Azərbaycanın dövlətçilik tarixində silinməz izlər buraxan, xalqımızın Ulu Öndəri mərhum prezidentimiz Heydər Əliyevin xidmətləri əsrlər, qərinələr keçsə də heç vaxt unudulmayacaq, yaddan çıxmayacaq. Odur ki, bu gün respublikamızın hər bir guşəsində, onun adı ilə bağlı nə varsa diqqətdə saxlanılır, qayğı da göstərilir. Buna səbəb odur ki, mərhum prezidentimiz ikinci dəfə hakimiyyətə gəlməklə, xalqımızın və dövlətimizin varlğını qoruyub saxlaya bildi, bizi bir çox təhlükələrdən xilas etdi. Bu gün dünyaya şölə saçan Azərbaycanımız, məhz onun fitri istedadı, dəmir iradəsi sayəsində yaşadı və hal-hazırda da varlığını qoruyub saxlamaqdadır.

Bəs görəsən bu gün, onun adı ilə bağlı olan nə varsa, hər kəs tərəfindən lazımınca diqqətdə saxlanılırmı? Bax budur bizi düşündürən hal, götür-qoy etməyə vadar edən məqam! Amma, eşidib bildiyimiz bir həqiqət var ki, Cəlilabadın rayon mərkəzində şəhid Oqtay Eynullayevin adını daşıyan küçədə, mərhum prezidentimizin portretinə hörmətsizlik olunur. Yəni, şəkildən də göründüyü kimi, qeyd olunan küçədə yüksək gərginlikli elektrik naqillərinin keçdiyi elektrik dirəyində, ona məxsus portret asılmışdır. Belə bir halın varlığının nə demək olduğunu anlamasaq da, dərk etdiyimiz düşüncə odur ki, ümumi görkəm Ulu Öndərə bəslənilən hörmətsizliyi göstərir.

Axı, hər kəs bilir ki, Ulu Öndər zaman-zaman yüksək tribunalardan çıxışlar edib, məsul vəzifələr daşıyıb, əhəmiyyət kəsb edən problemlərin həlli ilə məşğul olub, geniş izdihamlar qarşısında və böyük saraylarda saatlarla nitq söyləyib. Bir sözlə o, böyüklüyünü, böyük olduğunu hər vaxt ortaya qoymağı da bacarıb. Odur ki, şəhər və rayonlarımızın mərkəzi yerlərində onun portretləri asılır, müdrik kəlamları yazılır. Bu da aparılan təbliğati işlərimizə, hansısa formada verilən dəstək də olur.

Bu belə olduğu halda, Cəlilabadın rayon mərkəzində, hansı ki, əhalinin daha çox gəlib-keçdiyi bir küçədə, elektrik dirəyinə asılmış portreti gördükdə, bir anlığa da olsa öz-özlüyümüzdə sual edirik. Görəsən rayon rəhbərliyi, əraziyə cavabdehlik daşıyan yerli vəzifə sahibləri, xüsusilə də hüquq mühafizə orqanı əməkdaşları, portreti elektrik dirəyinə asan, “20 Yanvar” cəmiyyəti Cəlilabad rayon şöbəsinin bugünkü sədri, Mürsəlov Mirşamil Miradil oğlundan o qədərmi ehtiyat edirlər ki, ümumi vəziyyətlə barışa bilirlər?

Belə bir olay haqda redaksiyamızı məlumatlandıran mənbə bildirir ki, cəmiyyətin sədri Mirşamil Mürsəlov, həmin küçədə yaşayır və elektrik dirəyi də onun yaşadığı mənzilin olduqca yaxınlığındadır. Bu zaman müəyyən ehtimal irəli sürmək olar ki, o, Ulu Öndərin portretini elektrik dirəyinə asmaqla, hansısa məqsədinə nail olmaq istəyir. Yaxud da cəmiyyətin cədri, ona olan məhəbbətini, sadiqliyini nümayiş etdirir. Düzdür, bütün bunlar bizim mülahizələrimizdir. Amma, məlumatı verən mənbə onu da bildirir ki, M.Mürsəlov vaxtilə özünü Talış-Muğan Respublikasının prezidenti elan etmiş Əlikram Hümbətovun yaxın silahdaşlarından biri olmuşdur. Bu belə olduğu halda, onun Ulu Öndərə sadiqliyi həm böyük şübhələrə yol açır və həm də məqsədinin tamam başqa-başqa amallar üzərində kökləndiyi məlum olur.

Problemin varlığına toxunmaqda məqsədimiz odur ki, bir kimsə hansısa məqsədinə nali olmaq üçün, belə bir gedişlər etməsin.

Çünki, Ulu Öndərin yüksək gərginlikli elektrik dirəyinə bağlanmış portreti, hər kəsi başqa-başqa düşüncələrə daldırır. Təəccüb doğuran hal odur ki, cənab Əziz Əzizov bu gün idarəçiliyini necə həyata keçirir ki, onun səlahiyyət verdiyi vəzifə sahibləri, ümumi mənzərəni görüb susmağa üstünlük verirlər. Axı, cənab rayon rəhbərliyi də, digər vəzifə sahibləri də iş otaqlarında Ulu Öndərin portretini asıb, hər kəsə ona sadiq olduqlarını nümayiş etdirdikləri kimi, istərdik ki, şəhid Oqtay Eynullayevin adını daşıyan küçədə də, sadiqliklərini nümayiş etdirə bilsinlər.Yəni, Ulu Öndərin portreti yüksək gərginlikli elektrik dirəyində deyil, daha məqsədə uyğun yerdə asılsın.

Məlumatı verən mənbə onu da bildirir ki, Ulu Öndərin elektrik dirəyinə bağlanmış portreti, qanuni sənəd-sübutla şəhid Oqtay Eynullayevin adını daşıyan küçədə olsa da, M.Mürsəlov həmin küçənin də adını dəyişdirə bilib. Yəni, o, bir tablo düzəltdirərək, onun üzərinə Zərifə Əliyeva adına küçə yazdırıb. Bu gün də hər kəs görür ki, qeyd olunan küçə Zərifə Əliyevanın adını daşıyır. M.Mürsəlovun bu addımı da böyük şübhələrə yol açır. Axı, hər bir küçənin, ayrı-ayrı ünvanların kimin adını daşıması məsələsi, aidiyyəti üzrə dövlət qurumlarının səlahiyyətinə aid olsa da, bəs M.Mürsəlova hansısa küçənin adını dəyişdirmək ixtiyarını kim verib? Yəqin ki, bu sualın cavabını aidyyəti qurumlar dolğun şəkildə cavablandıra bilərlər.

Hörmətli oxucular! Onu qeyd etmək istəyirik ki, yaşanan problemin varlığı və digər olaylarla bağlı, yerli sakinlər tərəfindən redaksiyamıza xeyli məlumatlar təqdim olunub. Sadəcə olaraq onların araşdırılması bir qədər vaxt apardığı üçün, sizləri yaxın günlərdə məlumatlandıra biləcəyik.

Problemin varlığını diqqətdə saxlayacağıq.

“Gündəm xəbər”