ dollarına satarkən həbs edilib. Bayram Niyazov Cinayət Məcəlləsinin 234.4.3-cü (qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə ittiham edilib, cinayət işi baxılması üçün Gəncə Ağır Cinayətlər Məhkəməsinə göndərilib. Cinayət işi hakim Elbəyi Allahverdiyevin sədrliyi ilə keçirilən prosesdə araşdırılıb.
Məhkəmə araşdırması zamanı Bayram Niyazovun uşaqlıqdan xəstə olması müəyyən olunub. O, daimi ürəkgetmədən və ruhi xəstəlikdən əziyyət çəkib. Məhkəmədə həmçinin Bayram Niyazovun şərlənərək həbs edildiyi aydınlaşıb. Onun vəkili Ceyhun Yusifov iş üzrə narkotik vasitələrin tapılması zamanı hal şahidi olmuş Kəramət Məmmədov və Tofiq Hüseynovun narkotik vasitələrlə bağlı çoxsaylı cinayət işlərində iştirak etdiklərini sübuta yetirib. Vəkilin Gəncə şəhəri Nizami və Kəpəz rayon məhkəmələrinə, eləcə də Gəncə Ağır Cinayətlər Məhkəməsindən aldığı sorğulardan məlum olub ki, ibtidai istintaq zamanı Bayram Niyazov həbs olunan zaman hal şahidi qismində dəvət edilmiş Kəramət Məmmədov və Tofiq Hüseynov mütəmadi olaraq müxtəlif cinayət işləri üzrə keçirilmiş axtarış və götürmə hərəkətləri zamanı hal şahidi qismində iştirak ediblər. Müdafiə tərəfinin məhkəməyə təqdim etdiyi arayışlardan o da müəyyən olunub ki, hər iki hal şahidi 2011-2013-cü illər ərzində baxılan 27, məhkəmə istintaqı zamanı 2 cinayət işində iştirak ediblər. Kəramət Məmmədov və Tofiq Həsənov ümumilikdə 29 cinayət işində hal şahidi olublar. Həmçinin Bayram Niyazovu Gəncə şəhərinə aparan Elşad Məsiyevin polisin təhrikçisi olduğu, başqa 5 rayonda da belə cinayət işlərində iştirak etdiyi üzə çıxıb. Eyni zamanda ekspertiza rəyindən məlum olub ki, Bayram Niyazov da tapılan narkotik vasitənin tərkibi digər cinayət işləri üzrə olan narkotik vasitələrin tərkibi ilə eynidir. Məhkəmə hökm elan edən zaman Bayram Niyazovun əməlində cinayət tərkibi görməyib.
Məhkəmə Bayram Niyazovun barəsində bəraət hökmü çıxarıb və məhkəmə zalından azadlığa buraxıb. Hakimlər Bayram Niyazovun həbsində iştirak edən Elşad Məsiyevin polisin təhrikçisi olması nəticəsinə gəliblər. Buna görə də Elşad Məsiyev və əməliyyatda iştirak edən əməliyyatçılar barəsində xüsusi qərardad çıxarılıb.
Hökmdən prokuror Rizvan Həsənov apelyasiya protesti verib. Prokuror Gəncə Ağır Cinayətlər Məhkəməsinin hökmünün ləğv edilməsini və Bayram Niyazovun barəsində ittiham hökmünün çıxarılmasını istəyib. Prokurorun şikayətinə Gəncə Apelyasiya Məhkəməsində baxılıb. Hakim Bədəl Əliyevin sədrliyi ilə keçən prosesdə prokurorun şikayəti təmin edilməyib. Prokurorluq Ali Məhkəməyə müraciət etsə də, rədd cavabı alıb.
Bayram Niyazovun vəkili Ceyhun Yusifov bildirib ki, istintaq zamanı Bayram Niyazovun günahsız olması ilə bağlı dəfələrlə vəsatət qaldırıb: “İstintaq orqanı şər-böhtan xarakteri daşıyan əməli həqiqət kimi qəbul edib və ruhi xəstə Bayram Niyazovu narkotik vasitələrin qanunsuz satışında təqsirli bilib. Lakin birinci məhkəmə instansiyasında Bayram Niyazovun əməli sübuta yetirilməyib. Buna görə də onun barəsində bəraət hökmü çıxarılıb. Məhkəmə Elşad Məsiyevin polis əməkdaşları ilə birgə işlədiyini sübuta yetirib. Buna görə də Elşad Məsiyev və polis əməkdaşlarının əməlinə hüquqi qiymət verilməlidir. Belə bir tədbir görüləndən sonra Bayram Niyazov kimi günahsız insanlar şərlənərək həbs edilməyəcək”.
Ceyhun Yusifov qeyd edib ki, Gəncə Ağır Cinayətlər Məhkəməsi Bayram Niyazovun bəraət alması ilə bağlı hökm elan edilib. Onun sözlərinə görə, məhkəmə araşdırması zamanı onun külli miqdarda narkotik vasitənin satışında təqsirsiz olduğu sübuta yetirilib: “Hesab edirəm ki, qanunun tələbinə uyğun olaraq Bayram Niyazovun şərlənməsi ilə bağlı tədbir görülməli, şərlənmədə iştirak eləmiş polis əməkdaşları və polisin təhrikçiləri məsuliyyətə cəlb olunmalıdırlar”.
Vəkil Ceyhun Yusifov əlavə edib ki, cinayət işinin materiallarına və məhkəmə hökmünə əsasən, 3 kiloqrama yaxın narkotik vasitənin qanunsuz dövriyyədə olması ehtimalı irəli sürüldüyündən, həmin narkotikin n mənbəyi mütləq müəyyən edilməli və təqsirli şəxslər cinayət məsuliyyətinə cəlb olunmalıdırlar. Vəkilin sözlərinə görə, həmin narkotik maddə Bayram Niyazovun üzərindən tapılmayıb: “Mübahisəsiz şəkildə aydın olur ki, maddi sübut kimi tanınmış narkotik vasitənin həmin əraziyəkimlər tərəfindən və hansı şəraitdə gətirilməsi ümumiyyətlə aydınlaşdırılmayıb. Bu, hüququn fəlsəfəsinə zidd olmaqla yanaşı, müvəkkillimində hüquq və mənafeyinə toxunur. Bayram Niyazovun şərlənərək tutulması üçün əməliyyatı quran polis əməkdaşları barəsində müvafiq tədbirlər görülməli, ibtidai istintaqa prosessual rəhbərlik etmiş prokurorun hərəkətinədə diqqət yetirilməlidir. Amma bu günədək adları birbaşa məhkəmə aktı ilə təhrikçilikdə və günahsız şəxsi narkotik satışında şərləyən şəxslər barəsində heç bir tədbir görülməyib. Həmin şəxslər bu gün də hüquq-mühafizə orqanlarında öz fəaliyyətlərini davam etdirirlər. Onların hərəkəti birbaşa polisin imicinə, hüquq-mühafizə orqanlarının fəaliyyətinə kölgə salır. Hesab edirəm ki, həmin şəxslərin qanunsuz hərəkəti nəticəsində uzun müddət həbsdə saxlanılan Bayram Niyazovun haqqı çatır ki, bu qanunsuzluqla bağlı görülən tədbirlərin real nəticəsi barədə məlumatlandırılsın. Buna görə də həm mən, həm də müvəkkilim Daxili işlər nazirindən bu hadisəni öz nəzarətinə götürməsini və lazımı tədbir görülməsi üçün göstəriş verməsini xahiş edirik”.
Vəkil həmçinin bildirib ki, cinayət işində polisin təhrikçisi kimi adı hallanan Elşad MəsiyevinBalakən rayonunda azadlıqda gəzməsi və bu günədək əməlinə hüquqi qiymət verilmədiyindən başqa günahsız insanlarında onun qurbanına çevrilməsi ehtimalı qalır.
Ceyhun Yusifovun sözlərinə görə, məhkəmə tərəfindən bəraət alan şəxsin təzminat tələbi ilə məhkəməyə müraciət etməsi nadir hallarda baş verib: “Məhkəmə təzminatı tələb etdiyi halda bundan sonra istintaq orqanları üçün dərs olacaq və bir də günahsız insanların həbs olunmasına şərait yaratmayacaq. Bunun üçün də məhkəmə ədalətli qərar qəbul etməlidir. Belə olan halda günahsız insanların həbs olunması üçün şəraitdə az olar və yaxudda olmaz”.