Raqub Məmmədov sələfinin isə cəzalandırıb, keçmiş təhlükəsizlik zabiti rayonda «yeni sistem” tətbiq edib
Ağdamın yeni icra başçısı, keçmiş təhlükəsizlik əməkdaşı Raqub Məmmədov rayonda yeni «sistem» tətbiq etməyə başlayıb.

Bu barədə “Gündəm Xəbər”ə rayonun nüfuzlu sakinlərindən biri məlumat verib. Məlumatda bildirilir ki, təyinatının ilk həftələrində sabiq icra başçısının təyin etdiyi məmurlara «Mən bu rayona rüşvət və korrupsiyanın kökünü kəsməyə gəlmişəm» deyən yeni icra başçısı, əsl sonrakı aylarda niyyətini atdığı addımlarla göstərməyə başladı: «O, bir çox icra başçılarından fərqli olaraq, gələn kimi kadr dəyişikliyi təhdidi ilə məmurları qorxuya salmadı. Tam əksinə, elə vəziyyət yaratdı ki, məmurlar qısa müddət ərzində keçirdikləri psixoloji narahatlıqları arxada buraxdılar. Keçmiş «KQB-nik» Raqub Məmmədov bununla məmurları sakitləşdirib, əsl planını işə saldı. O, bir neçə ay sonra Ağdamda illərdir ki, vəzifə tutan, adları mətbuatın gündəmində hər zaman korrupsioner kimi hallanan məmurlara «hesab» qoydu. Beləliklə, yeni icra başçısı rayonda abadlıq işləri aparmaq adı ilə məkrli planını işə saldı. Və bütün idarə və müəssisə rəhbərləri, mənimsədikləri vəsaitə uyğun, başçının «tələblər»inə boyun əyməyə başladılar».

Məndə bildirir ki, yeni planından ruhlanan icra başçısı, ən böyük zərbəni sələfi Nizami Sadıqova vurub: «O, bir neçə ay ərzində keçmiş başçının rayonda gördüyü işləri araşdırıb, 40 milyona yaxın vəsait mənimsədiyi iddiası ilə çıxış etdi. Və araşdırmanın yekunu olaraq, Baş Prokurorluq yanında Korrupsiyaya Qarşı Mübarizə Baş İdarəsinə müraciət edəcəyi təhdidi ilə, Nizami Sadıqovu özü ilə hesablaşdırdı. Rayonda gəzən və bəzi xəbər portallarında yazılanlara inansaq, Raqub Məmmədov təkcə sələfi Nizami Sadıqovdan bu yolla bir milyon manat pul alıb. Ən maraqlı detal isə, icra başçısı imicinin zədələnməməsi üçün, bu pulu keçmiş başçının rayonda yarımçıq qalmış işlərini bitirmək adıyla aldığını elan etməsi sayıla bilər».

Müsahibimiz deyir ki, yeni icra başçısının rayonda «yerindən tərpətmək» istədiyi yeganə vəzifəli şəxs isə, təhsil şöbəsinin müdirəsi Elmira Şükürova olub: «Bu xanım Ağdama gələn bütün icra başçıları ilə «dil» taparaq, həm vəzifəsini, həm də rayondakı mövqeyini sonadək qoruyub. Buna paralel olaraq, qanunsuz əməllərini də xeyli genişləndirib. Hətta onun bir ara icra başçısı olmaq sevdasına da düşdüyü sirr deyil. Lakin keçmiş başçı Həsən Sarıyevin postuna Nizami Sadıqovun təyin edilməsindən sonra, Elmira Şükürova bu iddiadan geri çəkildi. Raqub Məmmədov isə təyinatının ilk aylarında Elmira Şükürovaya yüksək hörmətlə yanaşsa da, az sonra vəziyyəti dəyişdi. O, Elmira Şükürovanı əvəzləməyə cəhd etdi. Lakin deputat Cavid Qurbanovun qohumu olan müdirə ilə savaşdan məğlub ayrıldı. Yəni o, Elmira Şükürovanı «devirmək» niyyətindən geri çəkildi. Lakin digər məmurlar kimi, təhsil şöbəsi rəhbərinə qarşı vəzifədə qalması üçün birdəfəlik «yardım» və aylıq «hesab» planı qüvvəyə mindi».

Onu da qeyd edək ki, bəzi saytlarda Raqub Məmmədovun Ağdamın baş həkimindən də abadlıq işlərinin aparılması üçün, 70 min manat tələb etməsi barədə də informasiyalar yayılıb. Bu isə yuxarıda deyilənlərə işıq salmaqla bərabər, yeni icra başçısının, əslində, sələflərindən fərqlənmədiyini göstərir.
Qarşı tərəfi də dinləməyə hazırıq.

Cəfər MƏRDANOĞLU