Deputatın qohumu Hacı Elmanın möhürü və imzası ilə uzun illər minlərlə adama 10 hektarlarla torpaq sahəsi satılıb, işin içində nüfuzlu adlar var

gundemxeber.az Millət vəkili Hacı Madər Musayevin də adının hallandığı və onun yaxın qohumu Hacı Rəşad Cabbarovun vəzifəsini itirdiyinə dair ölkə mediasında yazılar dərc olunub. Həmin yazıdan sonra millət vəkili bərk qəzəblənərək mənbə ovuna çıxıb. Qeyd edək ki, həmin yazıda bildirilir ki, Binəqədi kənd bələdiyyəsində qalmaqal yaranıb. Sosial şəbəkələrdə bununla bağlı yayılan xəbərə görə, bələdiyyə sədri Cabbarov Rəşad Ağasəlim oğlu vəzifəsindən uzaqlaşdırılıb. Onun üzünə bir qadının qoyulduğu bildirilir.
Siyasi fəaliyyətlə aktiv məşğul olan və Yeni Azərbaycan Partiyasının Binəqədi rayon təşkilatının Binəqədi qəsəbə gənclər təşkilatının sədri vəzifəsində çalışan Hacı Rəşadın həmin qadından külli miqdarda rüşvət tələb etdiyinə dair məlumatlar var. Məlumat üçün bildirək ki, Rəşad Cabbarov Binəqədinin deputatı Hacı Madər Musayevin qohumudu. Hacı Rəşaddan əvvəl isə bu bələdiyyəyə 10 il Hacı Madərin başqa qohumu Hacı Elman rəhbərlik edib. M.Musayev son seçkilərdə də Hacı Elmanın seçilməsinə çalışsa da buna nail ola bilməyib. Bununla belə Hacı Elmanın yerini onun bir qədər uzaq qohumu Hacı Rəşad tutub.
Qəzetimizə həmin məsələ ilə bağlı maraqlı məlumat daxil olub. Əldə etdiyimiz məlumata görə, həm Madər Musayevin, həm də onun yaxın qohumu olan Rəşad Cabbarovun “Biləcəri” bələdiyyəsinin sədri İlham Xəlilovla ciddi konfliktləri var imiş. Təxminən 3 ilə yaxındır davam edən kofliktin səbəi isə, İ. Xəlilovun nüfuz savaşı əsnasında deputatın keçmişdə qəssab olması faktını açıqlaması olub. Keçmişinin açıqlanmasını özünə təhqir hesab edən deputat, hətta açıq şəkildə bir gün bunun qisasını alacağını da elan edib.
Son günlər yayılan informasiyadan sonra açıq hücuma keçən deputatın bütün günahi İ. Xəlilovun üzərinə atması da bu hücumun tərkib hissə imiş. Məlumatı verən şəxs Madər Musayevi yaxşı tanıdığını və hətta Xəlilovun sonunu hazırlamaq üçün məlum informasiyanı özünün belə hazırlayıb sosial şəbəkələrə ata biləcəyini də bildirib. Qeyd edək ki, əslində uzun illərdi Binəqədi kənd bələdiyyəsində ciddi problemlər var. R.Cabbarov bu vəzifəni 2009-cu ildən tuturdu. Buna qədər isə Binəqədi kənd bələdiyyəsinə Hacı Madərin bacısı oğlu Hacı Elman Salmanov rəhbərlik edib. Hacı Elmanın möhürü və imzası ilə onun özü, yaxın ətrafı, bələdiyyə üzvləri və işbazlar tərəfindən uzun illər minlərlə adama 10 hektarlarla torpaq sahəsi satılıb.
Həmin torpaq sahələrinin böyük hissəsi ARDNŞ-in ərazisidi və bu günün özündə də vətəndaşlarla ARDNŞ arasında ciddi problemlər yaşanır. Hacı Elman Salmanov və onun ətrafında olan işbazlar isə bu əməliyyatlardan milyonlar götürüblər. Hazırda Binəqədi rayonu ərazisində həmin şəxslərin onlarla obyektləri var. Bura şadlıq evlərindən, restoranlardan, yanacaqdoldurma məntəqələrindən, otel tipli istirahət mərkəzləri, avtomobil yuma məntəqəsindən tutmuş xeyli obyekt daxildi.
Həmin şəxslər bu əraziləri mənimsəyənlər həmçinin çox yüksək vəzifəli şəxslərin də adından istifadə ediblər. Hansı ki, onların arasında çox nüfuzlu generallar da var. Hacı Elmanın ətrafındakı işbazlar bələdiyyə sədri və Hacı Madərin imkanları ilə yanaşı, həmin şəxslərin də adlarından istifadə ediblər və bununla da həm toxunulmazlıq, həm də milyonlara sahib olublar.
2009-cu ildə keçirilən bələdiyyə seçkiləri zamanı isə bu qrup Hacı Elmanın işlərinin yaxşı olmadığını görərək həm də Hacı Madərin digər qohumu Rəşad Cabbarovun da namizədliyini irəli sürüb.
Hacı Elmanın xeyrinə karusel əməliyyatları keçirilsə və seçicilər kütləvi şəkildə məntəqələrə daşınsa da, hakimiyyətdəki rəqib qanad onun yenidən bələdiyyə üzvü olmasına imkan verməyib. Amma Hacı Rəşad Cabbarov bələdiyyə üzvü seçilib və Hacı Madər bacısı oğlunun imzası və möhürü ilə uzun illər reallaşdırılan cinayət tərkibli əməlləri ört basdır etmək üçün digər qohumunu bələdiyyə sədri seçdirib. Ancaq Binəqədi rayon İcra Hakimiyyətinin yeni başçısı Xaləddin İsgəndərov bu vəzifəyə təyin olunandan sonra rayon ərazisində özündən əvvəl baş verən bir sıra qanunsuz əməlləri təftiş etdirməyə başlayıb. Yeni icra başçısı xüsusən də qanunsuz torpaq alveri fırıldaqçılarının vurulmasını tapşırıb. Məlumata görə, Rəşad Cabbarovun vurulması həm də bu məqamla bağlıdı.
Bu barədə danışan şəxs Binəqədi kənd bələdiyyəsi, Hacı Madər və onun ətrafında baş verənlərlə bağlı daha detallı faktlar açıqlayacağını vəd edib. Növbəti məlumatlarda uzun illər Binəqədidə dövlət ərazilərini mənimsəyən işbazların öz adları və istifadə etdikləri yüksək vəzifəlilərin də isimləri açıqlanacaq.
Məsələ ilə bağlı yazıda adı hallanan bütün tərəflərin mövqeyini dərc etməyə hazırıq..

Tahir