Nazirlər rektor postu uğrunda savaşa başladı;
Təhsil naziri doğma qardaşı, rabitə naziri isə
elmi rəhbəri üçün «qollar»ını çırmaladı

Fevral ayının 1-də prezident İlham Əliyevin İnformasiya Texnologiyaları Universitetinin yaradılması haqqında verdiyi sərəncam Təhsil naziri Misir Mərdanovla Rabitə və İnformasiya Texnologiyaları Nazirliyinin rəhbəri Əli Abbasovun arasında yeni gizli savaşa zəmin yaradıb. Artıq nazirlər arasındakı toqquşmanın siptomları mətbuata da çıxıb. Xatırladaq ki, Nazirlər Kabineti İnformasiya Texnologiyaları Universitetinin yaradılması prosesini 2 aya başa çatdırılmalıdır. Sərəncamdan belə görünür ki, 2013-2014-cü tədris ilində yeni universitet artıq tələbə qəbuluna da başlayacaq. Bu isə yeni universitetə rektor təyin olunmaq istəyənlərin vəzifə ehtiraslarını qızışdırıb.
Bu haqda «Reytinq» qəzetinin son sayında da məlumat verilib. Qəzet, Rabitə və İnformasiya Texnologiyaları Nazirliyindəki mənbəyə istinadla xəbər verib ki, İnformasiya Texnologiyaları Universitetinin rektoru postuna adıçəkilən nazirliyin aparat rəhbəri Vidadi Zeynalovun müavini İlham Mərdanov ən şanslı namizəddir: «Nazirlikdə çox adamın fikri belədir ki, yeni universitetin başına İlham Mərdanov gətiriləcək. Onun təhsil naziri Misir Mərdanovun qardaşı olması və eyni zamanda, təhsil sahəsində təcrübəli olması bu yöndə dolaşan söhbətlərin ciddiliyini artırır. 59 yaşlı İlham Mərdanov Azərbaycan Memarlıq və İnşaat Universiteti və Azərbaycan Dillər Universitetində prorektor vəzifələrinə qədər yüksəlmiş elm adamıdır. O, 2005-ci ildə bizim nazirliyə şöbə müdiri vəzifəsinə gətirilib. Lakin bu gün Rabitə və İnformasiya Texnologiyaları Nazirliyində aparat rəhbərinin müavini kimi ciddi və məsuliyyətli bir vəzifə tutmasına baxmayaraq, hələ də Səməd Seyidovun rektoru olduğu Dillər Universitetində kafedra müdiri vəzifəsində qalır. Azərbaycanın AŞ PA-dakı nümayəndə heyətinin rəhbəri olan Səməd Seyidovun və qardaşı Misir Mərdanovun imkanlarını dəyərləndirən bir çox müşahidəçilər də bu səbəbdən fizika - riyaziyyat elmləri doktoru, professor İlham Mərdanovun şansını yüksək dəyərləndirirlər. Nazir Əli Abbasovun da ona isti yanaşması yeni universitetdə rektor olmaq istəyənləri nazirlikdəki bəzi vəzifəli şəxsləri narazı salsa da, onların da boş duracağını söyləmək olmaz. Bir sözlə, bizi qarşıda maraqlı mübarizə gözləyir».
«Gündəm xəbər»ə daxil olan məlumata görə isə, yeni universitetin rektoru postuna təkcə Misir Mərdanovun qardaşı İlham Mərdanov iddialı deyil. Bizə daxil olan məlumata görə, İnformasiya Texnologiyaları Universitetinin rəhbərliyinə AMEA-nın İnformasiya Texnologiyaları İnstitutunun direktoru, AMEA-nın müxbir üzvü Rasim Əliquliyevin təyin olunma şansı da kifayət qədər yüksəkdir: “Mətbuatda təkcə İlham Mərdanovun adı hallanıb. Bəli, onun rektor olmaq şansı qeyd olunan «amillər»ə görə yüksəkdir. Lakin bu o demək deyil ki, İlham Mərdanov həmin universitetin rektoru postuna yeganə şanslı namizəddir. Əslində, AMEA-nın İnformasiya Texnologiyaları İnstitutunun direktoru, AMEA-nın müxbir üzvü Rasim Əliquliyevin şansı da az deyil. Bəlkə də İlham Mərdanovla bərabərdir. 55 yaşlı Rasim Əliquliyev İlham Mərdanovdan fərqli olaraq, informasiya texnologiyaları üzrə peşəkar mütəxəssisdir. Digər tərəfdən, o, rabitə və informasiya texnologiyaları naziri Əli Abbasovun elmi rəhbəri olub. Əli Abbasov ona çox böyük hörmətlə yanaşır. Hələ nazir olmamışdan əvvəl, onlar bir yerdə informasiya texnologiyaları üzrə bir neçə uğurlu layihələrə imza atıblar. Əli Abbasov nazir təyin olunduqdan sonra həmin layihələr daha dərin şəkildə genişləndirildi. Bu gün də Rasim Əliquliyev nazirliklə sıx işbirliyində olmaqla yanaşı, nazirin çox böyük hörmətlə qarşıladığı elm adamıdır. Ona görə də yeni universitetin rektoru postuna nazirin ondan yana seçim ediləcəyinə şübhə edilmir. Söz yox ki, Əli Abbasov təbiətindən irəli gələn nüanslarla əlaqədar bu istəyini gizlilik şəraitində gerçəkləşdirməyə çalışır».
Qaynağın iddiasına görə, Əli Abbasovdan fərqli olaraq, nazirliyin aparat rəhbəri Vidadi Zeynalov isə İlham Mərdanovun namizədliyinə tam dəstəyini ifadə edir: «Ümumiyyətlə, nazirlə aparat rəhbərinin yolları Dövlət İqtisad Universitetində kəsişsə də, onların həm xarakter, həm də idarəçilik baxışlarında ciddi fərqlər var. Yeni yaradılan universitetlə bağlı da belə fikir ayrılığının mövcud olacağına şübhə yoxdur. Məncə artıq rektorluq məsələsində onların fikirləri indidən haçalanıb. İqtisad Universitetinə prorektor (həmin vaxtı həmin universitetin rektoru nazir Əli Abbasov olub - red.) təyin olunana qədər işsiz olan Vidadi Zeynalov keçmişdə Misir Mərdanovun ona etdiklərini unudan deyil. Onu Misir Mərdanov universitetə prorektor təyin etdirdi. Və bununla keçmiş maliyyəçinin yeni karyerasının yüksəlişində əsas rolu oynadı. Düzdür, o, bu yaxşılığı Misir Mərdanovun qardaşı İlham Mərdanovu nazirliyə əvvəl şöbə müdiri, sonra isə özünə müavin gətirməklə ödəməyə çalışıb. Lakin Zeynalov Misir Mərdanovla olan dostluğu səbəbindən daxildə də onun qardaşına dəstək verdiyi və verəcəyi faktdır. Kimsə şübhə etmir ki, o, müavinin rektor təyin olunması üçün hər varianta hazırdır. Məsələnin ən maraqlı tərəfi də budur ki, Misir Mərdanov da qardaşının rektor təyinatına müsbət yanaşır və o, hakimiyyətdəki bir çox yüksək vəzifəli şəxslərin öz qohum-əqrabasına «gün ağlaması»ndan nümunə götürməkdə qərarlıdır».
Məlumatlı şəxs deyir ki, Misir Mərdanovun da qardaşı ilə bağlı qərarlığı gec-tez onu nazir həmkarı ilə üz-üzə gətirəcək: «Şübhə yox ki, rektor postu bu iki naziri üz-üzə gətirəcək. Misir Mərdanov qardaşından, Əli Abbasov isə elmi rəhbərindən asanlıqla vaz keçməyəcək».
Məsələ ilə bağlı tərəflərin də mövqeyini dinləməyə hazırıq.
Elçin Əmirov