Hökumət süni qiymət artımına görə supermarket rəhbərlərini və ticarətçiləri məsuliyyətə cəlb edir

Bakının Xocahəsən qəsəbəsində “Rahat” market sahibi həbs olunub. Xəbərə görə, süni qiymət artımına görə supermarket rəhbəri məsuliyyətə cəlb olunub. “Gündəm xəbər”da daxil olan məlumata görə, anti-bahalaşma tədbirləri çərçivəsində supermarket şəbəkələrində ciddi yoxlamalar aparılır.

Bu yoxlamalar nəticəsində vergi məsuliyyətinə cəlb edilənlər, barəsində cinayət işi açılanlar var. Prezident manatın devalvasiyası haqda çıxışında süni qiymət artımına gedənlərin cəzalandırılacağını bəyan etmişdi.

Bu xəbərdarlığın cavabı olaraq həbslər həyata keçirilir. Bəzi xəbərlərə görə, “Rahat” market Prezident Administrasiyasının sabiq şöbə müdiri, nurçu qalmaqalından sonra istefaya göndərilən Elnur Aslanova məxsusdur. Artıq bu mağaza “Razin” stansiyasını da alıb və qarşısında böyük lövhə vurulub, tezliklə açılacağı elan edilib.

Onu da deyək ki, istehlak bazarında süni qıtlıq yaratmaq məqsədilə məhsulların dövriyyədən çıxarılmasının və əsassız qiymət artımının, istehlakçıların qiymətdə və çəkidə aldadılmasının qarşısının alınması məqsədilə tədbirlər davam etdirilir.

Bundan əlavə, vətəndaş Şahin Ağalarova məxsus “Real-S” marketdə, sahibkar Xalid Ağayevə məxsus “Red” marketdə satışda olan malların yarlığında göstərilən qiymətlərlə, həmin malların nəzarət kassa aparatının fiskal yaddaşında olan qiymətləri arasında fərqlərin olduğu, bununla da əsassız qiymət artımına yol verilməklə istehlakçıların qiymətdə aldadıldığı aşkar edilib.

Qeyd edək ki, maddənin hazırki qüvvədə olan variantına görə inhisarcasına yüksək və ya inhisarcasına aşağı qiymət təyin etməklə, habelə bazarı bölüşdürməklə, bazara daxil olma imkanını məhdudlaşdırmaqla, ordan iqtisadi fəaliyyətin digər subyektlərini kənarlaşdırmaqla, vahid qiymət təyin etməklə və ya saxlamaqla inhisarçılıq hərəkətlərini etməyə görə 100 manatdan 500 manata qədər cərimə və ya 1 ilədək müddətə islah işləri ilə cəzalandırılır.

Eyni əməllər qabaqcadan əlbir olan bir qrup şəxs və ya mütəşəkkil dəstə tərəfindən törədildikdə isə 2 ilədək müddətə azadlıqdan məhrum etmə cəzası təyin olunur. Onu da deyək ki, bahalaşma bütün sahələri əhatə edib.

Rusiya istehsalı olan dərmanları daha ölkəyə gətirmirlər, beləliklə də bu dərmanlar bazardan çıxarılır. Bu haqda aptek sahibi olan vətəndaşlardan biri deyib. Onun sözlərinə görə, rus istehsalı olan “Entramiçin”, “Noşpa” və digər bu kimi insanların tez-tez istifadə etdiyi rus dərman preparatları satışdan yığışdırılır.

Sahibkarların sözlərinə görə, firmalar bu dərmanların yerinə Türkiyə, Belçika, Hindistan və digər ölkələrdə istehsal olunan dərmanlar gətirir.

Artıq firma dərmanları apteklərə ayaq açıb və rus istehsalı olan keyfiyyətli, ucuz dərmanlar satışdan çıxarılır. Bunu kommersiya məqsədi ilə həyata keçirirlər. Sahibkar qeyd edir ki, Bakı apteklərində dərmanların qiyməti yenidən qalxıb. Əczaçıların sözlərinə görə, son bir ay ərzində bəzi dərman preparatları apteklərə ikiqat baha qiymətə verilir.

Manatın məlum devalvasiyasından sonra diqqət cəlb edən hadisələrdən biri də daşınmaz əmlak bazarında aktivliyin artmasıdır. Yayılan məlumatlara görə, indi vətəndaşların bir çoxu əlində olan vəsaiti mənzil bazarına yönəldir.

Bu da nəticə etibarı ilə mənzil bazarında aktivliyi artırır. Həmçinin qiymətlərin yüksəlməsinə səbəb olur. Ümumiyyətlə, son vəziyyətin təhlili göstərir ki, manatın ucuzlaşması daşınmaz əmlak bazarına təsirini göstərməyə başlayıb.

Mənzillərin manatla qiyməti orta hesabla 25% artıb. Maklerlər bildiriblər ki, ev, mənzil almaq istəyənlər qəfildən çoxalıb. Lakin satanlar qiymətləri dollara çevirib və nəticədə 20-30%-lik bahalaşma əmələ gəlib. Əmlak bazarı üzrə ekspertlər bildirib ki, son vaxtlar bu sahədə ucuzlaşma var idi.

Amma baş verən proseslərdən sonra bazarda vəziyyət dəyişib. Manatın məzənnəsinin kəskin enməsi, eləcə də daşınmaz əmlakla bağlı yeni vergilərin qoyulması vəziyyəti dəyişib. Hazırda bazarda qiymət artımı müşahidə olunur.