Maliyyə naziri Mikayıl Cabbarovla yaxınlığı isə təhsildəki neqativ halların gizlədilməsinə səbəb olur

Məlum olduğu kimi, Maliyyə Nazirliyinin Dövlət Maliyyə Nəzarəti Xidməti tərəfindən 2014-cü ildə aparılmış maliyyə nəzarəti tədbirlərinin nəticələri barədə məlumat yayıb.

«Gündəm xəbər»in məlumatına görə, nazirliyin yaydığı məlumatda bildirilir ki, 14 rayon (şəhər) icra hakimiyyəti başçılarının aparatlarının saxlanılmasına, rayonların (şəhərlərin) abadlığına, yolların, mənzil fondunun və büdcə təşkilatlarının yerləşdikləri binaların əsaslı və cari təmirinə, şəhərlər (kəndlər və qəsəbələr) üzrə ərazi nümayəndəliklərinə, mənzil kommunal təsərrüfatı qurumlarına, həmçinin, 14 təhsil, 7 tibb, 1 mədəniyyət, 2 meliorasiya müəssisəsinə və 2 diplomatik nümayəndəliyə dövlət büdcəsindən ayrılan vəsaitlərin təyinatı üzrə xərclənməsi, habelə Maliyyə Nazirliyinin 5 yerli maliyyə orqanının yerli gəlir və xərclərin tərtibi və icrası üzrə işləri yoxlanılıb:

«Aparılmış yoxlamalar nəticəsində aşkar olunmuş nöqsanların aradan qaldırılması və belə nöqsanlara digər təşkilatlarda yol verilməsinin qarşısının alınması məqsədi ilə, habelə nöqsanlara yol verilməsində təqsiri olan vəzifəli şəxslər barəsində tədbirlər görülməsi üçün müvafiq yerli icra hakimiyyəti orqanlarına və aidiyyəti nazirliklərə məktublar göndərilib.

Yoxlamaların gedişində də nöqsanların aradan qaldırılması istiqamətində xeyli işlər görülüb, yoxlamalarla aşkar olunmuş artıq və əsassız ödənişlərin əsas hissəsinin (4910,3 min manat) yoxlamaların gedişində təqsirkar şəxslər tərəfindən büdcəyə bərpası təmin edilib. Mövcud qanunvericiliyin tələblərinin pozulması ilə ümumtəhsil məktəblərində yaradılmış 52 sinif komplekti və məktəbdənkənar müəssisələrdə təşkil olunmuş 140 dərnək və qrup, normadan artıq saxlanılmış 702,5 ştat vahidi ləğv edilib. Həmçinin normativ sənədlərin tələblərinə uyğun olmayan əsassız ödənişlərin davam etdirilməsi dayandırılıb.

Evdə təhsilə cəlb edilmiş şagirdlərin yenidən psixoloji-tibbi-pedaqoji komissiyadan keçirilməsi nəticəsində evdə təhsilə cəlb edilmiş şagirdlərin sayı 73 nəfər azaldılıb, 107,9 min manat məbləğində artıq və əsassız ödənişlər aşkar edilib. Bir təşkilat üzrə yoxlama materialları müvafiq tədbirlər görülməsi üçün aidiyyəti üzrə Azərbaycan Respublikasının Baş Prokurorluğuna göndərilib».

Göründüyü kimi, nazirlik rəsmi şəkildə 14 icra başçısının fəaliyyətinin təftiş edildiyini bildirməklə yanaşı, ölkənin təhsil sistemində ən açıq korrupsiya faktlarının birinin üzərində araşdırma aparıb:

«Amma məsələnin ən maraqlı tərəfi budur ki, yoxlama aparılan qurumlardan yalnız biri haqda Baş Prokuror yanında Korrupsiyaya qarşı Mübarizə İdarəsinə material göndərildiyi bildirilib. Bu isə ortaya yeni şübhələr çıxarıb».

Bizi məlumatlandıran mənbənin sözlərinə görə, təftiş edilən 14 rayonun icra başçıları və digər qurumların rəhbərləri rayon maliyyə idarələrinin vasitəsilə Maliyyə Nazirliyi ilə gizli anlaşmaya gediblər:

«Bunun nəticəsində yoxlama ciddi korrupsiya faktlarını gizlədərək, aidiyyatı orqanlara müvafiq tədbir görülməsi üçün təqdim etməyib. Yalnız bir rayonda ciddi əhəmiyyəti olmayan bir sahə üzrə toplanmış materiallar prokurorluğa göndərilib. Bu isə icra başçısı ilə maliyyəçilərin anlaşması qənaətini gücləndirir. Görünür, rayon maliyyə idarələrinin rəisləri öz həmkarları ilə icra başçılarıınn xeyrinə danışıqları müsbət sonlandıra biliblər».

Ölkə təhsili üzrə aparılan yoxlamalara gəlincə isə, müsahibimiz deyir ki, Samir Şərifov bu sahə üzrə radikal qərar vermək istəyində ola bilməz:

«Samir Şərifov təhsil naziri Mikayıl Cabbarovla eyni qruplaşmada təmsil olunur. Bundan əlavə, Samir Şərifovun müavini Azər Bayramovun doğma qardaşı Ceyhun Bayramov hazırda Mikayıl Cabbarovun “sağ əl”i rolunu oynayır. Digər yandan yoxlama aparan Maliyyə Nazirliyinin Dövlət Maliyyə Nəzarəti Xidmətinin rəisi Cavanşir Yusifovun qardaşının da məhz Mikayıl Cabbarovun istəyi və təqdimatı ilə rektor olduğunu nəzərə alsaq, o zaman bu xidmətin təhsildəki neqativ halları üzə çıxaracağı mümkünsüz görünür. Görünür, Mikayıl Cabbarov və rayon təhsil idarələrinin rəisləri də buna arxayın olaraq, talançılıqla məşğul olurlar».

Bu və ya digər istiqamətlərdə araşdırmalarımız davam edəcək.

Cəfər