Rayon rəhbərliyinin uzun illər boyu apardığı korrupsioner siyasət nəticəsində Bərdə inkişafın aşağı pillələrindən yuxarı çıxa bilmir

Bərdə Azərbaycanın ən qədim şəhərlərindən və paytaxtlarından biridir. Bir zamanlar “Aranın anası” adlandırılan Bərdə təəssüf ki, məmur özbaşınalıqları, korrupsiya zənciri ucbatından öz əvvəlki qüdrətini itirməkdədir. Əslində dövlət büdcəsindən ayrılmış vəsaitlər hesabına rayonu inkişaf etmiş regionlar sırasında görmək mümkün idi. Lakin, dediyimiz kimi, rayon rəhbərliyinin uzun illər boyu apardığı korrupsioner siyasət nəticəsində Bərdə inkişafın aşağı pillələrindən yuxarı çıxa bilmir. Ölkənin əsas kənd təsərrüfatı rayonlarından olmasına baxmayaraq, bu sahə tənəzzülə uğramaq üzrədir. İndiki gərgin iqtisadi böhran şəraitində kənd təsərrüfatı üçün əlverişli şəraitə malik olan respublikamızda bu sahəni bərbad duruma salmağın hansı nəticələrə səbəb olduğunu düşünmək üçün böyük düha sahibi olmağa ehtiyac yoxdur.

Bu günlərdə-yəni martın 3-də Vidadi İsayevin rayona icra hakimiyyəti başçısı təyin olunmasının 4 ili tamam olacaq. Bu dörd il müddətində Bərdə öz problemləri barəsində Prezident Administrasiyasına şikayət edilən rayonlar sırasında lider mövqeyini qoruyub saxlayıb. Kənd təsərrüfatı rayonu olmasına rəğmən sakinlər üçün yaradılan süni baryerlər hamını çətin duruma salıb. Regionların sosial-iqtisadi inkişafına həsr olunmuş konfransda prezidentin söylədiyi bir fikri yəqin ki, hamı xatırlayır. Dövlət başçısı bir çox məmurların kənd təsərrüfatına kömək deyil maneə yaratdıqlarını, bu sahədə olan korrupsiya faktlarını xatırladaraq bildirdi ki, hər kəs bilməlidir ki, dövlət subsidiyaları məmurlara deyil, kəndlilərə, fermerlərə ayırır. Ancaq Bərdədən gələn xəbərlər bunun tam əksini göstərir. Çünki rayona ayrılmış subsidiyalarla ortada olan rəqəmlər bir-birinə ziddiyət təşkil edir. Rayondan daxil olan məlumatlara görə, Vidadi İsayev subsidiyaların daha “vacib” sahəyə xərclənməsinin yeni formulunu tapıb. Ayrılmış subsidiyaların 50 faizinin rayonun abadlaşdırılması adı ilə mənimsənildiyi bildirilir. Odur ki, fermerlər kənd təsərrüfatının “asfaltlaşdırılması” nəticəsində indi çıxılmaz vəziyyətə düşüblər.

Ümumiyyətlə, rayonda aparılan az-çox abadlıq işləri bərdəlilərin bir gözünü güldürsə də, bir gözünü həmişə ağladıb. Çünki, büdcədən bu məqsədlə ayrılan vəsaitlər icra başçısı tərəfindən “digər” məqsədlər üçün xərcləndiyindən əsas yük sahibkarların, büdcə təşkilatlarının üzərinə düşür. Məlumatlara əsasən, son 3 ildə Bərdədə şəhər küçələrinin asfaltlaşdırılması məqsədilə ayrılmış 2 milyon manatdan çox büdcə vəsaiti talandığı üçün ortada elə də bir əməli iş yoxdur. Şəhərin əksər küçələri azacıq yağışdan sonra keçilməz olur. Lakin, sənədlərdə həmin küçələrin də tam təmirli olduğu göstərilib. Məlumatlara əsasən, uzunluğu 110 kilometr olan şəhər küçələrinin 70 km-də asfalt örtüyü, 80 km-də isə işıqlandırma sistemləri yoxdur. Ancaq bu yaxınlarda rayona səfər etmiş Nəqliyyat naziri Ziya Məmmədova kosmetik təmir işləri aparılmış bir neçə mərkəzi küçə göstərilərək bütün rayon haqqında “ümumi rəy” formalaşdırılıb.

Rayonda görülən işlər üçün icra başçısı tərəfindən xüsusi “vergi sistemi” tətbiq olunub. Sahibkarlar, iş adamları “hallı halına görə” bu mizan-tərəzidən

keçməlidirlər. Təbii ki, görülən işlər üçün dövlət tərəfindən ayrılmış vəsaitlərlə maraqlananlar üçün rayonda fəaliyyət göstərmək mümkünsüz olur. Verilən məlumatlara görə, təkcə iş adamları deyil, rəhbər vəzifələrdə əyləşənlər üçün də “haqq-hesab dəftəri” mövcuddur. İcra başçısı idarə müdirlərinin ayda nə qədər qazanc əldə etdikləri hər kəsdən yaxşı bildiyi üçün onları “cəzasız” buraxmır. Məlumat verən mənbənin iddiasına görə, artıq 2 ildən çoxdur ki, Bərdə idarə müdirləri icra başçısı Vidadi İsayevə konkret olaraq siyahı ilə aylıq verirlər. Belə ki, 28 saylı Yol İstismar İdarəsinin müdiri İlham Əzimov ayda 3 min manat (həyata keçirdikləri yol maxinasiyalarından əlavə), Mədəniyyət və Turizm Şöbəsinin müdiri İlyas Hacıyev ayda 5 min manat, Təhsil Şöbəsinin müdiri Rzaquli Şərifov ayda 5 min manat, Mərkəzi Xəstəxananın baş həkimi İftixar Zeynalov ayda 5 min manat, Bərdə Suvarma Sistemləri İdarəsinin müdiri Natiq Əhmədov, Qarabağ Meşə Meliorasiya İdarəsinin müdiri Rəşid Rzayev, Subartezan Quyularının İstismar İdarəsinin müdiri Firudun Baxşalıyev, Meliorasiya İdarəsinin müdiri Sərdar Əhmədov ümumilikdə 20 min manat hesab verirlər. Mənbəmiz bildirir ki, su idarələrinin hesabını Suvarma Sistemləri İdrəsinin müdiri Natiq Əhmədov yığaraq Vidadi İsayevə çatdırır.

Vidadi İsayev rayonda tikdirdiyi ümumi sahəsi 36 hektar olan Heydər Əliyev parkının inşası zamanı da bir çox qanun pozğuntularına yol verib. Düzdür, mərhum prezidentin adını daşıyacaq bu park üçün büdcədən yetərincə vəsait ayrılıb. Lakin, icra başçısı və yaxınları ictimaiyyətdə elə rəy formalaşdırmağa çalışırlar ki, guya görülən bütün işlər V. İsayevin şəxsi vəsaiti hesabına aparılır. Parkın tikintisi üçün rayon məmurları da əməlli-başlı xərcə düşüblər. Bəzi məlumatlarda bu “xərcin” 10 min manat olduğu bildirilir. Həmçinin verilən məlumatlara əsasən, adıçəkilən parkda, eləcə də rayonun digər əlverişli ərazilərində olan bütün gəlirli obyektlərin hamısı icra başçısının yaxınlarına məxsusdur. Rayondan parkın inşası zamanı yol verilən daha bir qanunsuzluq barəsində maraqlı informasiya verilib. Bildirilir ki, tikinti işlərində cüzi sayda maaşla işləyən rayon sakininə rast gəlmək mümkündür. İşsizlikdən ölkə boyu səpələnən bərdəlilərə burada iş tapılmır. Çünki burada daha çox “biyar sistemindən” istifadə olunur. Ayrı-ayrı təşkilatların işçiləri məcburi qaydada tikinti işlərində çalışdırılır. Əvəzində isə əmək haqqı adı altında külli miqdarda vəsait ələ keçirilir.

Bərdədə görülən bütün işlərin icraçıları da Vidadi İsayevə bağlı olan şirkətlər olur. Ölkədə geniş yayılmış “tender tendesiyası” burada da öz işini görür. İcra başçısına yaxın olan şirkətlər bütün tenderlərin qalibləri olurlar. Nəticə isə yuxarıda sadaladığımız faktlardan aydın olur.

Bu gün Bərdə problemlərin girdabında boğulur, əvəzində isə bir qrup şəxs öz vəzifə səlahiyyətlərindən istifadə edərək var-dövlət, milyonlar sahib olub. Xalqın səbr kasası daşsa da, dərdinə əncam edən tapılmır. Vidadi İsayev idarəçiliyi sözün bütün mənalarında Bərdəni dərdə salıb. Bu dərdin isə tək bir çarəsi var!

Mustafa