İddialara görə, vitse-spiker Ziyafət Əsgərov, Diasporlarla iş
üzrə dövlət komitəsinin rəhbəri Nazim İbrahimovun qardaşı,
iş adamı Hacı İbrahim İbrahimlinin də bu yerdə villaları var

Əhali səksəkə içindədir, oliqarxların imarətlərinin tikintisi isə davam edir

Ötən ilin dekabrında Badamdar qəsəbəsində baş verən sürüşmənin əsl baiskarı məmur villalarıdır. İki aylıq təmir-tikinti işlərindən sonra Badamdardan 20-ci sahəyə gedən yol açılsa da, təhlükə sovuşmayıb. Çünki məmur villalarının sayı azalmaq əvəzinə artır. Hələ də sürüşmə zonasında oliqarxlara, vəzifəli şəxslərə məxsus malikanələr ucaldılır.

Əslində sürüşmə zonasında yaranmış təhlükəni birdəfəlik aradan qaldırmaq üçün ərazidə yaşayan sakinləri və sözügedən villaları köçürmək lazım idi. Ancaq Azərbaycan hökumətində təmsil olunan iri ranqlı nazir-oliqarxları əhalinin taleyi yox, öz mülkləri maraqlandırır. Ona görə də Badamdardakı vəziyyət müvəqqəti olaraq yaxşılaşsa da, problem köklü həll olunmayıb.
“Gündəm-xəbər”ə daxil olan məlumata görə, Teleqüllənin yaxınlığına qədər uzanan məmur saraylarının kimlərə məxsus olduğu məlumdur. Əməkdaşımız həmin massivdə olub və şəkillər çəkib.

Daha sonra kiçik araşdırma zamanı öyrənib ki, prezidentin şəxsi mühafizə xidmətinin rəhbəri Bəylər Əyyubov, nəqliyyat naziri Ziya Məmmədov, rabitə və texnologiya naziri Əli Abbasov, deputat Fuad Muradov, parlamentin spikeri Oqtay Əsədov və başqa vəzifəli şəxslərə aid malikanələr var. Adıçəkilən məmurlar Badamdar sürüşməsi zamanı villaların sökülməsi təklifinə qarşı çıxıblar.
Fövqəladə hallar naziri Kəmaləddin Heydərov və baş nazirin müavini Abid Şərifov problemin həlli üçün villaların sökülməsini və bu massivdə tikinti aparılmasını qadağan edən qərar qəbul olunmasını istəyiblər. Ancaq villa sahiblərinin dirəniş və müqaviməti ilə üzləşən FHN “şefi”nin ideyası reallaşmayıb. Hazırda həmin villalar yerində qalıb. Məlumata görə, hətta bu məsələ ölkə rəhbərliyi səviyyəsində müzakirə olunub.

Şəhərin hər yerindən baxanda göz deşən villaların köçürülməsi təklif olunub. Ancaq buna imkan verilməyib. Qeyd olunub ki, sürüşmə zonasında yaşayan adi vətəndaşlar başqa yerə köçürülsün. Belə də ediblər. Səbayel Rayon icra Hakimiyyəti bir neçə ailəni massivdən çıxarıb. Sürüşmənin yenidən təkrarlanmayacağına isə heç kim zəmanət verə bilməz.
Əməkdaşımıza deyilib ki, bu villalar nəzarət altındadır və ora adi adamlar yaxınlaşa bilməz. Bu dəbdəbəli evlərə sahibləri ayda-ildə bir dəfə gələ ya gəlməyə. Əsasən də yay aylarında villalara gələnlər olur. İddialara görə, vitse-spiker Ziyafət Əsgərov, Diasporlarla iş üzrə dövlət komitəsinin rəhbəri Nazim İbrahimovun qardaşı, iş adamı Hacı İbrahim İbrahimlinin də bu yerdə villaları var.
Ərazidə yaşayan sakinlər isə deyirlər ki, kanalizasiya sularından sürüşmə baş verməsinə inanmırlar. Onların sözlərinə görə, bu boyda sürüşmə kanalizasiya suyundan ola bilərmi? Yağış suları, yaxınlıqda işləyən maşın yuma məntəqəsi, yüksəklikdə yerləşən malikanələrdən gələn su belə bir problemi yaradıb.
Badamdar sakini Yusif Məlikov: “Burada hər kəs özünə elə bir villa tikə bilməz.
Hər bir villaya gedən yolun qarşısında qadağa “znak”ı qoyulub. Bunu mən, sən edə bilmərik. Böyük adam olasan ki, bunu elətdirə biləsən. Villaların sahiblərinə heç kim bir söz demir. Ancaq camaatın üstünə gəlirlər. Balaca komamızı görə bilirlər, ancaq dağın başında tikilən villanı görmürlər. Hamı bilir ki, sürüşmənin əsas səbəbi bu villalardır.
Yüksəklikdə tikilib, özülü qazılan zaman ciddi fəsadlar törədilib. İndi də qarşısını ala bilmirlər. Sürüşmə elə bir yerdə baş verib ki, onun qarşısını almaq üçün heç bir maşın ora gedə bilməz”. Qəsəbənin sakinləri sürüşmənin səbəbini yaşıllıqların məhv edilməsində görürlər: “İmkanlı şəxslər ağacları kəsdirərək özlərinə imarətlər tikdirirlər. Bu da sürüşməyə gətirib çıxarır”.
Sakinlər bildirdilər ki, əhalinin tədricən buradan köçürülməsi nəzərdə tutulmuşdu. Sürüşmənin ən aktiv vaxtlarında hökumət əl-ayağa düşüb camaatı buradan köçürmək istəyib. Ancaq problemi qismən həll edəndən sonra plan yarımçıq qalıb. İnsanlara kompensasiya veriləcəyi isə bilinmir. Səksəkə içində yaşayan qəsəbə sakinləri deyirlər ki, indinin özündə də təpədə villa tikintiləri davam edir. Ancaq onlara “gözün üstə qaşın var” deyən yoxdur.
Qəsəbə sakini Murad Əliyev: “Yenə də tikinti işləri davam edir. Dövlət Televiziya Qülləsinin ətrafında nəhəng, ucu-bucağı görünməyən yaşayış villaları tikilib. Bu mənzillər yamac boyu uzanıb. Yamacın aşağı hissəsində yaşayan sakinlərə isə deyirlər ki, sizi köçürdürük. Necə olur, dağın başındakı tikililər deyil, aşağıda olan evlər sürüşməyə məruz qalır? Bu oyun isə heç bir məntiqi əsasa sığmır. Neçə illərdir mən burada yaşayıram. İmkan vermirlər ki, evdə hansısa restovrasiya işləri aparaq. Abid Şərifov deyir ki, sürüşməyə səbəb ağacların suvarılması olub. Ekologiya Nazirliyi isə bildirir ki, ağac əkməklə hadisələrin qabağını almaq mümkündür. Ağacların suvarılmasının sürüşməyə heç dəxli yoxdur”. Əldə etdiyimiz xəbərə görə, sürüşmə zamanı əraziyə yaponiyalı mütəxəssislər gəliblər. Onlar sürüşmənin dayandırılması haqda layihə hazırlayıblar ki, bunun reallaşması üçün Azərbaycan hökuməti büdcədən 3-4 milyon manat dəyərində vəsait ayırmalı olub. Hökumət isə həmin məbləğin bahalığını dilə gətirərək yaponiyalı alimlərlə razılaşmayıb.
Aslan