İcra başçısının fəaliyyəti ciddi narazılıqla müşayət olunur

Son zamanlar nazirlərin rayonlarda qəbullar keçirməsi, vətəndaşların problemləri ilə yerindəcə tanış olması mütəmadi olaraq davam edir. Bu proses vətəndaşlar tərəfindən müsbət qarşılansa da, bir çox yerlərdə şikayətçilərin nazirlərlə birbaşa dialoquna süni maneələr yaradıldığı da məlumdur. Qeyd etmək lazımdır ki, belə qəbulların təşkili həm də rayonlarda hökm sürən ab-havanın dəqiq öyrənilməsinə kömək edir. Bu yolla məmurların sadə insanlara qarşı olan münasibətini təhlil etmək olur. Hakimiyyət dairələri vəziyyətlə yerindəcə tanış olmaqla hadisələri dəyərləndirmək imkanı qazanır.

2015-ci ilin bir çox sahələrdə dəyişikliklər ilə yadda qalacağı heç kimdə şübhə doğurmur. Hakimiyyətin məmur ordusunda da əsaslı dəyişikliklərin olacağı şübhəsizdir. İlk növbədə isə fəaliyyəti daha çox narazılıq doğuran, haqqında şikayətlər daxil olan məmurların hədəfə alınacağı gözlənilir. Seçki ilində güclü himayədarları olmasına baxmayaraq öz kürsüsü ilə vidalaşacaq icra başçıları sırasında Zaqatala rayonuna rəhbərlik edən Mübariz Əhmədzadənin adının olduğu da söylənilir. Nəzərə alsaq ki, Zaqatala Prezident Administrasiyasının “şikayətlər kitabında” ön sırada olan rayonlardandır, buna inanmamaq olmur.

Ayrı-ayrı bölgələrin müxtəlif iri ranqlı məmurların kurasiyasında olması faktı hamıya məlumdur.

Qax, Zaqatala və Balakən rayonları isə Əhmədzadələrin tamamilə nəzarətindədir.

Bu rayonlarında möhkəmlənən Əhmədzadələr regionda müxtəlif turizm obyektlərinə, otellərə, restoranlara və çoxlu sayda müxtəlif sahəli obyektlərə sahibdirlər. Məlumatlara görə, adı çəkilən rayonlarda bütün biznes sahələrinə Əhməd Əhmədzadənin oğlu Cuma Əhmədzadə nəzarət edir. Bildirilir ki, Qax, Zaqatala və Balakən rayonlarındakı bütün biznes sahələri, obyektlər, otellər və tikilməkdə olan mağazalar Cuma Əhmədzadənin adına olan “Uluyurd” MMC şirkətinin nəzdindədir. Qeyd olunur ki, hazırda Qax rayonunda olan “El Resort” beş ulduzlu otel, "Yaşıl park”, "Ulu”, "İmproteks”, "Ballı bulaq”, "Qafqaz”, “Eden” park hotel, “Səngər qala” istirahət mərkəzləri, “Şəfa” istirahət və müalicə ponsionatı, “İlisu” ponsionatı və “Ulu Dağ” turizm mərkəzləri Cuma Əhmədzadəyə məxsusdur.

Zaqatala rayonuna rəhbərlik edən Mübariz Əhmədzadənin fəaliyyəti dövründə rayonda bütün gəlirli sahələr tamamilə nəzarətə götürülüb.

Zaqatalada cərəyan edən hadisələr əslində rayonun icra başçısı Mübariz Əhmədzadənin yarıtmaz fəaliyyətinin nəticəsidir. Artıq neçə müddətdir ki, bu rayonun bir sıra dövlət strukturlarına aid

olan idarə və təşkilatlarının fəaliyyəti tənqid obyekti olaraq ölkə mətbuatında işıqlandırılan mövzulardan birinə çevrilib. Belə ki, Zaqatalanın təhsil şöbəsinin, səhiyyə şöbəsinin, maliyyə idarəsinin və digər qurumların fəaliyyəti sakinlərin ciddi etirazlarına səbəb olur. Bütün nöqsanların əsasında məhz Mübariz Əhmədzadənin bu qurumlar qarşısında qoyduğu qeyri-qanuni tələblərin, idarəetmədə yol verilən kobud səhvlərin durduğu bildirilir. Digər tərəfdən isə rayon ərazisində torpaq sahələrinin qanunsuz olaraq satılması və zəbt olunması, sakinlərin məişət problemlərinin həllinə biganəlik, yaşıllıqların məhv edilməsi və bir çox digər ciddi qanun pozuntularına dair ittihamlar da məlumatlarda öz əksini tapmaqdadır. Qeyd olunur ki, icra başçısı vəzifə səlahiyyətlərindən sui-istifadəyə yol verərək sanki əli çatan bütün torpaqları, zirzəmiləri və obyektləri ən qısa müddətdə satıb qurtarmağa calışır. Buna görə də nə sakinlərin haqlı şikayətləri, nə də ölkədə həyata keçirilən antikorrupsiya tədbirləri M.Əhmədzadənin fəaliyyətinə təsir edə bləcək gücə malik deyil. Aldığımız məlumatlarda iddia olunur ki, bu gün Zaqatalada hər hansı bir ərazini almaq üçün və ya artıq alınmış sahədə hər hansısa bir tikintini həyata keçirmək üçün sadəcə başçı ilə “anlaşmaq” kifayət edir.

Artıq icra başçısının fəaliyyəti rayonda ciddi narazılıq yaradıb. Sosial-iqtisadi problemlər girdabında boğulan sakinlər rayonda hökm sürən özbaşınalıqlardan cana doyublar. Dövlət büdcəsindən kifayət qədər vəsaitlər ayrılmasına baxmayaraq, Zaqatalada abadlıq işləri yox səviyyəsindədir. Görülən işlər isə keyfiyyətsiz və kosmetik xarakterlidir. Dövlət vəsaitinin talanması üçün məmurların istifadə etdikləri “tender oyunları” Zaqatalada da xüsusilə geniş yayılıb. Görülən bütün işlər demək olar ki, icra başçısının Əhmədzadələrin nəzarətində olan şirkətlər tərəfindən həyata keçirilir. Satınalmalar üzrə Dövlət Agentliyinin rəsmi internet saytındakı məlumatlara əsasən, ərzaq təminatı üçün keçirilən tenderlərin qalibi olan "Ticarət-MS” MMC və "İstehsal -S” MMC eyni zamanda rayondakı uşaq

bağçalarının, xəstəxanaların təmir işlərinin və digər müsabiqələrin də qalibi olub. Lakin bunlar heç də rayonda olan “tender qaliblərinin” tam siyahısı deyil.

Bütün bölgədə şəriksiz hakimiyyətlərini bərqərar edən Əhmədzadələrin dəbdəbəli həyat tərzinin kölgəsində zaqatalalıların ağır həyat şəraiti sanki görünməz olub. Bu yaxınlarda medyada M. Əhmədzadənin 1 hektarlıq ərazidə 5 milyonluq villası haqqında məlumatlar verilmişdi. Buna baxmayaraq sakinlər adi işıq, qaz problemindən əziyyət çəkirlər. Qış aylarında isə vəziyyət ümumiyyətlə dözülməz olmur. Bir maşını 1000 manat olan odunu almağa imkanı olmayan insanlar fındıq qabığını yandırmaqla isinmək zorunda qalırlar.

Verilən məlumatlara görə, icra başçısının fəaliyyətindən narazı sakinlər etiraz aksiyası keçirməyə hazırlaşırlar. Baş verənlərdən artıq yuxarı dairələrin də xəbəri var. Qısa müddət ərzində vəziyyətə müdaxilə ediləcəyi gözlənilir. Xalq isə Əhmədzadələrin xanədanına son qoyulacağı günü səbirsizliklə gözləyir.

Mustafa