Ağdamda müdhiş “tender əməliyyatları”

İcra başçısı Raqub Məmmədov və tələbə yoldaşının “10 manatlıq” şirkətləri necə qalib olur?

Büdcə vəsaitlərinin amansızcasına talanması barəsində hər gün yeni-yeni faktlar açıqlanır. Xüsusilə rayonların sosial-iaqtisadi inkişafının təmin olunması, abadlıq-quruculuq işlərinin aparılması üçün milyonlarla vəsait ayrılır. Lakin, yerli icra hakimiyyətləri tərəfindən bu milyonların müxtəlif vasitələrlə talanması barəsində istənilən qədər faktlar sadalamaq olar. Əyalətlərdə aparılan quruculuq işlərinin çox zaman yerli sahibkarların, büdcə təşkilatlarının hesabına aparıldığı barəsində də yetərincə məlumatlar var. Son illər milyonlarla büdcə vəsaitlərinin talanması üçün məmurlar tərəfindən istifadə olunan metodlardan biri də “tender üsuludur”. İcra hakimiyyəti başçıları özlərinə yaxın olan şəxslərin adına çox zaman “10 manatlıq müəssisələr” adlandırılan saxta şirkətlər yaradır və bu yolla ayrılmış vəsaitlər asanlıqla ələ keçirilir.

Azərbaycanın işğal olunmuş rayonlarından biri olan Ağdamda da “tender üsulu” kifayət qədər geniş yayılmış bir üsuldur. Ölkə üçün strateji əhəmiyyətli bir ərazi olan və bir qismi erməni qəsbkarlarının işğalı altında olan rayonda büdcə vəsaitlərinin talanması barəsində məlumatlar verilir.

İcra başçıları üçün sevimli işlərdən biri olan abadlıq işləri bəzən insanlarda ikrah hissi yaradır. Çünki, rayona yeni təyinat alan başçı dərhal köhnənin dövründə aparılmış işləri “bir qələmdəcə silməyə” girişir. Az müddət əvvəl təmir olunmuş ərazilər yenidən sökülür və “yeni quruculuq” işlərinə başlanılır.

Ağdam rayonunda da belə “abadlıq üsulundan” istifadə olunur. İcra başçısı öz yaxınlarının şirkətləri vasitəsilə Ağdamda “abadlıq bumu” yaşadır. Məlumatlara görə, Raqub Məmmədov rayondakı təmir-tikinti, abadlıq-quruculuq işlərini tələbə yoldaşı Tahir Əliyev və Xıdırlı kəndindən olan xalası oğlu Adil adlı şəxsin şirkətlərinə verir.

Raqub Məmmədovla tələbə yoldaşı olan iş adamı dəyəri yüz min manatlarla ölçülən iri lahiyələr həyata keçirtməyə başlayıb. “Ağdam-1” MMC, “Ayaz-A” MMC, “Quzanlı-1” MMC, “Aysu-2007” MMC, “Tikinti-2011” MMC və digər onlarla kiçik müəssisələr Tahir Əliyevə məxsusdur. Raqub Məmmədovun Ağdam rayonuna icra başçısı təyinatından sonra həyata keçirilən bütün abadlıq tikinti işləri məhz Tahir Əliyevin şirkətləri vasitəsi ilə həyata keçirildiyi bildirilir.

Verilən məlumatlara əsasən, Ağdam rayon icra başçısı Raqub Məmmədovun tələbə yoldaşı Tahir Əliyevə məxsus müəssisələrə 2014-cü ildə 837086 (səkkiz yüz otuz yeddi min səksən altı) manat vəsait köçürdülüb. Burada məhşur “tender üsulu” yenə də öz işini görüb. Tahir Əliyevə məxsus şirkətlər tenderlərdə qalib elan olunaraq “görüləcək işlər” həmin müəssisələrə verilib. İş adamının müəssisələrinə verilən tenderlərin siyahısı isə belədir:

Ağdam rayonunda quruculuq işlərinin satın alınması - “Ağdam-1” 102000 (yüz ikimin);

Abadlıq, qurucluq işləri “Quzanlı-1” MMC 201817 (iki yüz bir min səkkiz yüz on yeddi) manat, Daxili yolların təmir işləri- “Tikinti -2011” MMC 319999 (üç yüz on doqquz min doqquz yüz doxsan doqquz) manat;

Yaşayış evlərinin təmir işləri “Universal TNP” 113750 (yüz on üç min yeddi yüz əlli) manat.

Verilən məlumatlara görə, Tahir Əliyevə məxsus müəssisələrin gördüyü işlərin böyük əksəriyyəti yalnız kağız üzərində olub. Vəsaitləri böyük hissəsi mənimsənildiyi üçün yalnız kosmetik işlər görülərək sənədləşdirilib.

Quzanlı qəsəbəsində kağız üzərində həyata keçirilən abadlıq, tikinti işlərini Tahir Əliyevdən başqa heç kəs görməyib. İş adamı təkcə park tikib ki, indi həmin parkı yenidən söküb böyüdürlər.

Aparılan “əməliyyatlarda” tikinti işlərində çalışan fəhlələrə yüksək əmək haqqı yazılır. Əslində isə qəpik quruşa çalışan fəhlələrin pulu da vaxtlı-vaxtında ödənmir. Hətta aylarla maaşını ala bilməyən fəhlələr də vardır ki, onların halal pullarını verən tapılmır.

Verilən məlumatlara əsasən, Ağdamın belə “abadlaşdırılması” artıq yuxarı dairələrin də diqqətini çəkib. İcra başçısının fəaliyyətinin araşdırılması istiqamətində işlər görülür. Bu araşdırmalardan sonra isə Raqub Məmmədovun vəzifəsi ilə vidalaşacağı şübhə doğurmur.

Mustafa