Mirmahmud Mirəlioğlu: “Hələ də Moskvanı özünə paytaxt hesab edənlər var”

Siyasi Partiyaların Demokratiya və İnsan Hüquqları Mərkəzində əməkdaşlıq edən 11 partiyadan səkkizi, bir araya gələrək “Azadlıq-2015” Seçki Bloku yaratdığını elan ediblər. ADP və Müsavat bu blokda iştirakdan imtina edib. Milli Şurada toplaşan müxalifətin bir hissəsi isə, seçkilərə Mişşi Şura formatında gedəcəyini elan edib. Yaradılan yeni seçki blokunun həmtəsisçilərindən olan KXCP sədri Mirmahmud Mirəlioğlu müxalifət düşərgəsinin ümumi vəziyyətindən,qarşıdan gələn parlament seçkilərindən danışıb. - Mirmahmud Ağa, ötən həftə “Azadlıq-2015” seçki bloku elan etmisiniz və burada səkkiz partiya təmsil olunur. Bu haqda bir qədər məlumat verə bilərsinizmi? - Seçki blokunu yaratmaqda məqsəd 2015-ci il parlament seçkilərində iştirak etməkdir. Eləcə də bu seçkilərdə iştirak edərkən maksimum müxalifət düşərgəsində olan, fikri, mövqeyi üst-üstə düşən insanları bir araya toparlamaq və böyük bir cameyə, vahid mövqe halında seçkilərdə iştirak etməkdir. Təbii ki, parlament çoxluğunu da əldə etmək haqda düşüncələr var. Yəni qısaca desək, seçki blokunu yaratmaqda məqsədimiz qarşıdan gələn seçkilərdə iştirak etmək, mümkün qədər çox namizəd irəli sürmək və parlamentdə çoxlu sayda yer götürməkdir. Təbii ki, seçkiyə qatılan tərəf, qələbə naminə bu işə gedir. - Seçki blokunda səkkiz partiya təmsil olunur. Necə düşünürsünüz, bu partiyaların imkanları və potensialı nə qədərdir? - Seçki blokunun üzvü olan siyasi partiyalar 2010-cu il parlament seçkilərində iştirak ediblər. Böyük əksəriyyəti arasında əməkdaşlıq olub. Yeri gəlmişkən, həmin seçkilərdə Yeni Azərbaycan Partiyasından sonra, ən çox səs alan biz olmuşuq. Təbii ki, hakim partiyanın topladığı, daha doğrusu elan etdiyi nəticə və səslərə, hər zaman şübhə ilə yanaşmışıq. Və bunu əlavə şərh etməyə ehtiyac görmürəm. Bu reallığı nəzərə alsaq deyə bilərik ki, blokda təmsil olunan bir qism partiya, faktiki olaraq

2010-cu il seçkilərində qalib gəliblər. Başqa blok və birliklərdən fərqli olaraq bu partiyalar, KXCP-də daxil olmaqla son seçkilərdə həm irəli sürdüyü namizədlərinin sayına, həm də aldığı səs görə birinci yerdə olublar. Düzdür, seçkidən sonra Milli Məclisdə təmsil olunmamışıq. Və bu da başqa bir mövzudur. Odur ki, indi yaranan blokun qələbə qazanmaq imkanları daha çoxdur və biz də buna inanırıq. İnandığımız üçün də belə bir seçki blokunu yaratmışıq. Üstəlik əlavə güclər də bloka gəlib. - Adətən bizdə yaranan bloklar seçkidən sonra dağılır, müttəfiqlər arasında bir qarşıdurma, ittihamlar yarışı başlayır. Bu baxımdan blokunuzun taleyini necə görürsünüz? - Bloku təsis edəndə qeyd etmişik ki, blok 2015-ci il seçkilərinə hədəflənən blokdur və bura daxil olaraq hər birimiz, bu reallığı qəbul etmişik. Ona görə də, addımımızı atırıq. Blokun adı “Azadlıq-2015”-dir. Bu o deməkdir ki, siz dediyiniz narahatçılığa heç bir əsas yoxdur, qarşılıqlı ittihamlardan söhbət gedə bilməz, blok da 2015-ci il parlament seçkilərinə görə yaranıb. - Bloka başqa partiyaların daxil olma ehtimalı nə qədərdir? - Bu istiqamətdə müəyyən danışıqlar gedir. Bizə müraciət edənlər var, bizim də müraciət etdiklərimiz var, danışıqlar gedir. Hələ seçkilərə də start verilməyib. Bu, blok da 2015-ci il seçkiləri baxımından ilk başlanğıcdır. Biz Azərbaycanda siyasi situasiya yaradacaq addımlar ata biləcəyik və siz də bunun şahidi olacaqsınız. - ADP, Ümid və Müsavat blokda təmsil olunmadı, niyə? - Biz bunu normal qiymətləndiririk. ADP Demokratiya və İnsan Hüquqları Mərkəzinə gəldikdən sonra, seçki bloku yaratmaqda israrlı idi. Ümid Partiyası da ADP ilə “Qarabağ” blokunda müttəfiq idi. Bu ideya əslində onların öncədən ortaya gətirdiyi ideya idi. Biz də ideyanın reallaşmasında iştirak etdik. Ancaq son məqamda ADP və Ümid hesab etdi ki, bu blokda olmaq istəmirlər. Biz də bunu normal və anlaşıqlı qəbul etdik, eləcə də onlara təşəkkürümüzü bildirdik. Sualın digər hssəsi bilavasitə onların özlərinə aiddir və onlar istəsə sizin suallarınızı cavablandıra bilərlər. Müsavat Partiyası hələlik seçki müzakirələrində iştirak etmir və hesab edir ki, bu məsələyə mart-aprel aylarından sonra baxa bilər. - Demək qarşıdan gələn parlament seçkilərinə müxalifət dağınıq

formada gedəcək.. - Biz bütün dağınıq və pərakəndəliyin qarşısını almaq naminə, bloku təsis etdik. Hesab edirik ki, Azərbaycan, dövlət, millət naminə, hətta parlament seçkilərində qələbə əldə etmək naminə, bütün partiyalar blokda iştirak edə, özünün istəkərini bu formatda gerçəkləşdirə bilərlər. Yəni, hər bir partiya özünün siyasi fəaliyyətini burada tapa bilər. - Milli Şura seçkiyə ayrı gedəcək, Müsavat başqa seçki bloku yaradacaq, ADP və Ümid seçkilərdə birgə iştirak etməli olacaqlar. Müxalifətin fəaliyyətinin ümumi koordinasiası necə olacaq? - Bu istiqamətdə işlərimiz var, bunu davam etdiririk, başlanğıcda da bu kursu götürmüşdük. Demək olar ki, bütün bloklarla, fərdlərlə, qurumlarla ayrı-ayrılıqda görüşlərimiz olub, təşəbbüs irəli sürmüşük. Hamı da bunun tərəfdarı olub. Yəqin ki, addımlar atılacaq, ancaq ola bilsin ki, biri tez, digəri bir qədər gec atacaq. Bu da onların işidir. - Seçki blokunu yaratmısınız. Bundan sonra Demokratiya və İnsan Hüquqları Mərkəzinin fəaliyyəti necə olacaq? - Mərkəz fəaliyyətini davam etdirir. Seçki blokunun buna heç bir maneçiliyi yoxdur. Yəni, mərkəz və seçki bloku paralel qurumlar deyillər. - Sərdar Cəlaloğlu bəyan edib ki, ADP və Ümid mərkəzi tərk edir... - Bu barədə konkret qərarlar mənə tanış deyil. Amma belə gələn də olar, gedən də olar. Daha yaxşı olardı ki, onlar özləri açıqlama versinlər. Bizim də ADP sədrinə böyük hörmətimiz var. - Ölkədə ki, ictimai-siyasi durumu necə qiymətləndirirsiniz? - Əslində Azərbaycanda vəziyyət hər kəsə bəllidir. İndiki durum ağırdır və bundan çıxış yollarının biri də, bütövlükdə hər kəsin bir arada olmasıdır. Və yaxud müxalifətin bir yerdə olması, hakimiyyətin apardığı siyasətə münasibətin vahid olması lazımdır, ciddilik vacibdir. Azərbaycanın mövcud vəziyyəti bizim hamımızın bir arada olmasını diktə edir. Bu vəziyyətdən çıxış yollarını birgə aramalı və tapmalıyıq. Dünyanın Azərbaycana münasibəti ortadadır, Azərbaycan problemlərinin həlli istiqamətində atılan addımlar da bəllidir. Azərbaycanın, problemlərini həll etməkdə illərdi ki, çətinlik çəkir. Fikrimcə, bunu birgə həll etmək, yollar tapmaq daha münasibdir.İndi Azərbaycanın mövud vəziyyətinin birgə müzakirəsindən tutmuş birgə addımlara qədər, bütün

məsələlər diqqətdə olmalıdır. Biz mərkəz olaraq bu istiqamətdə addımlar atmışıq və hesab edirik ki, bu istiqamətdə də işlər davam etdirilməlidir. Bu iqtidar-müxalifət görüşündən başlanıb, mövzular müəyyənləşib. Yəqin ki, növbəti addımlar da olacaq. - Son dövrlər Azərbaycan-Rusiya münasibətləri müzakirə edilir və həm də narahatlıq ifadə olunur. Xüsusilə, Bakının Moskvaya daha çox yaxınlaşdığı iddia olunur... - Azərbaycanın qonşuları ilə normal münasibətləri olmalıdır. Ancaq bu münasibətlər, həm də qarşılıqlı olmalıdır. Əgər qonşunun bizə düşmən münasibəti varsa, biz ona dost münasibəti göstərsək, şübhəsiz ki uduzarıq. Eləcə də bizə dost münasibəti bəsləyən qonşuya, düşmən münasibətimizi ifadə edəsi deyilik. Azərbaycanın problemlərinin başında tarixən Rusiya dayanıb, bu gün də Rusiya dayanır. Qarabağ problemindən tutmuş demokratik islahatlara qədər, hər şey müzakirə olunmalıdır. Təbii ki, biz də dövlətçilik mövqeyindən çıxış etməliyik. Hesab edirəm ki, Azərbaycan- Rusiyaya, Azərbaycan-Qərbə münasibətləri dostluq münasibətlərindən çox, dövlətlərarası münasibətlərə çevrilməlidir. - Azərbaycan diplomatiyasının Ukrayna siyasətini necə qiymətləndirirsiniz? - Bu istiqamətdə görülən işləri təhlil edərkən, bir sıra qüsurlar ortaya çıxır. Azərbaycan-Ukrayna münasibətləri net şəklində olmalıdır. Rusiya-Ukrayna münasibətlərinin nəticəsi olaraq, bu gün Ukraynanın düşdüyü vəziyyət əslində bizə çox tanışdır. Biz bilirik ki, Qarabağ problemində Rusiyanın münasibəti necə olub, bu məsələlərdə hansı fəaliyyətdə bulunub. O cümlədən, Rusiyanın Ermənistanın müttəfiqi olması, rus qoşunlarının Ermənistanda olması da bizə aydındır. Ona görə də, Azərbaycanın diplomatiyasının belə məsələdə atdığı addımı, kimin nə deməsindən asılı olmayaraq uğurlu addım saymaq olmaz. Bu, doğru deyil. Ancaq bundan da faciə düzəltmək lazım deyil ki, biz AŞ PA-da Ukraynanı dəstəkləməli idik, Rusiyanı dəstəkləməli deyildik. İndi hesab edək ki, bu addımı atıblar. Əlbəttə, bu doğru addım deyil. Amma, belə bir addımın düzəldilməsi də mümkündür. - Azərbaycan xarici siyasətində koordinal dəyişiklik edərək, qərbdən çox Rusiyaya meyl edir? - Yox. Azərbaycanın xarici siyasətində siz deyən koordinal

dəyişiklik yoxdur. İyirmi ildən artıqdır ki, balanslaşdırılmş siyasət aparılır. Bu siyasətdə də, bəzən meyl məsələsində əskiklik və ya artıqlıq meydana çıxır. Gah qərbə, gah da şimala münasibətlər fərqli olur. Fikrimcə, yaxın aylarda bu, bir qədər də aydınlaşacaq. Hazırda Rusiyanın vəziyyəti yaxşı deyil. Fikrimcə, onun durumu ağırlaşdıqca, mərkəzdənqaçma meylləri daha çox müşahidə olunacaq. Bu istiqamətdə qeyri-adi bir şey yoxdur. Bizim mediamız da, Rusiyadan reportaj verəndə paytaxt Moskva deyir: “Dillərində türkcə danışır, amma “paytaxt Moskvada vəziyyət belədir” deyirlər. Hələ də Moskvanı özünə paytaxt hesab edənlər var. Bizim bu cür düşünən diplomatlarımız da var. Xarici siyasətimizdə də, bu cür kəkələmələr olur. Amma bu uzun sürməz, mütləq düzələcək. Başqa yolu da yoxdur.

HÜSEYN ABBASOĞLU