İcra başçısı Vidadi İsayev bərdəliləri boğaza yığıb

Regionların sosial iqtisadi inkişafı istiqamətində ölkənin bütün bölgələrində məmurlar bu tədbirlərdən vətəndaşların sosal rifahının yaxşılaşdırılması üçün deyil, şəxsi maraqlarına istifadə edir. Belə bölgələrdən biri də Bərdə rayonudur. Bu barədə "Gündəm Xəbər"ə daxil olan məlumatlarda bildirilir ki, Bərdənin icra başçısı Vidadi İsayev həmin məmurlardandı ki, vətəndaşları dövlətdən narazı salmaqla özünün şəxsi maraqlarının güclənməsinə xidmət edir. Söhbət Bərdənin Mərkəzi Stadionunda məskunlaşmış məcburi köçkünlərdən gedir. Yaşıl otlar üstündə, futbol oyunları, "zirzəmi" deyilən yerdə isə onların həyat hekayələri yaşanır. Burada dərd-sərdən yaşını unudan insanlar, nəmişlikdən sağlamlıqlarını itirən körpələr, soyuqdan bütün qışı yorğana bürünüb yayı gözləyən qocalar, qaranlıqda evinin qapısını əli ilə axtaran insanlar var. Bunların isə Bərdə "XANI" Vidadi İsyevə heç bir adiyyatı yoxdur. Çünki icra başçısının başı daha "mühüm" işlərə qarışıb və Bərdənin Mərkəzi Stadionunda baş verənlərdən xəbərsizdir. Bir sözlə Bərdə rayonu uzun müddətdir ki, məmur məsuliyyətsizliyindən problemlər içində boğulur. Bərdədə "XANIN" yaratdığı ab-hava vətəndaşları rayonu tərk etməyə sövq edib. Amma, buna baxmayaraq Bərdənin icra başçısı Vidadi İsayev rayonun prpoblemlərinin həlli barədə fikirləşmək belə istəmir. Nəticədə illər boyu problemlər içərisində boğulan əhalinin problemləri daha da artır.

Bərdə kanalizasiya sularına qərq olub

Bərdədə problemlər bir-iki deyil. Burda demək olar ki, hər məhəllədə, hər küçədə problemi açıq-aydın görmək olar. Rayonun ən ağrılı problemindən biri və birincisi kanalizasiya problemidir. Bu problem barədə bərdəlilər dəfələrlə etiraz aksiyalarına cəhd etsələr də, Vidadi İsayevin məmurları sakinləri müəyyən bəhanələrlə sakitləşdirib, problemin həll ediləcəyinə yalandan söz verib. Amma, sonradan heç bir cavabdeh şəxs bu məsələyə qayıtmayıb. Yəni, bu da digər problemlər kimi yaddan çıxan problemə çevrilib.
Rayonda kanalizasiya problemi 10 ildən artıqdır ki var və sakinlər artıq bu problemdən cana doyub. Demək olar ki, minlərlə evi olan Bərdə rayonunun yarısından çoxu kanalizasiyasız yaşayır. Rayonda çox biabırçı vəziyyət yaranıb. Sakinlərin bir hissəsi məmur məsuliyyətsizliyindən cana doyub öz şəxsi vəsaitləri hesabına kanalizasiya xətti çəksələr də, yüzlərlə ev bu gün də kanalizasiyasızdır. Həmin şəxslərin kanalizasiyasız qalmasına səbəb isə bu ailələrin o qədər də imkanlı olmamasıdır. Sakinlərə dəfələrlə kanalizasiya çəkilməsi barədə söz verilsə də, bu sözü reallığa çevirən olmayıb. Elə söz ümid yeri olaraq qalıb. Məmurlar hər dəfə sakinlər şikayətə qalxanda onları sakitləşdirir, yaxın vaxtlarda kanalizasiya xəttinin çəkiləcəyini söz verib aradan çıxırlar. Nəticədə sakinlər zülmlü yaşayışa davam etməyə vadar olurlar. Artıq onlarla küçədə biabırçı vəziyyət yaranıb. İş o həddə çatıb ki, rayonun əksər küçələri üfunət iyi verir. Səbəb evlərin kanalizasiyalarının birbaşa küçələrə axıdılmasıdır. Çünki, başqa çarə yoxdur. Sakinlərin qazdıqları kanalizasiya quyuları tez-tez dolur və kanalizasiya küçələrə axmağa başlayır.

Bərdə yollarından bərdəlilər dad edir

Bərdənin ikinci problem yol problemidir. Artıq uzun illərdir ki, sakinlər rayonda yolların bərbad vəziyyətindən əziyyət çəkirlər. Qışda palçıqdan, yayda isə tozdan evlərə daxil olmaq mümkün deyil. Rayonun heç bir kənd yolları, daxili küçələri asfaltlanmayıb. Bir neçə küçə qismən asfaltlanıb ki, bu da həmin küçələrin imkanlı şəxslərinin şəxsi vəsaiti hesabına başa gəlib. Qalan küçələr hamısı palçıqlı vəziyyətdədir. Sakinlər təxminən 100 metrlik yolu qış aylarında yarım saata qət edə bilir. Bu yollarda avtomobillə qışda hərəkət etmək isə ümumiyyətlə mümkünsüzdür. Çünki qış aylarında çökəkli yollara girən maşın orada mütləq batmalıdır. Sakinlər deyirlər ki, yolların bərbad olması ilə bağlı hər dəfə Rayon Bələdiyyəsinə və icra nümayəndəliyinə müraciət etsələr də, hər dəfə bir bəhanə ilə onları geri qaytarıblar. Yerli məmurlar bu problemin aradan qaldırılmasında məsuliyyəti biri-birilərinin atırlar. İcra başçısı Vidadi İsayev isə hər dəfə bir bəhanə ilə rayon camaatını özündən uzaqlaşdırır.

İstifadədə olan qaz xətti sakinlərə verilmir

Rayon sakinlərinin daha bir problemi qaz problemidir, Bu isə Bərdə rəhbərliyi tərəfindən bilərəkdən həll olunmur. Belə ki, rayonda istifadədə olan qaz xəttinin olmasına baxmayaraq, hələ bir çox evlər qazla təmin edilməyib. Vidadi İsayev Bərdəyə icra başçısı təyin olunduğu bir çox evlərə qazın verilməsi məhdudlaşdırılıb. Yalnız qazı o evlərə verirlər ki, o şəxslər tapşırılıb və yaxud da rayonun qaz istismar idarəsinin əməkdaşlarına hörmət edilib.
Sakinlərin sözlərinə görə, qaz xətti rayon rəhbərliyinin məsul şəxslərinin tapşırığı ilə bağlanılıb. Səbəb isə rayon rəhbərliyinin "maklerləri" tərəfindən vətəndaşlardan pul tələb olunmasıdır. Pul ödəməyən sakinlər isə qazsız qalırlar. Sakinlər məsələ ilə bağlı “Azəriqaz” İstehsalat Birliyinə müraciət etsələrə də bir nəticə əldə edə bilməyiblər. Əksinə Vidadi İsayev artıq Dövlət Proqramının icrasından da sui-istifadə etməklə gəlir əldə edib vətəndaşlardan rüşvət toplamaqla məşğuldur.

Rayon Mərkəzi Xəstəxanasında olan özbaşınalıqlar

Bərdə rayon mərkəzi xəstəxanasında özbaşınalıqlar hökm sürür. Bu barədə Bərdə sakinləri bildirir ki, rayon icra hakimiyyətinin başçısı Vidadi İsayev ilə baş həkim İftixar Zeynalov ticarət əlaqəsinə girərək səhiyyə ocağını özəl sahə kimi istifadə edirlər.
Adıçəkilən ünvanda hər bir xəstəliyin müalicəsi və müayinəsi ödənişlidir. Sakinlərdən həmin ödənişin məcburi olduğu bildirilir. Dövlət tərəfindən verilən dərman preparatları açıq-aşkar satışa çıxarılır. Xəstəxanada olan xəstələrə hər gün dövlət hesabına dərman yazılsa da dərmanlar heç bir halda xəstələrə verilmir. Baş həkim isə bütün işlərdən nazirliyin və rayon icra başçısının məlumatlı olduğunu deyərək heç nədən çəkinmədiyini bildirir.

Elşad
Bərdə-Bakı