“Kamaz” sürücüsü qəza törətdi, bərat aldı, Maliyyə Nazirliyini, Bərdə polis və prokurorluq orqanlarından 5 min manat təzminat tələb etdi

Göygöl rayon sakini Səyavuş Əliyev Maliyyə Nazirliyini, Bərdə Rayon Polis Şöbəsi və rayon prokurorluğunu məhkəməyə verib. İddia qalıdlmasına səbəb isə yol qəzası ilə bağlı kompensasiyanın ödənilməməsi olub. Səyavuş Əliyev iddia ərizəsində göstərib ki, 15 yanvar 2014-cü il tarixdə Yevlax-Ağdam yolunun 23-cü kilo metrliyində, Bərdə rayonunun Cəyirli kəndi ərazisindən keçən hissəsində idarə etdiyi “Kamaz-53212” markalı yük avtomobolinin qabaq sağ tərəfi Eyvaz Rzayevin sürdüyü “MAN” markalı avtomobilin arxa sağ yan hissəsi ilə toqquşub.

Nəticədə yol-nəqliyyat hadisəsi baş verib. Hadisə nəticəsində avtomobildə olan sərnişin Kənan Cəfərov sağ əlindən xəsarətlər alıb. Xəsarətlərin yüngül dərəcəli olmasına baxmayaraq Bərdə rayon MTE və PA şöbəsinin eksperti tərəfindən Kənan Cəfərovun bədən xəsarətinin ağırlıq dərəcəsi az ağır xəsarət kimi qiymətləndirilib.

Ondan sonra 30 yanvar 2014-cü il tarixdə Bərdə rayon Polis şöbəsində Səyavuş Əliyevin barəsində Cinayət Məcəlləsinin 263.1-ci maddəsi ilə cinayət işi başlanılıb. Həmin ilin martın 27-də həmin maddədə nəzərdə tutulan ittiham elan olunub və barəsində başqa yerə getməmək haqqında iltizam qətimkan tədbiri seçilib.

İstintaq zamanı Səyavuş Əliyev Kənan Cəfərovun aldığı bədən xəsarətinin ağırlıq dərəcəsinin yoxlanılması barədə vəsatət verib, amma vəsatəti rədd olunub. İş üzrə martın 31-də ittiham aktı tərtib edilərək cinayət işi baxılması üçün Bərdə Rayon Məhkəməsinə göndərilib.

Məhkəmə baxışı zamanı Kənan Cəfərovun aldığı bədən xəsarətinin ağırlıq dərəcəsinin təyin edilməsi barədə vəsatəti təmin edilub və iş üzrə komission məhkəmə-tibbi ekspertizası təyin olunub.

Azərbaycan Respublikası Səhiyyə Nazirliyi MTE və PA Birliyi tərəfindən verilmiş rəydə Kənan Cəfərovun aldığı bədən xəsarətinin küt əşyanın təsirindən törənməsi, avtomobilin salonunda olan qabarıq hissələrə dəymə zamanı yarana bilməsi və yetirilmə müddətinin 15 yanvar 2014-cü il tarixə uyğun gəlməsi, dərəcəsinə görə yüngül zərər

vurmaya aid olması göstərilib. Rəylə dövlət ittihamçısı razılaşmayıb. Dövlət ittihamçısının vəsatəti əsasında iş üzrə təkrar komission məhkəmə-tibbi ekspertizası təyin edilib.

Yenidən ekspertlər tərəfindən Kənan Cəfərovun aldığı bədən xəsarətinin ağırlıq dərəcəsi sağlamlığa yüngül zərərvurma kimi qiymətləndirilib. Bundan sonra Səyavuş Əliyevin əməlində Azərbaycan Respublikası Cinayət Məcəlləsinin 263.1-ci maddəsi ilə nəzərdə tutulmuş cinayət tərkibinin əlamətləri olmadığına görə Bərdə Rayon Məhkəməsinin 12 noyabr 2014-cü il tarixli hökmü ilə ona bəraət verilib, həmcinin barəsində secilmiş başqa yerə getməmək haqqında iltizam qətimkan tədbiri ləğv edilib.

Eyni zamanda hökmdə qanunsuz təqsirləndirilən şəxs qismində cəlb edilməsinə, qətimkan tədbirinin tətbiqi və qanunsuz məhkəməyə verilmə nəticəsində vurulmuş zərərin ödənilməsi hüququ və həmin hüququnun həyata keçirilməsi qaydası ona izah edilib. Gəncə Apelyasiya Məhkəməsinin Cinayət İşləri Üzrə Məhkəmə Kollegiyasının 8 yanvar 2015-ci il tarixli qərarı ilə Bərdə Rayon Məhkəməsinin qeyd olunan hökmü dəyişdirilmədən saxlanılıb. Həmçinin Ali Məhkəmənin Cinayət İşləri Üzrə Məhkəmə Kollegiyasının 16 aprel 2015-ci il tarixli qərarı ilə Gəncə Apelyasiya Məhkəməsinin Cinayət İşləri Üzrə Məhkəmə Kollegiyasının həmin qərarı dəyişdirilməyib.

Səyavuş Əliyev qeyd edib ki, istintaq orqanının qanunsuz və əsassız qərarları – cinayət işi başlanması, təqsirləndirilən şəxs qismində cəlb edilməsi, barəsində başqa yerə getməmək haqqında iltizam qətimkan tədbiri seçilməsi və əsassız məhkəmə məsuliyyətinə verilməsi nəticəsində həm özü, həm də ailə üzvləri əzab-əziyyət çəkib, habelə həyacan və qorxu içində yaşayıblar.

İddiaçının sözlərinə görə, istintaq orqanının həmin qanunsuz və əsassız qərarları nəticəsində psixoloji sarsıntı keçirib, nəticədə əsassız və qanunsuz olaraq məhkəmələrə gedib-gəlmiş və bunun nəticəsi olaraqda ona mənəvi ziyan vurulub.

Bundan əlavə barəsində başqa yerə getməmək haqqında qətimkan tədbiri seçilməklə 8 ay həmin qətimkan tədbirinin təhdidi altında olduğundan, həmin müddətlərdə azadlıq hüququ, daha doğrusu sərbəst hərəkət etmək hüququ pozulub, ölkə ərazisindən kənara çıxa bilməyib.

Səyavuş Əliyev Bərdə rayon Prokurorluğuna, Bərdə rayon Polis şöbəsinə və maraqlı şəxs Maliyyə Nazirliyinə qarşı Göygöl Rayon Məhkəməsində iddia qaldırıb. Ona vurulmuş mənəvi ziyana görə 5000 manat kompensasiyanın və hüquqi yardım üçün vəkilə ödədiyi 200 manatın cavabdehlərdən tutulması və ona verilməsi barədə qətnamə çıxarılmasını xahiş edib.

Göyöl Rayon Məhkəməsi isə Səyavuş Əliyevin iddiasını qismən təmin edib. Dövlət büdcəsindən mənəvi ziyana görə 500 manat və hüquqi yardım üçün vəkilə ödənilmiş 200 manatın alınaraq Səyavuş Əliyevə ödənilməsi, iddia tələbinin qalan hissədə təmin edilməməsi qət edilib.

Məhkəmənin qərarından Maliyyə Nazirliyi narazı qalaraq apelyasiya şikayəti verib. Maliyyə Nazirliyinin şikayətində qeyd olunub ki, birinci instansiya məhkəməsinin qətnaməsi maddi hüquq normalarının pozulması ilə qəbul edildiyindən ləğv edilməli və iddia tələbinin rədd olunması barədə yeni qətnamə qəbul edilməlidir.

Belə ki, iddia tələbindən göründüyü kimi Bərdə rayon Polis şöbəsi tərəfindən iddiaçıya ittiham elan olunaraq onun başqa yerə getməməsi haqqında iltizam qətimkan tədbiri seçilib, Bərdə Rayon Məhkəməsinin hökmü ilə iddiaçıya bəraət verilib.

Nazirliyin nümayəndəsinin sözlərinə görə, Səyavuş Əliyev barəsində sadəcə başqa yerə getməmək haqqında iltizam seçilib, iddiaçı həbs olunmayıb və ya o, hər hansı təcridxanada saxlanılmayıb: “İddiaçı məhkəmənin hökmü ilə azadlıqdan məhrum edilmədiyindən və ona bəraət verildiyindən onun hazırkı iddia tələbi əsassız hesab olunmalı idi. Eyni zamanda işin hallarından aydın olur ki, iddiaçının hərəkətləri nəticəsində faktiki olaraq başqa şəxs xəsarət alıb, xəsarətin dərəcəsi isə ekspert tərəfindən müəyyən edilib. Sonradan ekspertin həmin rəyi düzgün hesab edilmədiyindən iddiaçı bəraət alıb. Belə olan halda işə həmin ekspert cəlb edilməklə baxılıb və müvafiq qərar qəbul edilməli idi. Digər tərəfdən iddia tələbi cavabdehlər - Bərdə rayon Prokurorluğu və Bərdə rayon Polis şöbəsinə yönəlməsinə baxmayaraq, məhkəmə yanlış olaraq iddia tələbini Maliyyə Nazirliyinə qarşı yönəldib, nəticədə qətnamənin nəticə hissəsi onun giriş və əsaslandırıcı hissələri ilə ziddiyyət təşkil edir. Qeyd olunmalıdır ki, mülki qanunvericiliyin tələblərinə görə zərər vuran şəxs və ya delikt törətmiş şəxs mülki hüquq məsuliyyəti daşıyır. Lakin həmin şəxslər məhkəmə prosesinə cəlb

olunmadan işə baxııb və Maliyyə Nazirliyi heç bir delikt törətmədiyi halda son nəticədə yanlış olaraq nazirlik delikt törətmiş şəxs kimi dəyərləndirib. Halbuki mövcud qanunvericilikdə Maliyyə Nazirliyi tərəfindən “Təhqiqat, ibtidai istintaq, prokurorluq və məhkəmə orqanlarının qanunsuz hərəkətləri nəticəsində fiziki şəxslərə vurulmuş ziyanın ödənilməsi barədə” müddəa nəzərdə tutulmayıb. Məhkəmə tərəfindən dövlət büdcəsinin vəsaitinin iddiaçıya ödənilməsi qət edilərkən, həmin vəsaitin gələcəkdə dövlət büdcəsinə bərpası məqsədilə ziyanı vuran təqsirli vəzifəli şəxs müəyyən edilməmişdir. Göründüyü kimi məhkəmə tərəfindən iddiaçının tələbi ilə bağlı qətnamə qəbul edilərkən pul vəsaitinin dövlət büdcəsindən iddiaçının xeyrinə tutulması qət edilib, həmin vəsaitin hansı qaydada dövlət büdcəsinə qaytarılması barədə qətnamədə heç bir izah verilməyib. Beləliklə də tərəflərin bərabərlik prinsipi pozulub”.

Maliyyə Nazirliyinin apelyasiya şikayətinə Gəncə Apelyasiya Məhkəməsində baxılıb. Hakim Rəhman Muradovun sədrliyi ilə keçirilən prosesdə Maliyyə Nazirliyinin apelyasiya şikayəti qismən təmin edilib. Məhkəmə birinci instansiya məhkəməsinin çıxardığı qətnaməni ləğv edib. Yeni qətnamə də dövlət büdcəsindən məniəvi ziyana görə 500 manat, vəkilə ödənilən 200 manat da tutularaq Səyavuş Əliyevə verilməsi qət edilib.

gundemxeber.az