Rayonun Məzrəli kənd tam orta məktəbinin müəllimləri, keçirilmiş aksiyadan, direktorun qovulmasından və Şamil Nurəliyevin əməllərindən “Gündəm-xəbər”ə yazıblar; nazirdən əmr gözlənilir

Saatlı rayonu, Məzrəli kənd tam orta məktəbində özbaşınalıq baş alıb gedir. Məktəbin müəllimləri “Gündəm-xəbər”ə göndərdiyi məktubda, təhsil naziri Mikayıl Cabbarova şikayətləniblər. Müəllimlərin sözlərinə görə, artıq qanunsuzluq o həddə çatıb ki, gizlətmədən açıq şəkildə edilir.

Müəllim kollektivi qeyd edir ki, təhsil naziri bu məsələyə müdaxilə etməzsə, problem heç zaman həllini tapmayacaq. Müraciət müəllifləri qeyd edirlər ki, bütün işlərin başında Saatlının təhsil şöbəsinin müdiri dayanır. Ona isə “qaşın üstə qara var” deyən yoxdur. Nə rayon icra hakimiyyəti, nə də nazirlikdən baş verənlərlə maraqlanmırlar.

Belə ki, təhsil şöbəsinin müdiri Şamil Nurəliyev məktəbdə bildiyi qərarları verir: “Məzrəli məktəbini onların əsarətindən xilas etmək lazımdır. Düz altı aya yaxındır ki, məktəb bəzilərinin şəxsi ambisiyalarının qurbanına çevrilib. Şamil Nurəliyevin özü və adamları məktəbi viran qoymaqda davam edirlər. 2013-cü ildə məktəbin təlim-tərbiyə işləri üzrə direktor müavini işləyən Aynurə Əzizova hicablı olmağına görə işindən azad olundu.

Bu tapşırığın rayon rəhbərliyindən verildiyi bildirildi. Tamamilə qanunsuz və vicdan azadlığına zidd bir qərar verildi. Halbuki məktəb kollektivi və rəhbərliyin ondan hər hansı narazılığı olmayıb. Üstəgəl, bununla məktəbdə bir fitnə, nifaq salmağa çalışdılar.

Çünki Aynurə Əzizova müavinlikdən çıxarılmasında məktəb direktorunu günahkar bildi. Ona görə Əzizova öz yaxın ətrafı ilə həmləyə keçib, direktoru vəzifəsindən kənarlaşdırmağa səy göstərdi. Əslində bütün fitnənin, pozuculuq işlərinin önündə təhsil şöbəsinin müdiri Şamil Nurəliyev gedir”.

Müəllimlər qeyd edirlər ki, Ş.Nurəliyev vaxtilə rayonun Bəylik kənd məktəbində xoşagəlməz hərəkətinə görə əhali tərəfindən qovulub. Onun əməllərindən rayon camaatının xəbərdar olduğunu yazan şikayətçilər, belə bir şəxsin vəzifədə qalmasını layiq bilmirlər.

Onların fikrincə, təhsil naziri təcili olaraq rayona yoxlama göndərməli, o cümlədən şöbənin fəaliyyətini araşdırmalı, habelə Nurəliyev haqda səsləndirdikləri bu iddiaları da nəzərdən keçirməlidir. Müəllimlər israrla tələb edirlər ki, Saatlı təhsilini məhvə yuvarladan, məktəblərdə tədrisi sıfıra endirən, müəllimlər arasında qovğa yaradan belə bir dövlət qulluqçusu tezliklə təhsil sistemindən uzaqlaşdırılmalıdır.

Müəllimlər yazırlar: “Nurəliyev müəllimlərin, məktəb direktorlarının qəniminə çevrilib. Nurəliyev Məzrəli məktəbinə öz adamı Zakir Əmişovu direktor təyin etmək naminə bu qırğınları salıb. Ancaq Əmişovun direktor təyinatı uzun çəkmədi. Bəylik camaatı kimi Məzrəli əhli də Zakir Əmişovu məktəbdən qovdu.

Nəzərə alın ki, Nurəliyev Məzrəli məktəbini dağıtmaq üçün daha peşəkarlıqla yeni addiımlar atmağa başladı. Saatlı rayon təhsil şöbəsində müavini işləyən, Məzrəli məktəbində çox ciddi münaqişələr törədənlərin yaxın qohumu olan Şöhrət Bədəlov əvəzedici göndərildi.

Şöhrət Bədəlov Məzrəli məktəbinə direktor əvəzedicisi kimi gəldiyi 22 yanvar 2015-ci il tarixindən etibarən, birinci saatların dərsləri istisna olunmaqla hər gün bütün qalan saatları öz iclaslarına həsr edir. Uşaqlar isə bayırda qalırlar. Şöhrət Bədəlov isə bu vaxt ərzində qardaşı Ziyafətin 173 min dollarlıq Dubaydan gətirdiyi maşınından bəhs edir, əmisi və dayısı oğlanlarının Bakıdakı 200-250 min manatlı mal-mülklərindən söz açır.

Məktəbə isə dərs lazımdır, təhsil lazımdır. Görünür, onu öz maddi şəraiti maraqlandırır. Belə lazımsız, bitib-tükənməyən iclaslardan şagirdlər də, işçilər də cana doyub. Məktəbdə intriqa yaradan şəxslər Şöhrət Bədəlovun yaxın qohumlarıdır. Nazir Mikayıl Cabbarovdan xahiş edirik ki, Saatlı rayon təhsil şöbəsinin Məzrəli kənd tam orta məktəbində öz mənafeləri üçün törətdiyi bu özbaşınalıqlarına son qoyulsun”.

Ümumiyyətlə, Ş.Nurəliyevin əksər ümumtəhsil məktəblərini tam nəzarətsiz qoyması valideynlərin ciddi narazılığı ilə müşayiət olunur.

Bir müddət öncə rayonun məktəblərində aparılmış yoxlamalardan sonra gözləmək olardı ki, şöbə müdiri həm özünün, həm də məktəb direktorlarının fəaliyyətində dönüş yaradılmasına çalışacaq. Lakin Saatlı təhsilini problemlər məngənəsində sıxan amillər aradan qaldırılmamış qaldı.

Təhsil Nazirliyinin rəsmi açıqlamalarında rayondakı ümumtəhsil məktəbləri biabırçı durumu tənqid edilsə də, Ş.Nurəliyevin deyəsən, bu tənqidlərdən nəticə çıxarmağa vaxtı və həvəsi yoxdur. Ş.Nurəliyev axır vaxtlar heç Təhsil Nazirliyinin qoyduğu tələblərlə də hesablaşmır. Rayonda fəaliyyət göstərən 49

ümumtəhsil məktəbi və 19 uşaq bağçasının kiçik bir qismi istisna olmaqla qalan əksəriyyətində, xüsusən ucqar kənd məktəblərində hər şey görüntü xətrinə qurulub.

Müəllim təyinatında olduqca ciddi pozuntular var. Şagirdlərin tədris prosesindən ayrı düşməsi bir yana, qarşıya valideynlər məcburdurlar ki, övladlarını repetitor yanına göndərsinlər. Məktəblərdə dərslər yaxın adamların adına yazılır və 50 faiz şərt ilə maaş bölüşdürülür.

Hər müəllimim aldığı maaşın 30 faizi isə şəxsən Şamil müəllimə çatır. Əlbəttə ki, artıq hamının bildiyi həqiqətləri yenidən xatırlatmaqla biz xüsusən də Saatlı sakinləri üçün yeni bir məlumat təqdim etmədiyimizi başa düşürük. Ş.Nurəliyev tutduğu vəzifəyə Saatlının keçmiş icra başçısı Gülhüseyn Əhmədovun vaxtında təyin olunub.

Xatırladaq ki, yanvarın 21-də Saatlının Məzrəli kəndindəki orta məktəbdə baş verən etiraz aksiyasının əsl səbəbləri məhz bu məqamlar olub. Belə ki, aksiyanın baş verməsinə səbəbin bir müddət öncə işdən çıxarılan Nəzakət adlı məktəb direktorunun əvəzinə Saatlı rayon Təhsil Şöbəsi tərəfindən Zakir adlı şəxsin təyin edilməsinin olduğu bildirilir.

Buna etiraz edən kənd camaatı orta məktəbi mühasirəyə alaraq, yeni təyin olunmuş məktəb direktorunu qovublar. Məktəbə isə heç kəsi buraxmayıblar. Etirazçılar təhsilin aşağı səviyyədə olduğunu əsas gətirərək, layiqli bir şəxsin məktəb direktoru təyin olunmasını tələb ediblər.