Rayon icra hakimiyyətinin maliyyə
maxinasiyası təhsil şöbəsində davam etdirilir

Hər bir millətin taleyində təhsilin rolunu şərh etməyə ehtiyac yoxdur. Qısaca onu qeyd edə bilərəm ki, təhsili olmayan dövlətin, müəllimi dilənçi günündə yaşayan xalqın gələcəyi məhvə məhkumdur.. Saatlı rayon təhsil şöbəsinin işçiləri və əksər məktəb direktorlarının gələcəyimizi necə məhv etdiklərini diqqətinizə çatdırım.
2011-2012-ci tədris ilinin ortalarında baş nazir Artur Rəsizadə sərəncam verdi ki, müəllimin 24 saatdan artıq dərs deyə bilməz. Sonra Milli Məclis qərar qəbul etdi ki, 65 yaşdan yuxarı müəllimlər işdən azad olunsun. Təhsil Nazirliyi universitetləri qurtarıb diplom almış, kadr kimi işləməli olan müəllimləri yenidən attestasiyadan keçirməklə onların məktəblərə gedən yolunu bağladı. Nəticədə orta məktəblərdə kəskin şəkildə müəllim çatışmazlığı baş verdi. Məktəbdə də dərs boş qala bilməz, mütləq tədris olunmalıdır.
Bundan istifadə edən Saatlı rayonunun bəzi məktəb direktorları həmin dərsləri tədris olunmasa da özü məktəbdə, adı dərs cədvəlində olmayan, dərs keçməyən, jurnal yazmayan, maaş kartları məktəb direktorlarında olan müəllimlərin həmin kartlarına vakant dərslərin pulunu yükləyib mənimsəməyə başladılar. Həmin kartlarda 40-50 saat dərsin pulu mənimsənilir. Amma dərs deyən müəllimlərə 24 saatdan artıq dərs verilmir. Bununla da gözləri doymayan cinayətkarlar heç nədən çəkinmədən daha ciddi cinayətlərə əl atırlar. Belə ki, həkimlərlə cinayət əlaqəsinə girib müəllim dərs keçə-keçə, jurnal yaza-yaza, özünün xəbəri olmadan bülletenə çıxarılıb bülleten pulu mənimsənilir Xəstə uşaqlar adı altında çox sayda şagird evdə təhsilə cəlb olunur. Evdə təhsildən əsər-əlamət olmasa da bu pullar da mənimsənilir. Bir evdə təhsil alan şagird bir oklad dərs deməkdir. Bununla da dövlət büdcəsinə külli miqdarda ziyan vurulur. Əksər direktorların bütün ailə üzvlərinin məktəbin maaş cədvəlində adları getsə də özləri bircə dəfə də olsun məktəbə ayaq basmayıblar.
Saatlıda hətta kişi müəllimlər də analıq məzuniyyətinə çıxarılır. Niyə gülürsünüz? İnanmırsınız? Kişi müəllimlərin adlarının sonuna “ə” hərfi artırıb dekretə çıxarırlar və dövlət büdcəsini talayırlar. İnspektorlar hansı məktəbə təhkim olnublarsa həmin məktəblərdə onların adlarına dərs yazılır və dərs keçmədikləri halda həmin dərslərin pulunu alırlar. İndi də kurikulum oyununu atıblar ortalığa. Bu kurikulum müəllimləri də, şagirdləri də tədrisdən iyrəndirib. Müəllimlər səhərdən axşama qədər jurnal yazırlar, şagirdlər isə qalıblar ağzı günə. Heç bir bilik verməyən kurikulum bir-iki oxuyan şagird var idi, onun da axırına çıxdı. Kurikulum təhsili tamamilə məhv etməyə xidmət edir.
Saatlı rayonunda açılan kurikulum kursunda da külli miqdarda pul mənimsənilir. Kursa göndərilən müəllimlərdən qabaqcadan 100 manat pul alınır, on gün müddətində kursda olan müəllimin maaşı verilmir. Ezamiyyət pulundan danışmağa dəyməz. Çünki müəllim hara göndərilirsə, ona ezamiyyət pulu ödənilmir. Külli miqdarda dövlət əmlakını talayanlar eyni zamanda şəxsi əmlakı da talayırlar.
Saatlı Təhsil şöbəsinin baş mühasibi özündən vergi növləri icad edib. Müəllimlərin 14 faiz gəlir vergisinə, 3 faiz pensiya fonduna, 2 faiz də həmkarlar təşkilatına (bu təşkilat formal təşkilat kimi ləğv edilməlidir) vergi tutulmalıdır. Cəmi 19 faiz. Amma baş mühasib müəllimlərdən icra hakimiyyətinə, YAP-a, müdafiə fonduna, Qırmızı Aypara cəmiyyətinə qanunsuz vergi tutur. Bundan sonra da maaş yenə də əskik olur. Soruşanda deyir ki, bunu da elə-belə tutmuşam. Saatləı Təhsil şöbəsində elə-belə vergi növü də var. İldə üç-dörd dəfə sığorta olunan müəllimlərə heç bir sənəd verilmir ki, müəllim harasının sığorta olunduğunu bilsin.. Baş mühasib bayram günləri də müəllimlərin maaşını tutur. Amma Əmək məcəlləsinin 109-cu maddəsində yazılır ki, işçi bayram günləri işə cəlb olunarsa ona əmək haqqı ikiqat ödənilir. Deməli, işə cəlb olunmursa əmək haqqı birqat ödənilməlidir. Əks təqdirdə həmin maddə belə yazılmalıdır: “Bayram günləri işə cəlb olunan işçinin əmək haqqı ödənilməlidir.”
Talama bununla bitmir. Sınıq-salxaq maaşını alan müəllimləri direktor bir-bir çağırıb deyir ki, odun pulu, qəzet pulu, məktəbli forması pulu, müdirin, inspektorun, baş mühasibin, mühasibin, direktorun haqqını ver.
Təhsil naziri M.Mərdanov deyir ki, oklad yarım dərs deyən müəllim 350-400 manat maaş alır. Ən yüksək maaş alan müəllimin okladı 130 manatdır. Oklad yarım da 195 manat edir. Həmin pulun başına açılan oyunları yuxarıda qeyd elədim. Riyaziyyat üzrə professor nazirin latın əlifbası ilə dediyi yalanı, yazıq müəllim, gəl indi nisyə ərzaq götürdüyün kiril əlifbası ilə adını yaza bilməyən satıcıya başa sal, görüm necə başa salırsan.
Üzdə olan bu korrupsiya faktlarının əks olunduğu sənədlərə rayonun maliyyə şöbəsinin müdiri tərəddüd etmədən qol çəkib təsdiq edir. Bütün bunlar qabaqcadan əlbir olmuş bir qrup şəxs tərəfindən külli miqdarda dövlət və şəxsi əmlakı talamadı. İllərlə açıq-aydın şəkildə baş verən bu cinayətləri dövlət orqanları görmür, ya da görmək istəmir. Camaat danışır ki, bu cinayətkarlar həmin pullardan H.Əliyev fonduna pul köçürürlər, yuxarıdakılara da pay verirlər. Ona görə də cəzasızlıq şəraitində belə ağır cinayətləri törədirlər. Prezident çıxışlarında deyir ki, bizə korrupsiya faktları verin, tədbir görək. Buyurun, bu da korrupsiya faktları, görək nəticəsi olacaq?
Lütvəli Dursunov