Elmar Vəliyev oğlunun problemini həll edə bilməyən keçmiş başçınının işinə xitam verilib

Ötən ilin sentyabrın 10-da prezident İlham Əliyevin sərəncamı ilə vəzifəsindən azad olunan Gəncə şəhər Nizami Rayon İcra Hakimiyyətinin başçısı Məharət Mustafayev barədə Göygöl Rayon Prokurorluğunda açılmış cinayət işindən yeni xəbər var. Bildiriliir ki, keçmiş icra başçısı ilə bağlı açılan cinayət işinə xitam verilib.

Xatırladaq ki, Göygöl Rayon Prokurorluğunda keçmiş icra başçısı haqda Cinayət Məcəlləsinin 309.2 (vəzifə səlahiyyətlərini aşma) və 221.1-ci (xuliqanlıq) maddələri ilə cinayət işi başlanılıb, istintaq aparılıb.

«Gündəm Xəbər»in məlumatına görə, M.Mustafayev başçı olan zaman Göygöl rayon bələdiyyəsinin sədrinə ağır xəsarətlər yetirməkdə ittiham olunur və məhz bu iş üzrə barəsində cinayət işi açılıb:

«Məharət Mustafayev, əslində, Gəncənin icra başçısı Elmar Vəliyevin iddiasının qurbanı olub. Bildiyiniz ki, Elmar Vəliyev Gəncənin ərazisini genişləndirmək məqsədiylə ətraf rayonlardan torpaq sahəsi almağa iddialı olub. Milli Məclisin qərarı ilə o, bir neçə rayondan torpaq sahəsi alaraq, Gəncənin ərazisini genişləndirib də. Ancaq Göygöl rayon icra hakimiyyətinin başçısı Arif Seyidov Elmar Vəliyevin bu istəyinə qarşı çıxıb. Hətta o, bu istəyə kəskin cavab verməklə yetinməyib, üstəlik, Elmar Vəliyevə qarşı hakim dairələrdə sistemli iş də aparıb. Nəticədə tərəflər arasında gərginlik güclənib və nəhayət, Elmar Vəliyevin Məharət Mustafayevin simasında Göygöldən zorla torpaq qoparmaq cəhdi qanla bitib».

Məlumatlı şəxs deyir ki, bələdiyyə sədrinin döyülməsi yeni deyil: «Bu hadisə çoxdan olub. Lakin Elmar Vəliyev tabeliyində olan və ən sadiq adamlarından sayılan keçmiş başçını ötən ilin sentyabrın 10-dək qoruya bildi. Əslində, onu sonadək qoruya bilməməsinin səbəbi Mustafayevin digər əməlindən də qaynaqlandı. Belə ki, o, Elmar Vəliyevin oğlu Elmirin adına Bakının Bilgəh qəsəbəsində alınan bir neçə bağ sahələrini də qalmaqalsız həll edə bilmədi. Hansı ki, Elmar Vəliyev həmin bağ sahələrinin sakit şəkildə alınmasını və camaatı razı salmağı birbaşa Məharət Mustafayevə həvalə eləmişdi. O isə bu

məsələni pulun deyil, zorun gücü ilə həll etməyə çalışdı. Nəticədə Elmar Vəliyevlə oğlunun adı mətbuatın gündəminə gəldi. Elmar Vəliyev də bundan sonra əlini onun üzərindən çəkdi».

Müsahibimiz bildirir ki, hazırda M.Mustafayev cinayət işindən xətasız qurtulmaq üçün Elmar Vəliyevə minnətçi düşüb:

«Amma Elmar Vəliyev istintaqa müdaxilə etməyib. Göygölün icra başçısı Arif Seyidov və döyülən bələdiyyə sədri isə sabiq başçını tutdurmaqda qərarlı idilər. Ancaq görünür, Məharət Mustafayevin vəzifəsindən azad olunmasından sonra tərəflər arasında barışıq əldə olunub. Və bu səbəbdən işə xitam verilib».

Xatırladaq ki, M.Mustafayev Gəncə şəhər Nizami Rayon İcra Hakimiyyətinin başçısı təyin olunmamışdan əvvəl Yevlax rayon torpaq şöbəsinin müdiri vəzifəsində çalışıb.

Yazıda adları hallanan şəxslərin də mövqeyini dərc etməyə hazırıq.

Cəfər